လတ်တလော လူမှုကွန်ရက်စာမျက်နှာများတွင် “အင်းတိုင်းရင်းသားများ သဘောထားထုတ်ပြန်ချက်” ဟူသည့် ခေါင်းစဉ်ဖြင့် အင်းလေးဒေသအတွင်း အခြားတိုင်းရင်းသားများ လာရောက်ခြင်းနှင့် စီးပွားရေး လုပ်ကိုင်ခြင်းများကို ပိတ်ပင်မည်ဟုဆိုသော စာတစ်စောင် ပျံ့နှံ့နေသည်။

ပျံ့နှံ့နေသော စာတွင် ၂၀၂၆ ခုနှစ် ဇူလိုင်လမှ စတင်ကာ အင်းလေးဒေသအတွင်း ကျင်းပသည့် ဘုရားပွဲ၊ စာတော်ပြန်ပွဲများသို့ အင်းတိုင်းရင်းသားမှလွဲ၍ အခြားတိုင်းရင်းသားများ လာရောက်ခြင်း၊ စီးပွားရေး ရင်းနှီးမြှုပ်ခြင်းနှင့် စက်လှေငှားရမ်းခြင်းတို့ကို လုံးဝခွင့်မပြုတော့ဘဲ အတင်းဝင်ရောက်လာပါက အရေးယူမည်ဟု ရေးသားထားသည်။

သတင်းစစ်ဆးချက်

ပျံ့နှံ့နေသော ထုတ်ပြန်ချက် စာစောင်ကို MFCN အဖွဲ့ဝင် သျှမ်းသံတော်ဆင့်မှ အချက်အလက်စစ်ဆေးသူများက စစ်ဆေးကြည့်သည့်အခါတွင် ယင်းထုတ်ပြန်ချက်မှာ အတုဖြစ်နေကြောင်း စိစစ်တွေ့ရှိခဲ့သည်။

အဆိုပါစာတွင် အင်းတိုင်းရင်းသားများ၏ ဥက္ကဌဟု လက်မှတ်ရေးထိုးထားသော်လည်း အင်းလေးဒေသတွင် ထိုအမည်ဖြင့် တရားဝင်ဖွဲ့စည်းထားသည့် အဖွဲ့အစည်းမျိုး မရှိကြောင်း စုံစမ်းသိရှိရသည်။

ထို့အပြင် သျှမ်းပြည်နယ်အစိုးရအဖွဲ့၊ အင်းတိုင်းရင်းသားလူမျိုးရေးရာဝန်ကြီး ဒေါ်တင်တင်ရီက “အဲဒီစာနဲ့ ပတ်သက်ပြီး ကျွန်မတို့ ဘာမှလည်း ပြောစရာလည်း မဟုတ်ဘူး၊ ဖြေရှင်းစရာလည်း မလိုဘူး။ ကျွန်မတို့ ထုတ်တာလည်း မဟုတ်ပါဘူး။ ကျွန်မတို့ အင်းတိုင်းရင်းသားတွေကရော၊ ကျွန်မတို့ အင်းပါတီဘက်ကရော ထုတ်ပြန်ထားတာ မဟုတ်ပါဘူး” ဟု ကမ္ဘောဇတိုင်း မီဒီယာကို ဖြေကြားထားသည်။

ကမ္ဘောဇတိုင်း – https://shorturl.at/TcqYC

အင်းတိုင်းရင်းသားများသည် ရှေးယခင်ကတည်းက အခြားတိုင်းရင်းသားများနှင့် ချစ်ကြည်စွာ နေထိုင်လာကြသူများဖြစ်ပြီး ယခုကဲ့သို့ လူမျိုးရေး ခွဲခြားပိတ်ပင်သည့် သဘောထားမျိုး မည်သည့်အခါကမျှ မရှိခဲ့ကြောင်း ဝန်ကြီးက ရှင်းပြထားသည်။

အင်းလေးဒေအတွင်း တိုင်းရင်းသားအချင်းချင်းအကြား သွေးခွဲရန်တိုက်ပေးသည့် ထုတ်ပြန်စာအတုများနှင့် စည်းကမ်းချက်အမှားများ လူမှုကွန်ရက်ပေါ်တွင် ဆက်တိုက်ပျံ့နှံ့နေကြောင်း၊ ယင်းသည် တရားဝင်အဖွဲ့အစည်းများ၏ ထုတ်ပြန်ချက် မဟုတ်ဘဲ သွေးခွဲလိုသည့် လော်ဘီများနှင့် အကောင့်တုများ၏ ဝါဒဖြန့်မှုသာ ဖြစ်ကြောင်း ဒေသခံများကို ကိုးကား၍ ခမ်းသားငေါဝ်း မီဒီယာကလည်း ဖော်ပြထားသည်။

ခမ်းသားငေါဝ်း – https://shorturl.at/br6X6

ပြီးခဲ့သည့် လအတွင်းကလည်း အင်းလေးဒေသကို ပအိုဝ်းကိုယ်ပိုင်အုပ်ချုပ်ရဒေသအတွင်း ထည့်သွင်းမည်ဆိုသည့် သတင်းအတုတစ်ခု ပျံ့နှံ့ခဲ့ဖူးသည်။

အင်းလေးဒေသအား ပအိုဝ်းကိုယ်ပိုင်အုပ်ချုပ်ခွင့်ရဒေသတွင်း ထည့်သွင်းမည့် ကိစ္စနှင့် ပတ်သက်၍ ပအိုဝ်းပြည်သူ့စစ် (PNO) ဗဟိုဌာနချုပ်ရုံးက အင်းလေးဒေသကို ၎င်းတို့၏ ကိုယ်ပိုင်အုပ်ချုပ်ခွင့်ရဒေသအတွင်း ထည့်သွင်းရန်နှင့် နယ်မြေတိုးချဲ့ရန် အစီအစဉ် လုံးဝမရှိကြောင်း ဇွန်လ ၁၅ ရက်တွင် ထုတ်ပြန်ခဲ့သည်။

သျှမ်းသံတော်ဆင့် – https://burmese.shannews.org/archives/53049

သုံးသပ်ချက်

ယခုစာသည်လည်း တိုင်းရင်းသားအချင်းချင်း စည်းလုံးညီညွတ်မှု ပျက်ပြားစေရန် ရည်ရွယ်ချက်ရှိရှိ ဖန်တီးထားသော ဝါဒဖြန့်မှုတစ်ခုသာ ဖြစ်သည်။

မိဘပြည်သူများအနေဖြင့် လူမှုကွန်ရက်ပေါ်တွင် ပျံ့နှံ့နေသော လူမျိုးရေး၊ ဘာသာရေး လှုံ့ဆော်မှုစာများကို မယုံကြည်ကြရန်နှင့် အတည်မပြုနိုင်သော သတင်းများကို ထပ်ဆင့်ဖြန့်ဝေခြင်း မပြုလုပ်ကြရန် တိုက်တွန်းအပ်ပါသည်။