သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသကို ၎င်းတို့၏ ကိုယ်ပိုင်အုပ်ချုပ်ခွင့်ရဒေသအတွင်း ထည့်သွင်းရန်နှင့် နယ်မြေတိုးချဲ့ရန် အစီအစဉ် လုံးဝမရှိကြောင်း ပအိုဝ်းပြည်သူ့စစ် (PNO) ဇွန်လ ၁၅ ရက်တွင် ထုတ်ပြန်ခဲ့သည်။

အင်းလေးဒေသအား ပအိုဝ်းကိုင်ပိုင်အုပ်ချုပ်ခွင့်ရဒေသအတွင်း သွတ်သွင်းမည့် ထိပ်တန်းလျှို့ဝှက် ညွှန်ကြားချက်စာတစ်စောင် လူမှုကွန်ရက်တွင် ပျံ့နှံ့နေမှုအပေါ် PNO ဗဟိုဌာနချုပ်ရုံးက ထုတ်ပြန်လိုက်ခြင်း ဖြစ်သည်။

အဆိုပါ ပျံ့နှံ့နေသောစာသည် အဖွဲ့အစည်းအပေါ် မနာလိုသူများက ဖန်တီးထားသည့် စာအတုသာ ဖြစ်ကြောင်းနှင့် အင်းသူ/ အင်းသားများနှင့် ပအိုဝ်းတိုင်းရင်းသားများအကြား နှစ်ပေါင်းများစွာ တည်ရှိခဲ့သော ချစ်ကြည်ရင်းနှီးမှုကို ပျက်ပြားစေရန် ရည်ရွယ်သည့် လှုံ့ဆော်မှုဖြစ်ကြောင်း PNO ၏ ထုတ်ပြန်ချက်တွင် ဖော်ပြထားသည်။

ညောင်ရွှေမြို့နယ် အင်းလေးဒေသသည် ပအိုဝ်းကိုယ်ပိုင်အုပ်ချုပ်ခွင့်ရဒေသအတွင်း မပါရှိသကဲ့သို့ နောင်တွင်လည်း တိုးချဲ့၍ ဆောင်ရွက်ခြင်း လုံးဝပြုလုပ်မည် မဟုတ်ကြောင်းဟု PNO က ဆိုထားသည်။

လက်ရှိတွင် PNO အနေဖြင့် အင်းလေးဒေသ၏ အရှေ့ဘက်နှင့် အနောက်ဘက် တောင်ပေါ်ဒေသရှိ ပအိုဝ်းတိုင်းရင်းသား ကျေးရွာများတွင်သာ နယ်မြေလုံခြုံရေး တာဝန်များကို ထမ်းဆောင်နေခြင်း ဖြစ်ကြောင်း ဆိုသည်။

၁၉၉၁ ခုနှစ်တွင် စစ်တပ်နှင့် ငြိမ်းချမ်းရေးယူခဲ့သော PNO သည် ၂၀၀၉ ခုနှစ်တွင် စစ်တပ်လက်အောက်ခံ ဌာနေပြည်သူ့စစ် (PNO/PNA) အဖြစ် အသွင်ပြောင်းခဲ့သည်။

နှစ်ပေါင်းများစွာ နေပြည်တော်ရှိ စစ်ဗိုလ်ချုပ်များအပေါ် သစ္စာခံခဲ့သည့်အပြင် နိုင်ငံရေးပါတီအဖြစ် ၂၀၁၀၊ ၂၀၁၅ နှင့် ၂၀၂၀ ရွေးကောက်ပွဲများတွင် ပအိုဝ်းဒေသရှိ အမတ်နေရာအများစုကို တောက်လျှောက်အနိုင်ရရှိခဲ့သည်။

၂၀၂၁ အာဏာသိမ်းပြီးနောက်ပိုင်း PNO သည် အင်းလေးဒေသတွင် စစ်ကော်မရှင်နှင့် ပူးပေါင်း၍ အထိုင်ချ တပ်စွဲထားပြီး အုပ်ချုပ်ရေး၊ လုံခြုံရေးနှင့် ဆက်ကြေးကောက်ခံခြင်းများကို လုပ်ဆောင်နေကြောင်း ဒေသခံများထံမှ သိရသည်။

ထို့အပြင် နေရပ်ပြန်လာသည့် စစ်ရှောင်များကို ငွေကြေးကောက်ခံခြင်း၊ မပေးနိုင်ပါက စစ်မှုထမ်းခိုင်းခြင်း၊ စက်လှေများ ချောဆွဲခြင်းနှင့် ဘုရားပွဲများကို အကြောင်းပြ၍ ဆက်ကြေးကောက်ခံမှုများ ပြုလုပ်နေကြောင်း ဒေသခံများက ပြောသည်။