သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် ပအိုဝ်းပြည်သူ့စစ် (PNO) က ရွာသားတစ်ဦးကို ကျပ်ငွေ ဆယ်သိန်းဖြင့် ပြန်ရွေးခိုင်းကြောင်း သတင်းရရှိသည်။
အင်းလေးတောင်ဘက်ခြမ်းရှိ PNO ဂိတ်တွင် ဒေသခံများနှင့် ခရီးသွားလာသူများကို အစစ်ဆေးတင်းကြပ်ထားပြီး သံသယရှိသူများကို စစ်ဆေးမေးမြန်းမှုများ ပြုလုပ်ပြီး ငွေတောင်းနေကြောင်း သိရသည်။
ပြီးခဲ့သည့် ဇွန်လ နောက်ဆုံးပတ်တွင် ဒေသခံအမျိုးသားတစ်ဦးသည် ညနေ ၇ နာရီတွင် ခြံစိုက်ခင်းမှ နောက်ကျပြီးပြန်လာသောကြောင့် ဖမ်းဆီးစစ်ဆေးခြင်း ခံရပြီး ငွေကျပ် ဆယ်သိန်း ဖြင့် ပြန်ရွေးခဲ့ရကြောင်း အင်းလေးဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“အဲဂိတ်က အရမ်းဆိုးတယ်။ ခြံကပြန်တာ မိုးချုပ်လို့ဆိုပြီး ပေးမပြန်ဘူးဖမ်းထားတယ်။ ပိုက်ဆံ ဆယ်သိန်းပေးရင် ပေးပြန်မယ်ဆိုလို့ ပေးခဲ့ရတယ်။ ငါးဖမ်းနေတဲ့ အမျိုးသားတစ်ဦးကိုလည်း ဖမ်းပြီး ရှေ့တန်းပို့လိုက်တယ်။ အဲဒီဂိတ်ကိုတောင် မဖြတ်ချင်ဘူး သွားစရာလမ်းမရှိလို့သာ အသုံးပြုနေရတာ၊ သူတို့ မကြည်ရင် ရစ်တယ် ဖမ်းတယ်။”ဟု ၎င်းကဆိုသည်။
ထို့အပြင် မိဘနှင့်စကားများ ရန်ဖြစ်သည့် အမျိုးသားတစ်ဦးနှင့် ရွှေခိုးသည့် သူခိုးတစ်ဦးကိုလည်း အဆိုပါ ဂိတ်သို့ သွားရောက် အပ်နှံခဲ့ရာ ရှေ့တန်းသို့ ပို့ဆောင်လိုက်ကြောင်း ၎င်းအမျိုးသားတစ်ဦးက ပြောသည်။
ဆက်လက်ပြီး အင်းလေးဒေသတွင် ကျေးရွာအလိုက် စစ်မှုထမ်းကို တစ်လလျှင် ငွေကျပ် သုံးသောင်းမှ ငါးသောင်းအထိ ထည့်ရပြီး စက်လှေအခွန်ခများကိုပါ ပေးဆောင်နေရကြောင်း သိရသည်။
“စစ်မှုထမ်းကြေးကို တစ်လ တစ်ခါပေးရတယ်။ လှေရှိရင် လှေအခွန်ဆိုပြီး သူတို့တောင်းသလောက်ပေးရတယ်၊ ကိုယ့်မှာ ပိုင်ဆိုင်တဲ့ ပစ္စည်းအကုန် စာရင်းကောက်တယ်၊ သူတို့တောင်းချင်တဲ့ အခွန်ဆိုတောင်းတယ်။”ဟု အင်းလေးဒေသခံ အမျိုးသမီးတစ်ဦးက ပြောသည်။
အင်းလေးတွင် နေ့စားခ တစ်နေ့လျှင် ငွေကျပ် တစ်သောင်းသာ ရရှိပြီး စားဝတ်နေရေး အဆင်ပြေစေရန် ရုန်းကန်နေရသောကြောင့် စစ်မှုထမ်းကြေးနှင့် အခွန်ခများကို ငွေတိုးဖြင့် ချေးငှားယူနေရကြောင်း အဆိုပါ အမျိုးသမီးက ပြောသည်။
မေလ ပထမပတ်တွင်လည်း စစ်ကောင်စီလက်အောက်ခံ တပ်ဖွဲ့ဝင်များက ကျွန်းမျှော ဆယ်ယူသည့် ဒေသခံ အမျိုးသားတစ်ဦးကို ဖမ်းဆီးသွားခဲ့ပြီး ယနေ့အထိ အဆက်အသွယ် မရသေးကြောင်း သိရသည်။
Leave a Comments