Wednesday, May 22, 2024

ပင်လောင်း၊ ဖယ်ခုံမြို့နယ် စစ်ကောင်စီ လက်နက်ကြီးပစ်ခတ်၊ ဗုံးကြဲ ကလေးငယ်အပါအဝင် ၄ ဦးသေဆုံး၊ ၉ ဦးဒဏ်ရာရ

Must read

သျှမ်းပြည် ပင်လောင်းနှင့် ဖယ်ခုံမြို့နယ်တွင် စစ်ကောင်စီတပ်ဖွဲ့မှ လက်နက်ကြီးပစ်ခတ်ခြင်း၊ ပေါင် ၅၀၀ ဗုံးကြဲခြင်းကြောင့် ကလေးငယ်အပါအဝင် ၄ ဦးသေဆုံးပြီး ထိခိုက်ဒဏ်ရာရသူ ၉ ဦးရှိကြောင်း စုံစမ်းသိရသည်။

ယမန်နေ့ (ဧပြီလ ၁၁) ရက်တွင် ဖယ်ခုံမြို့နယ် အနောက်ဖက်ခြမ်းရှိ ပီကင်းရွာနှင့် လွယ်ယင်းရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီက ပေါင် ၅၀၀ ဗုံးကြဲခြင်းကြောင့် အသက် ၃ နှစ်အရွယ်ကလေးငယ် အပါအဝင် ၃ ဦးသေဆုံးပြီး ထိခိုက်ဒဏ်ရာရသူ ၅ ဦးရှိကြောင်း ကရင်နီလူ့အခွင့်အရေး KnHRG က ယနေ့ ဧပြီလ ၁၂ ရက်မှာ ထုတ်ပြန်ထားသည်။

“မနေ့ညတုန်းက စစ်ကောင်စီ လေယာဉ်နဲ့ လာကြဲတာ။ သေတဲ့လူက ၃ ယောက်ရှိတယ်။ ကလေးတွေ ကောပါတယ်။ ဒဏ်ရာရတဲ့လူတွေလည်း များတယ်” ဟု ဖယ်ခုံမြို့နယ် ဒေသခံတစ်ဦးက ပြောသည်။

သေဆုံးသူများသည် အသက် ၃ နှစ်အရွယ် ယောက်ျားလေး ၁ ဦး၊ အသက် ၁၂ နှစ်အရွယ် မိန်းကလေး ၁ ဦးနှင့် အသက် ၆၅ နှစ်အရွယ် အမျိုးသမီး ၁ ဦးဖြစ်ကြောင်း ထုတ်ပြန်ချက်၌ရေးသားဖော်ပြထားသည်။

အလားတူ ထိခိုက်ဒဏ်ရာရသူများသည်လည်း အသက် ၇ နှစ် မိန်းကလေး ၁ ဦး၊ အသက် ၁၃ နှစ် မိန်းကလေး ၁ ဦး၊ အသက် ၁၅ နှစ် မိန်းကလေး ၁ ဦး၊ အသက် ၃၄ နှစ် အမျိုးသမီး ၁ ဦးနှင့် အသက် ၃၇ နှစ် အမျိုးသား တစ်ဦး ဖြစ်ကြသည်။

ထို့အပြင် ပင်လောင်းမြို့နယ် နန်းတုတ်ကျေးရွာအုပ်စု ပင်စုံရွာတွင် ဧပြီလ ၁၀ ရက်တွင်လည်း စစ်ကောင်စီ လက်နက်ကြီး ကျရောက်ပေါက်ကွဲမှုကြောင့် အသက် ၄ နှစ်အရွယ် ကလေး ၁ ဦးသေဆုံးပြီး၊ ဒေသခံ ၄ ဦးဒဏ်ရာရရှိခဲ့ကြောင်း သိရသည်။

လက်ရှိတွင် ထိခိုက်ဒဏ်ရာသူ ၄ ဦးထဲမှ ဒဏ်ရာပြင်းထန်သူ ၂ ဦးအား တောင်ကြီးမြို့ ဆေးရုံသို့ လည်းကောင်း၊ နောင်တရားဆေးရုံသို့ လည်းကောင်း ပို့ဆောင်ထားသည်ဟု သိရသည်။

စစ်ကောင်စီတပ်ဖွဲ့သည် ပင်လောင်းမြို့နယ် ဆောင်းပြောင်းကျေးရွာတွင် အမြောက်တပ်စွဲ သကဲ့သို့ ညောင်ရွှေမြို့နယ် ထီရီကျေးရွာတွင်လည်း အမြောက်တပ်စွဲ ထားသည်။

သျှမ်းတောင် ဆီဆိုင်၊ ဟိုပုံး နှင့် ပင်လောင်းမြို့နယ်တွင် တိုက်ပွဲကြောင့် ၂ လကျော်ကြာ အရပ်သားသေဆုံးမှု ၅၈ ဦးအထိ ရှိပြီး ကလေးငယ်နှင့် အမျိုးသမီးအပါအဝင် အရပ်သားထိခိုက်ဒဏ်ရာရမှု ၇၁ ဦးအထိ ရှိလာကြောင်း ပအိုဝ်းလူငယ်အစည်းအရုံးက ဧပြီလ ၈ ရက်မှာ ထုတ်ပြန်ထားသည်။

Leave a Comments

- Advertisement -spot_img

Latest article