သျှမ်းပြည်တောင်ပိုင်း၊ ပင်လောင်းမြို့နယ်တွင် တောင်ကျရေကြောင့် စိုက်ခင်းများ ပျက်စီးပြီး နေရာပြောင်းရွှေ့ရန် စီစဉ်နေကြောင်း သတင်းရရှိသည်။

ပြီးခဲ့သည့် ဇူလိုင်လ ပထမပတ်မှစပြီး သျှမ်းတောင်၌ မိုးများ ဆက်တိုက်ရွာသွန်းခဲ့ပြီးနောက် တောင်ကျရေကြောင့် တီကျစ်ဒေသနှင့် နောင်တရားဒေသတွင် ပြောင်းစိုက်ခင်းနှင့် ရာသီပေါ်သီးနှံစိုက်ခင်းများ ရေနစ်မြှုပ် ပျက်စီး သွားခဲ့သည်။

ထိုသို့ သီးနှံများ ပျက်စီးဆုံးရှုံးသောကြောင့် နောက်ထပ် ပြန်လည်စိုက်ပျိုးရန် အရင်းနှီးမကျန်၍ ကြွေးမြီးများ တင်နေကြောင်းဒေသခံ အမျိုးသားတစ်ဦးက ပြောသည်။

“ပြောင်းပေါင်းသတ်ဆေး မှားသုံးမိလို့ ပြောင်းက သေတာက တမျိုး၊ မိုးရွာတော့ ရေကြီးတော့ စိုက်ခင်းမြှုပ်ကုန်တာက တမျိုးနဲ့ ဒီနှစ်တော့ ဘာမှ မကျန်ဘူး၊ နောက်ထပ် အရင်းလုပ်ပြီး ပြန်စိုက်မယ်ဆို ပွဲစားနားက အကြွေးက တင်ပြီးရင် တင်နေတော့ အဆင်မပြေဘူး၊ သီးနှံက မြတ်တာက နည်းနည်း ပွဲစားကို အကြွေးပေးရတာနဲ့တင် မကာမိဘူး။” ဟု တီကျစ်ဒေသခံ ခွန်မောင်က ပြောသည်။

ထိုသို့ တောင်ကျရေကြောင့် သီးနှံစိုက်ခင်းများ ပျက်စီးသည်မှာ ပြီးခဲ့သည့် ၂၀၂၅ ခုနှစ်တွင်လည်း ကြုံတွေ့လာရပြီး ပြောင်းဧက( ၅၀၀ )ကျော်ပျက်စီးဆုံးရှုံးခဲ့ရကြောင်း ၎င်းအမျိုးသားက ပြောသည်။

ဆက်လက်ပြီး ပင်လောင်းမြို့နယ် လွယ်မောင်းရွာနှင့် ထီဝါးလီကျေးရွာတွင် မိုးရာသီ၌ တောင်ပြိုခြင်း၊ ရေကြီးခြင်းများကြောင့် နေအိမ်ပျက်စီးခြင်း၊ သီးနှံစိုက်ခင်းများ ပျက်စီးခြင်းတို့ ကြုံနေရသောကြောင့် ပြောင်းရွှေ့ရန် စီစဉ်နေကြကြောင်း ဒေသခံများထံမှ သိရသည်။

ပြီးခဲ့သည့် (၂၀၂၅) ခုနှစ် ဩဂုတ်လ ၂ ရက် မနက် ၁၀ နာရီကျော်တွင် မိုးအဆက်မပြတ် ရွာသွန်းသောကြောင့် တောင်ကျရေ ရုတ်တရက် ဝင်ရောက်လာသဖြင့် နေအိမ်၊ လမ်းနှင့် စာသင်ကျောင်းများ ထိခိုက် ပျက်စီးသွားခဲ့သည်။

ယခု (၂၀၂၆) ခုနှစ် ဇူလိုင်လတွင်လည်း ပင်လောင်း၌ မိုးအဆက်မပြတ်ရွာသွန်းသောကြောင့် တောင်စောင်းတွင် ရှိသည့် ထီဝါးလီကျေးရွာနှင့် လွယ်မောင်းကျေးရွာသည် မြေပြိုခြင်း ၊ရေကြီးခြင်း အန္တရာယ်နှင့် ကြုံတွေ့လာနိုင်၍ နေရာသစ်သို့ ရွှေ့ပြောင်းရန် စီစဉ်နေကြကြောင်း သိရသည်။

“ရွာက တောင်စောင်းမှာဆိုတော့ စိုးရိမ်ရတယ်၊ တောင်ကျရေက ရုတ်တရက်စီးရင် တရွာလုံး အကုန်မြုပ်နိုင်တယ်၊ မြေပြိုရင် ပိုဆိုးတယ်၊ ဒါကြောင့် တခြားနေရာကို အပြီးပြောင်းရွှေ့မှရမယ်၊ လောလောဆယ်တော့ သက်ဆိုင်ရာ လူကြီးတွေနဲ့ ဆွေးနွေးနေတုန်းပဲ၊ ပြောင်းဖြစ်ဖို့တော့ များတယ် မိုးရာသီဆို ကောင်းကောင်းတောင် မအိပ်ရဲကြဘူး”ဟု လွယ်မောင်း ဒေသခံ အမျိုးသားတစ်ဦးက ပြောသည်။

ယခုလက်ရှိ ထီဝါးလီကျေးရွာနှင့် လွယ်မောင်းကျေးရွာတွင် တောင်ကျရေကြောင့် ပြောင်းစိုက်ခင်း၊ ဂေါ်ဖီစိုက်ခင်းများ ဧက ၂၀၀ ကျော်ပျက်စီးခဲ့သောကြောင့် အရင်းနှီးများဆုံးရှုံးသွားကြောင်း အဆိုပါ အမျိုးသားက ပြောသည်။
လွယ်မောင်းကျေးရွာ နှင့် ထီဝါးလီကျေးရွာတွင် လူဦးရေတထောင်ကျော်ရှိပြီး အများအားဖြင့် စိုက်ပျိုးရေးဖြင့် အသက်မွေးဝမ်းကျောင်း ပြုကြသူများ ဖြစ်ကြသည်။

ပြီးခဲ့သည့် ၂၀၂၄ ခုနှစ်နှင့် ၂၀၂၅ ခုနှစ်တွင် လွယ်မောင်းကျေးရွာနှင့် ထီဝါးလီကျေးရွာဘက်တွင် တောင်ကျရေကြောင့် ရေကြီး ၊မြေပြိုဖြစ်ခဲ့ပြီး နေအိမ် (၂၀)လုံးနီးပါး ပျက်စီးခဲ့သည်။

ပြီးခဲ့သည့် မေလ ပထမပတ်တွင်လည်း ပင်လောင်းမြို့နယ်၊ ရွာငံမြို့တွင် မိုးဆက်တိုက်ရွာသွန်းမှုကြောင့် တောင်အောက်ကျေးရွာရှိ ဆည်ကျေးရွာတွင် တောင်ကျရေများ စီးဆင်းကာ နေအိမ်အတွင်း ဝင်ရောက်မှုကြောင့် ရွှေ့ပြောင်းခဲ့ရပြီး သီးနှံများ ပျက်စီးခဲ့ကြသည်။