သျှမ်းပြည် တောင်ပိုင်း ပင်လောင်းမြို့နယ်ရှိ ကျေးရွာများတွင် ပအိုဝ်းပြည်သူ့စစ် PNO က ကျေးရွာများအတွက် လုံခြုံရေးယူပေးနေသည်ဟုဆိုကာ ဒေသခံများကို နေ့စဉ် ထမင်းထုပ်ပို့ဆောင်ခိုင်းကြောင်း စုံစမ်းသိရသည်။

ပြီးခဲ့သည့် မေလ ပထမပတ်မှစပြီး ပင်လောင်းမြို့နယ် လုံးပျဉ်းကျေးရွာ၊ တောင်မဲသင်းကျေးရွာ နှင့် မြောက်စလုံးကျေးရွာတို့တွင် ပအိုဝ်းပြည်သူ့စစ် (PNO) တို့က ကျေးရွာလုံခြုံရေးယူပေးနေသည်ဟုဆိုကာ ဒေသခံများကို နေ့စဉ်ထမင်းထုပ်များပို့ဆောင်ခိုင်းနေကြောင်း ပင်လောင်းမြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“သူတို့က ရွာကို လုံခြုံရေးယူပေးတယ်ဆိုပြီး ဒေသခံတွေကို ထမင်းထုပ်တွေပို့ခိုင်းနေတာ။ တစ်ရက်ကို ထမင်းဟင်း ၃ နပ်စာ ချက်ပြီး ပို့ပေးရတယ်။ ြည်သူတွေက စုပေါင်းပြီး ငွေတွေထည့်ပြီး ချက်ကျွေးနေရတာ။ခက်ခဲတဲ့ကြား ရှာပြီးလုပ်ပေးရတာတယ်။”ဟု ၎င်းကပြောသည်။

ထို့ပြင် စစ်ကောင်စီလက်အောက် ပအိုဝ်းပြည်သူ့စစ် PNO တပ်သားများ လုံခြုံရေးယူပေးသည်ဟု ဆိုသည့် ကျေးရွာများတွင် ဒေသခံများကိုယ်တိုင် ကျေးရွာလုံခြုံရေးအတွက် ကင်းစောင့်နေရကြောင်း ၎င်းကဆက်ပြောသည်။

“ပြီးတော့ လုံခြုံရေးယူပေးတယ်တာပြောပဲ။ တကယ်တော့သူတို့ကမစောင့်ဘူး။ ရွာသားတွေကိုပဲ တစ်ရက် ၅ ယောက် နှုန်းနဲ့ ရွာကိုလုံခြုံရေးစောင့်ခိုင်းတယ်။ တစ်လနီးပါလောက်ရှိပြီ။ သူတို့ကို လုံခြုံရေး ပြန်ယူပေးနေရတဲ့ အတိုင်းပဲ”ဟု ၎င်းဆိုပြန်သည်။

ထို့အပြင် ပင်လောင်းမြို့နယ်ရှိ ကျေးရွာဒေသခံများထံ PNO က ခေါင်းစဉ်အမျိုးမျိုးဖြင့် အိမ်ထောင်စုတစ်စုလျှင် ကျပ်ငွေ ၃ သောင်းနှုန်းဖြင့် ငွေကြေး ကောက်ခံမှုများရှိနေကြောင်းသိရသည်။

ပြီးခဲ့သည့် ၂၀၂၅ ခုနှစ်အတွင်းတွင်လည်း ပင်လောင်းမြို့နယ်ရှိ ကျေးရွာအချို့တွင် PNO တပ်သားများ အတွက် ဒေသခံများက နေ့စဉ်ထမင်းထုပ်များ ပို့ဆောင်ပေးခဲ့ရကြောင်း သိရသည်။