သျှမ်းပြည် ဆီဆိုင်မြို့ကို စစ်ကောင်စီမှ တစ်စိတ်တစ်ပိုင်း ပြန်လည်ထိန်းချုပ်ပြီးနောက် စစ်ကောင်စီ တပ်သားတစ်ဦးက စစ်ဘေးရှောင်အမျိုးသမီး ၁ ဦးအား မုဒိမ်းကျင့်ရန်ကြိုးစားခဲ့ကြောင်း သတင်းရရှိသည်။

တိုက်ပွဲကြောင့် တောတွင်းနေရာသို့ ထွက်ပြေးခိုလှုံနေရသည့် စစ်ဘေးရှောင် အမျိုးသမီး ၁ ဦးကို ဧပြီလ ၁၄ ရက်က ဆီဆိုင်မြို့အခြေစိုက် ခမရ ၄၂၃ တပ်ရင်းမှ စစ်ကောင်စီတပ်သား ညီညီနိုင်ဆိုသူက သေဖြန်ဖြင့်ချိန်ပြီး မုဒိမ်းကျင့်ရန် ကြိုးစားခဲ့သည်ဟု ပအိုဝ်းအမျိုးသမီးသမဂ္ဂမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။

“ဟုတ်တယ်။ အခုအမျိုးသမီးကတော့ အခုထောထဲမှာပဲထွက်ပြေးတိမ်းရှောင်နေရတယ်။ ကျန်းမာရေးစစ်ဆေးမှုတွေတော့ မလုပ်ရသေးဘူး” ဟု ပြောသည်။

စစ်ကောင်စီတပ်သား ညီညီနိုင်ဆိုသူသည် သေနတ်ဖြင့်ချိန်၍ ၎င်းနှင့်အတူနေရန် တောင်းဆိုခဲ့ရာ အတူမနေနိုင်ဟုငြင်းဆိုသည့်အတွက် ဦးခေါင်းကိုသေနတ်ဖြင့်ပစ်ဖောက်မည်ဟု ခြိမ်းခြောက်ခဲ့သေးကြောင်း၊ ကာယကံရှင်အမျိုးသမီးက ခမ်းသားငေါဝ်းသတင်းကို ပြောဆိုထားသည်။

ထို့နောက် ထိုအမျိုးသမီးအား တဲပေါ်သို့ခေါ်ဆောင်သွားပြီး တဲပေါ်မှာထိုင်နေသည့် စစ်ဘေးရှောင် အမျိုးသားများကို မောင်းထုတ်နေစဉ် ထိုအမျိုးသမီးက ဖိနပ်ချွတ်၍ပြေးကာ လွတ်မြောက်လာခဲ့ကြောင်း သိရသည်။

ထွက်ပြေးလွတ်မြောက်လာသူ အမျိုးသမီးသည် လက်ရှိတွင်တောတွင်းနေရာသို့ ခိုလှုံနေရပြီး စစ်သားများကို မြင်ပါကကြောက်ရွံ့ခြင်း စိတ်ပိုင်းဆိုင်ရာထိခိုက်ထားကြောင်း သိရသည်။

ဆီဆိုင်မြို့ကို ပအိုဝ်းအမျိုးသားလွတ်မြောက်ရေးတပ်မတော် PNLA၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့များက ဇန်ဝါရီလ ၂၃ ရက်မှစ၍ ထိန်းချုပ်လာပြီးသည့်နောက် စစ်ကောင်စီသည် ယင်းမြို့ကို ပြန်လည်ရရှိဖို့ ဖေဖော်ဝါရီလ ၂၇ ရက်တွင် ပြန်လည်ထိုးစစ်ဆင်ခဲ့ခြင်း ဖြစ်သည်။

၁လကျော်ကြာ ထိုးစစ်ဆင်ပြီးနောက် ဟိုခဲဘုန်းကြီးကျောင်း၊ ဆေးရုံ၊ ဆေးရုံဝန်းထမ်းအိမ်ရာ၊ ရဲစခန်း၊ မွေတော်ဘုရားကုန်း၊ စံဖူးကျေးရွာ၊ ကျောက်ကချား၊ ဘုရားဖြူလမ်းဆုံတို့ကို သိမ်းယူနိုင်ခဲ့ကာ မတ်လ ၂၅ ရက်မှာ ဆီဆိုင်မြို့ကို ပြန်လည်ထိန်းချုပ်နိုင်ခဲ့သည်ဟု စစ်ကောင်စီက ထုတ်ပြန်ထားသည်။

သို့သော် ဆီဆိုင်မြို့ကို အလုံးစုံထိန်းချုပ်ထားနိုင်ခြင်းမရှိသကဲ့သို့ ယင်းမြို့အတွင်း နှစ်ဖက်တပ်ဖွဲ့ တိုက်ပွဲဆက်လက်ဖြစ်ပွားနေသေးကြောင်း PNLO ဘက်ကပြောဆိုထားသည်။