Friday, June 14, 2024

နောင်ချို လေကြောင်းဗုံးကြဲတိုက်ခိုက် အမျိုးသမီး ၂ ဦး အပါအဝင် ၄ ဦးသေဆုံး

Must read

သျှမ်းပြည် နောင်ချိုမြို့နယ်တွင် စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုများအတွင်း အမျိုးသမီး ၂ ဦး အပါအဝင် စုစုပေါင်း ၄ ဦး သေဆုံးခဲ့ကြောင်း စုံစမ်းသိရသည်။

ယမန်နေ့ (ဧပြီလ ၂၁ ရက်) နံနက် ၁၀ နာရီကျော်တွင် သျှမ်း-မန္တလေးနယ်စပ် ပြင်ဦးလွင်နှင့် နောင်ချိုမြို့နယ်ကြားရှိ သရက်ကုန်းကျေးရွာနှင့် အနီးဝန်းကျင် ကျေးရွာများကို စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် အမျိုးသမီး (၂) ဦးနှင့် ဦးပဉ္ဇင်းတစ်ပါး အပါအဝင် စုစုပေါင်း ၄ ဦး သေဆုံးခဲ့ကြောင်း နောင်ချိုမြို့နယ် ဒေသခံများက ပြောသည်။

“မနေ့က လေယာဉ်နဲ့ဗုံးကြဲတာ ကျွဲနှစ်ကောင်နဲ့ အသက် ၂၀ ကျော်အရွယ် ယောကျ်ားလေး ၁ ယောက်သေတယ်။ သပြေကုန်းက အမျိုးသမီး အသက် ၃၀ အောက် ၂ ယောက် သေတယ်။ ၂၀ ရက်နေ့က သရက်ကုန်းဘုန်းကြီးကျောင်း မီးလောင်ပြီးတော့ ဦးပဉ္ဇင်းတစ်ပါး ပျံလွန်သွားတယ်”ဟု နောင်ချိုမြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဧပြီလ ၁၄ ရက်တွင် ပြင်ဦးလွင်မြို့ စစ်တက္ကသိုလ်ကို မန္တလေး-PDF တပ်ဖွဲ့က ရှော့တိုက်ဒုံးဖြင့် ပစ်ခတ်တိုက်ခိုက်ခဲ့ပြီးနောက် ပြင်ဦးလွင်မြို့နှင့် ၈ မိုင်ခန့်သာ ကွာဝေးသော နောင်ချိုမြို့နယ် အစပ်ရှိ သရက်ကုန်းကျေးရွာအခြေစိုက် စစ်ကောင်စီတပ်စခန်းကို ထပ်မံထိုးစစ်ဆင် တိုက်ခိုက်ခဲ့ရာ ဧပြီလ ၁၅ ရက်တွင် သိမ်းဆည်းနိုင်ခဲ့သည်။

၎င်းနောက် ပြင်ဦးလွင်မြို့ စစ်တက္ကသိုလ် DSA/DSTA နှင့် ညောင်ကုန်းရွာတွင် တပ်စွဲထားသည့် စစ်ကောင်စီတပ်မှ လက်နက်ကြီး ပစ်ခတ်မှုနှင့် လေကြောင်းဗုံးကြဲ တိုက်ခိုက်မှုများ အပြင်းအထန် လုပ်ဆောင်လာရာ သရက်ကုန်း၊ ဇာလီနှင့် ပါဟပ်ကျေးရွာ ဘုန်းကြီးကျောင်းများ ထိခိုက်ပျက်စီးပြီး ညောင်တုန်းကျေးရွာလည်း ရွာလုံးကျွတ် နေအိမ်ပျက်စီးသွားကြောင်း သိရသည်။

ထို့အပြင် သရက်ကုန်းနှင့် အနီးပတ်ဝန်းကျင်ရှိ ကျေးရွာ (၁၀) ရွာကျော်မှ ပြည်သူ ၃၀၀၀ ကျော်မှာ စစ်ဘေးလွတ်ရာသို့ ထွက်ပြေးတိမ်းရှောင်နေရပြီး စားနပ်ရိက္ခာ အကူအညီများ လိုအပ်နေကြောင်း ဒေသခံများက ပြောသည်။

“ရွာသားတွေ ကိုယ်လွတ်ရုန်းပြီး ထွက်လာရတော့ ဘုန်းကြီးကျောင်းတွေမှာ တည်းနေတာရှိတယ်၊ တချို့လဲ တဲထိုးပြီး နေတာရှိတယ်။ တစ်ရွာလုံး ထွက်ပြေးရတော့ အစားအသောက် ခက်ခဲတယ်၊ တော်တော်ဒုက္ခရောက်တယ်။ လက်နက်ကြီးလည်း အဆက်မပြတ် ပစ်နေတော့ မီးခိုးလုံးတွေ တလိပ်လိပ် တက်တာတောင် မြင်ရတယ်”ဟု နောင်ချိုမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

စစ်ကောင်စီတပ်က လက်နက်ကြီးနဲ့ လေကြောင်းပစ်ခတ် တိုက်ခိုက်မှုများကြောင့် နောင်ချိုမြို့နယ်အတွင်း သရက်ကုန်း၊ ကံ့ကော်၊ ဇာလီ ဖြူကြောင်၊ ပန်ခံ၊ နားပျန်၊ ညောင်ကုန်း၊ ပါဟက်၊ ဆီဆုံ စသည့် ကျေးရွာများမှ ပြည်သူ ၃၀၀၀ ကျော်မှာ ဘန့်ဘွေး၊ ခြေမြစ်ပင်၊ အင်းဝိုင်း၊ ကုန်းလုံ၊ ကုန်းသာ စသည့် ဘေးလွတ်ရာရှိ ကျေးရွာဘုန်းကြီးကျောင်းများတွင် ထွက်ပြေးတိမ်းရှောင်နေကြောင်း သိရသည်။

“မနေ့တုန်းက ဆမ္မဆယ်ကနေ လှမ်းကြည့်တာ ဂျက်ဖိုက်တာ ၂ စီးနဲ့ ဆက်တိုက်ကို ဗုံးလာကြဲတာ။ ၂၀ ရက်ကစပြီး လေယာဉ်နဲ့ နေ့တိုင်းလာပစ်တာ နေ့ကော ညကော မနားဘူး။ မော်တာ စက်သေနတ်နဲ့ ပစ်လိုက်၊ လေယာဉ်နဲ့ ထပ်လာပစ်လိုက် ၁ မိနစ်ကို ၁၅ လုံးလောက်ကို ကျနေတာ။ ပစ်မှတ်က သရက်ကုန်း၊ ကံ့ကော်၊ ဆမ္မဆယ်၊ ဇာလီ ဒီရွာတွေကို တော်တော်ဖျက်ချင်နေတာ”ဟု နောင်ချိုမြို့နယ်မှ စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဧပြီလ ၈ ရက်နေ့ကလည်း ပြင်ဦးလွင်စစ်တက္ကသိုလ်ကို မန္တလေးတိုင်း (ပကဖ)အဖွဲ့က ၁၀၇ မမ ရှော့တိုက်ဒုံးဖြင့် တိုက်ခိုက်ခဲ့ကြောင်း အမျိုးသားညီညွတ်ရေးအစိုးရ NUG က ထုတ်ပြန်ထားသည်။

လက်ရှိတွင် ပြင်ဦးလွင်မြို့ပေါ်နှင့် အဝင်အထွက်လမ်းမကြီးများတွင် စစ်ကောင်စီတပ်က လုံခြုံရေး စစ်ဆေးတင်းကျပ်လျက်ရှိပြီး မြို့ပတ်လည်တွင်လည်း စစ်အင်အား တိုးမြှင့်ထားကြောင်း ဒေသခံများက ပြောသည်။

Leave a Comments

- Advertisement -spot_img

Latest article