နိုင်ငံရေး ပြဿနာကို တွေ့ဆုံဆွေးနွေးခြင်း နည်းလမ်းဖြင်သာ ဖြေရှင်းနိုင်ရေး ကြိုးပမ်းဆောင်ရွက်သွားမည်ဟု RCSS က ပြောဆိုလိုက်သည်။

အဆိုပါ ပြောဆိုမှုသည် သျှမ်းပြည် ပြန်လည်ထူထောင်ရေး ကောင်စီ (RCSS)၏ ဗဟိုဌာနချုပ် လွိုင်တိုင်းလျန်း တွင် ဇန်နဝါရီ ၂၆ရက်မှ ဇန်နဝါရီ ၂၈ရက်အထိ နှစ်ပတ်လည်အစည်းအဝေးတွင် ဆွေးနွေးခဲ့သည်။

ထိုအစည်းအဝေးတွင် ဌာနအသီးသီးက တင်ပြသည့် တစ်နှစ်တာ လုပ်ငန်းအစီရင်ခံစားများအပေါ် ပြန်လည် သုံးသပ်ဆွေးနွေးခြင်း လက်ရှိနိုင်ငံရေး၊ စစ်ရေး၊ ငြိမ်းချမ်းရေး အခြေအနေများနှင့် အခြားလုပ်ငန်း အခြေအနေ များအား သုံးသပ်ပြီး ရှေ့လုပ်ငန်းစဥ်များကို ချမှတ်ခဲ့သည်။

ထို့အပြင် ပြည်ထောင်စု မြန်မာနိုင်ငံ၏ နိုင်ငံရေး ပြဿနာ ဖြေရှင်းနိုင်ရေး အတွက် RCSS အနေနဖြင့် သက်ဆိုင်ရာ အဖွဲ့အစည်းများနှင့် တွေ့ဆုံညှိနှိုင်းဆွေးနွေးပြီး နိုင်ငံရေး ပြဿနာကို တွေ့ဆုံဆွေးနွေးခြင်း နည်းလမ်းဖြင့် ဖြေရှင်းနိုင်ရေး ကြိုးပမ်းဆောင်ရွက်သွားမည်ဟု ထုတ်ပြန်ချက်တွင် ရေးသားထားသည်။

ဖက်ဒရယ် ဒီမိုကရေစီ ပြည်ထောင်စု တည်ဆောက်နိုင်မှသာ ပြည်ထောင်စု မြန်မာနိုင်ငံ၏ ပြဿနာများကို ဖြေရှင်းနိုင်မည်ဖြစ်ကြောင်း ပြည်ထောင်စု မြန်မာနိုင်ငံ၏ နိုင်ငံရေး ပြဿနာ ဖြေရှင်းနိုင်ရေး အတွက် အာဆီယံ အနေဖြင့် အလေးအနက် ထားပြီး ကြားဝင်ဖြေရှင်းပေးနိုင်ရန် လည်း RCSS က တိုက်တွန်းပြောဆိုထားသည်။

ဆက်လက်ပြီး သျှမ်းပြည် အမျိုးသား စည်းလုံးညီညွတ်ရေး ရေရှည်တည်တံ့ ခိုင်မြဲရန် ကြိုးပမ်းဆောင်ရွက်သွားမည် ဖြစ်ကြောင်း၊ RCSS ထိန်းချုပ်သည့် နယ်မြေအတွင်း မူးယစ်ဆေးဝါး တိုက်ဖျက်ရေး လုပ်ငန်း အွန်လိုင်း ငွေကြေး လိမ်လည်ခြင်း (ကျားဖြန့်)ပိတ်ပင်တားဆီးရေး လုပ်ငန်းနှင့် လူကုန်ကူးမှု တားဆီးရေးလုပ်ငန်းတို့ကို ကြိုးပမ်းဆောင်ရွက် သွားမည် ဟု ထုတ်ပြန်ချက်တွင် ဖော်ပြထားသည်။