အွန်လိုင်းပေါ်မှ တစ်ဆင့် ဈေးရောင်းချသူများသည် ယခုလမှစ၍ မှတ်ပုံတင် လျှောက်ထားရမည်ဖြစ်ပြီး မှတ်ပုံမတင်ဘဲ ဈေးရောင်းချပါက ထောင်ချမည်ဟု စစ်ကောင်စီ ခြိမ်းခြောက်ထားကြောင်း စုံစမ်းသိရသည်။

ပြီးခဲ့သည့် ဇူလိုင် ၂၁ ရက် စစ်ကောင်စီ၏ စီးပွားရေး နှင့် ကူးသန်းရောင်းဝယ်ရေး ဝန်ကြီးဌာနမှ အွန်လိုင်းစနစ်ဖြင့် ရောင်းချခြင်း လုပ်ငန်းကို အရေးကြီး ဝန်ဆောင်မှုလုပ်ငန်းအဖြစ် သတ်မှတ်သည့် အမိန့်ထုတ်လိုက်ခြင်း ဖြစ်သည်။

အဆိုပါ ထုတ်ပြန်သည့်ရက်မှစ၍ ၆ လ အတွင်း မှတ်ပုံမတင်ဘဲ ရောင်းချပါက ထောင်ဒဏ် ခြောက်လမှ အများဆုံး ထောင်ဒဏ် သုံးနှစ်အထိ ချမှတ်ရမည့်အပြင် ကျပ်ငါးသိန်းထက် မပိုသော ငွေဒဏ်လည်း ချမှတ်ခြင်း ခံရသည့် အရေးကြီး ကုန်စည် နှင့် ဝန်ဆောင်မှု ဉပဒေ ပုဒ်မ ၅ အရ အရေးယူမည် ဖြစ်ကြောင်း သိရသည်။

“တကယ်လို့ မှတ်ပုံတင်ရမယ်ဆိုရင်လည်း မတတ်နိုင်ဘူးလေ။ တနိုင်တပိုင် နဲ့ လုပ်ရတဲ့သူတွေအတွက်ဆိုတော့ အဆင်မပြေဘူး။ ကုန်ကျစရိတ်တွေ ပိုကုန်လာမယ်၊ တချို့ အွန်လိုင်းရှော့ သေးသေးလေးတွေ အတွက်တော့ အခက်ခဲ အများကြီး ရှိမှာပေါ့။ အမြတ်တွေလည်း သိပ်မကျန်တော့ဘူးပေါ့ “ ဟု အွန်လိုင်းဈေးရောင်းချသူ အမျိုးသမီး တစ်ဦးက ပြောသည်။

လက်ရှိ စစ်ကောင်စီမှ ထုတ်ပြန်သည့် ထုတ်ပြန်ချက်ထဲ၌ မှတ်ပုံတင်ခြင်း နှင့် ပတ်သက်၍ မည်သည့် နေရာ၊ မည်သည့် ပုံစုံဖြင့် မှတ်ပုံတင် ပြုလုပ်ရကြောင်း အသေးစိတ်ကိုတော့ ဖော်ပြထားခြင်း မရှိသေးပေ။

ထို့အပြင် လူမှုကွန်ရက်စာမျက်နှာပေါ်မှ တစ်ဆင့် အွန်လိုင်း ဈေးရောင်းသူများအတွက် မှတ်ပုံတင်ခြင်း နှင့် ပတ်သက်ပြီး မကြာခင် Online Sales Registration System ဖြင့် ပြုလုပ်ရမည်ဖြစ်၍ မှတ်ပုံတင်ကြေး အနည်းငယ် ပေးဆောင်ရမည်ဖြစ်ကြောင်း ရေးသားဖော်ပြထားသော်လည်း သီးခြား အတည်ပြုနိုင်ခြင်း မရှိပေ။

ယင်းကဲ့သို့ အွန်လိုင်းဈေးရောင်းချသူများ မှတ်ပုံတင်ရန် လိုအပ်သော်လည်း မည်သည့်ပုံစံဖြင့် လုပ်ဆောင်ရမည်ကို အသေးစိတ် မသိရှိရသေး၍ ကြားခံပွဲစားမှ လုပ်ဆောင်ပါက လိမ်လည်ခံရမည်ကို စိုးရိမ်နေကြောင်း အွန်လိုင်းဈေးရောင်းချသူ အမျိုးသမီးတစ်ဦးက ထပ်လောင်းပြောသည်။

“ သူတို့က အွန်လိုင်းဈေးရောင်းသူတွေ လိုင်စင်လုပ်ရမယ်ပြောတယ်။ ဘယ်နေရာ၊ ဘယ်လိုပုံစံ လုပ်ရမယ် မပြောဘူး။ အခု အွန်လိုင်း လုပ်တဲ့သူအတွက်က လုပ်ကောင်း၊ မလုပ်ကောင်း ဖြစ်နေတယ်။ ပြီးရင်နောက် ၆ လနေရင် လူလိမ်တွေက လိုက်မေးတော့မယ်။ “ အစ်မမှတ်ပုံတင်ထားလား၊ ကျနော်က မှတ်ပုံတင်ရုံးကပါ “ ဆိုပြီး လိုက်လိမ်တော့မယ်။ အဲ့ကြောင့် သူတို့ကနေပြီး စနစ်တကျ တရားဝင် ကြေညာပေးဖို့လိုတယ် “ ဟု ၎င်းအမျိုးသမီးက ပြောသည်။

အလားတူ ဈေးဆိုင်ဖွင့်လှစ်ပြီး ရောင်းချသူများက မြို့နယ်စည်ပင်သာယာရေးထံ တစ်နှစ်ကို ကျပ်ငွေ ၂၅,၀၀၀ အထိ အခွန်ပေးဆောင်ရကြောင်းလည်း သိရသည်။

ကိုဗစ် နှင့် အာဏာသိမ်းမှုကြောင့် မြန်မာနိုင်ငံတွင် စီးပွားရေး ကျဆင်းလာကာမှ ပြည်သူတချို့သည် စီးပွားရေးအဖြစ် သော်လည်းကောင်း၊ တပိုင်တနိုင်အဖြစ် သော်လည်းကောင်း အွန်လိုင်းဖြင့် ဈေးရောင်းချရာ မှတ်ပုံတင်ရမည်ဆိုပါက ကုန်ကျစရိတ် ပိုများလာနိုင်ပြီး အကျိုးအမြတ်အပေါ် ထိခိုက်လာမည်ကို စိုးရိမ်နေကြသည်။