သျှမ်းပြည် မူဆယ်မြို့နယ်၊ ကောင်းထိုလင် တောင်ကုန်းရှိ စိန်ကျော့ပြည်သူ့စစ် တပ်စခန်းဟောင်းမှ စခန်းစောင့်များ ပစ်ခတ်တိုက်ခိုက်ခံရပြီး တစ်ဦးသေ တစ်ဦး ဒဏ်ရာရသွားကြောင်း စုံစမ်းသိရသည်။
ပြီးခဲ့သည့် ဇူလိုင်လ ၂၃ ရက် နံနက်ပိုင်းတွင် မူဆယ်မြို့နယ် ကောင်းဆာကျေးရွာ နှင့် တစ်မိုင်ခန့် ကွာဝေးသည့် ကောင်းထိုလင် တောင်ကုန်းမှ စိန်ကျော့ပြည်သူ့စစ် တပ်စခန်းဟောင်း အစောင့် ၃ ဦးကို လက်နက် ကိုင်တပ်ဖွဲ့က ဝင်ရောက် ပစ်ခတ်လိုက်ခြင်း ဖြစ်ကြောင်း ဒေသခံများက ပြောသည်။
“အဲ့စခန်းက အစောင့်လေး ၃ / ၄ ယောက်လောက်ပဲ ရှိတာ။ အဲ့စခန်းက စိန်ကျော့ ပြည်သူ့စစ် တပ်စခန်း ဖြစ်ခဲ့ဖူးပေမယ့် လူအများကြီး မနေတာ ကြာသွားပြီ၊ ပစ်ခတ်မှုတွေက ခဏလေးပါပဲ။ အသံတွေလည်း မကျယ်ဘူး။ တပ်စောင့်တဲ့ ကြီးကြပ်သူ တစ်ဦးက ပခုံးမှာ ဒဏ်ရာရတယ်။ နောက်ထပ် တစ်ယောက်ကတော့ သေသွားတယ်” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ထိခိုက်ဒဏ်ရာ ရသူသည် စိုင်းဆန်အိုက် ဆိုသူ ဖြစ်ပြီး သေဆုံးသွားသူသည် နောင်မွန်ကျေးရွာနေ စိုင်းအိုက်မြတ် ဖြစ်ကြောင်းလည်း သိရသည်။
အဆိုပါ ပစ်ခတ်မှုသည် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်ဖွဲ့မှ လာရောက်ပစ်ခတ်သည်ဟု ဒေသခံများက ပြောဆိုသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိပေ။
အလားတူပင် ယမန်နေ့ ဇူလိုင်လ ၂၄ ရက်နေ့ ည ၁၁ နာရီဝန်းကျင် အချိန်တွင် မူဆယ်မြို့ပေါ် အထက (၄) အနီးတွင် အမည်မသိ လက်နက်ကိုင် အဖွဲ့အစည်းမှ ထောင်ထားသည့် ဗုံးတစ်လုံး ပေါက်ကွဲမှု ဖြစ်ပွားခဲ့ကြောင်းလည်း သိရသည်။
“အခုတလော မူဆယ်မြို့နယ်အတွင်းမှာ ဆူပူမှုတွေ ဆက်တိုက်ဖြစ်နေတယ်။ ဟိုနေရာမှာ တိုက်ပွဲဖြစ်၊ ဒီနေရာမှာ ပေါက်ကွဲမှုဖြစ် နဲ့ ရှေ့ဆင့်နောက်ဆင့်တွေ ဖြစ်ကြတာပဲ။ အမက (၄) အနီး၊ ဖူဆယ်ကွင်း အနီးပေါက်မှုက ထိခိုက်မှုကိုတော့ မသိရသေးဘူး” ဟု မူဆယ်မြို့ဒေသခံ တစ်ဦးက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ ဇူလိုင်လ (၂၄) ရက်နေ့ ည ၁၁ နာရီမှ ယနေ့ ဇူလိုင်လ (၂၅) မနက် ၄ နာရီအထိ မူဆယ်မြို့ အခြေစိုက် နှင့် ၁၀၅ မိုင် အခြေစိုက် စစ်ကောင်စီတပ်များမှ လက်နက်ကြီးများ ရမ်းသမ်းပစ်ခတ်မှု ပြုလုပ်ခဲ့ ကြောင်းလည်း သိရသည်။
အဆိုပါ လက်နက်ကြီးများ ရမ်းသမ်းပစ်ခတ်မှုကြောင့် ပြည်သူ့နေအိမ်များ ထိခိုက်ပျက်စီးမှုများရှိနေသော်လည်း စာရင်း အတိအကျကို သျှမ်းသံတော်ဆင့်မှ ဆက်လက် စုံစမ်းနေဆဲဖြစ်သည်။
ပြီးခဲ့သည့် ဇူလိုင်လ ၂၃ ရက်နေ့တွင် ညနေပိုင်းတွင် မူဆယ်မြို့၊ စယ်လန့်ကျေးရွာအနီး အာဏာသိမ်း စစ်ကောင်စီ လက်အောက်ခံ ပြည်သူ့စစ်တပ်ဖွဲ့ နှင့် TNLA တပ်ဖွဲ့တို့ ထိတွေ့ တိုက်ပွဲဖြစ်ပွားခဲ့ပြီး စစ်ကောင်စီတပ်မှ လက်နက်ကြီးဖြင့် ပစ်ကူမှုကြောင့် စယ်လန့်ကျေးရွာမှ နေအိမ် ၂ လုံးလည်း လက်နက်ကြီးထိ ပျက်စီးရသည်။
ဂျီနီဗာကော ဥပဒေ အရ လက်နက်ကိုင်တပ်ဖွဲ့များ အနေဖြင့် ကျေးရွာအနီး ပစ်ခတ်တိုက်ပွဲပြုလုပ်မှု၊ လူနေအိမ် ကျေးရွာများအတွင်း ဝင်ရောက်စခန်းချ နေထိုင်မှုနှင့် ပြည်သူနေအိမ်များထိခိုက်ပျက်စီးအောင် လက်နက်ကြီး/ငယ်များ ပစ်ခတ်မှုတို့ ပြုလုပ်ခွင့် တားမြစ်ထားကြောင်းလည်း သိရသည်။
Leave a Comments