“ သက်ငယ်မုဒိမ်းကျူးလွန်တဲ့သူ ဖမ်းမိပြီး၊ ပြန်လွှတ်သွားတယ်”
ပြီးခဲ့သည့် မေ ၇ ရက်တွင် သျှမ်းပြည်တောင်ပိုင်း ရွာငံမြို့နယ် တပင်ပျော်ကျေးရွာနေ အသက် ၁၄နှစ် အရွယ်ရှိ မဖြူ(အမည်လွှဲ)ကို အသက် (၄၀)အရွယ်ရှိ မောင်တူးက သက်ငယ်မုဒိမ်းကျူးလွန်ခဲ့သည်။
ဖြစ်စဉ်မှာ အသက် (၁၄)နှစ်အရွယ် မဖြူသည် တောထဲရှိ လက်ဖက်ခြံသို့ လက်ဖက်ခူးရန် သွားနေစဉ် တရွာတည်း နေသည့် မောင်တူးက နောက်ယောင်ခံလိုက်ကာ တောထဲ၌ မုဒိမ်းကျင့်ခဲ့ကြောင်း ဖြစ်စဉ်သိရှိသည့် ရွာငံမြို့နယ် တပင်ပျော်ကျေးရွာနေ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။
“ ခြံကို ကလေးမက သွားနေတုန်း တရွာတည်းနေတဲ့ မောင်တူးက နောက်ယောင်ခံပြီး တောထဲမှာ မုဒိမ်းကျင့်တာ၊ ပြီးတော့ ရိုက်နှက်ခဲ့တယ်” ဟု ဖြစ်စဉ်ကို သိရှိသည့် အမျိုးသမီးက ဆိုသည်။
မုဒိမ်းကျူးလွန်သည်ဟု မောင်တူးကို ရွာငံမြို့နယ် ရဲတပ်ဖွဲ့က ဖမ်းဆီးနိုင်ခဲ့ပြီး၊ ရဲစခန်းတွင် ၎င်းကျူးလွန်ခဲ့ကြောင်း ဝန်ခံခဲ့သည်။
သို့သော် မောင်တူးကို ရဲတပ်ဖွဲ့များနှင့် ရွာငံမြို့ ဆေးရုံမှ ဆေးဝန်ထမ်းများက ၎င်းကို စစ်ဆေးနေစဉ် ထွက်ပြေး လွှတ်မြောက်သွားသည်။
“ မုဒိမ်းကျင့်တဲ့သူ လွှတ်မြောက်နေတယ်။ အဲ့နေ့က ဆေးရုံမှာ ရဲတွေ ဆရာမတွေက စစ်ဆေးမှုပြုလုပ်နေတုန်း ထွက်ပြေးသွားတာ။ မဖြူရဲ့ ခန္ဓာကိုယ်တခုလုံး ညိုမဲနေတယ်။ ပြီးတော့ အသက်ငယ်တော့ ငိုပဲငိုနေတယ်” ဟု ၎င်းအမျိုးသမီးကဆိုပြန်သည်။
လက်ရှိ အချိန်ထိ မုဒိမ်းကျူးလွန်သည့် မောင်တူးသည် ယနေ့ထိထွက်ပြေးလွှတ်မြောက်နေသဖြင့် ရွာငံမြို့နယ်ရဲစခန်းမှ ၎င်း၏ မိသားစုဝင်ဖြစ်သည် ဇနီးနှင့် အသက် (၈)နှစ်အရွယ်ရှိ သမီးဖြစ်သူကို ရဲစခန်းတွင်ထိန်းသိမ်းထားကြောင်း သိရသည်။
ထို့ပြင် မောင်တူးသည် တပင်ပျော်ကျေးရွာတွင် နှစ်ပေါင်း ၂၀ ဝန်းကျင် နေထိုင်ခဲ့ပြီး ကျူးလွန်ခံရသူ မဖြူ၏ မိသားစုများနှင့် ရင်းနှီးမှု ရှိကြသည်။
“မုဒိမ်းမှုကျူးလွန်သူကို တွေ့အောင် ဖမ်းမိအောင် ရှာပြီး ပြစ်ဒဏ်ပေးဖို့လိုအပ်တယ်။ မဟုတ်ရင် မဖြူအတွက် အန္တရာယ်များတယ်။ မလုံခြုံဘူး။ အခုထိ မရှာနိုင်တာတော့ စဉ်းစားစရာပဲ” ဟု တပင်ပျော်ကျေးရွာ က ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
အဆိုပါ မုဒိမ်းမှုကျူးလွန်သူသည် တောထဲတွင် သစ်များခုတ်ကာ ရောင်းချသူဖြစ်သဖြင့် တောတောင် ကျွမ်းကျင်သူ ဖြစ်ကြောင်းလည်း ၎င်းအမျိုးသားက မှတ်ချက်ပြုသည်။
ရွာငံမြို့နယ်သည် စစ်အာဏာသိမ်းပြီးနောက်ပိုင်း အမျိုးသမီးများ၏ လုံခြုံရေးသည် အလွန်ပင်စိုးရိမ်လာကြောင်း၊ အမျိုးသမီးများ ရုပ်ပိုင်းဆိုင်ရာ၊ စိတ်ပိုင်းဆိုင်ရာ အဓမ္မပြုကျင့်ခံရလျှင်လည်း မပြောရဲသည့် အနေအထား ဖြစ်နေကြောင်း ဓနုအမျိုးသမီးအရေးလှုပ်ရှားသည့် သူက သျှမ်းသံတော်ဆင့်ကိုပြောသည်။
“ အခုနောက်ပိုင်း အမျိုးသမီးအတွက် ဘယ်နေရာမှ မလုံခြုံပါဘူး။ နောက် တကယ်လို့ ကိုယ်က အဓမ္မပြုကျင့်ခံ ရတာတွေ ဆိုရင်လည်း အသံမထွက်ရဲတဲ့အချိန် အမျိုးသားတချို့က ဒါကို အခွင့်ကောင်းယူပြီး ပိုအနိုင်ကျင့် လာကြတယ်” ဟု ၎င်းကဆိုပြန်သည်။
လက်ရှိ တရားဥပဒေစိုးမိုးမှု အားနည်းနေသည့်အချိန် နယ်မြေ အနေအထားမငြိမ်းချမ်းသည်အနေအထားကို အခွင့်ကောင်းယူပြီး သက်ငယ်မုဒိမ်းကျူးလွန်နေကြောင်း ၎င်းက ပြောသည်။
“ အခုက အမျိုးသမီးတွေအတွက် ကလေးတွေအတွက် တရားဉပဒေစိုးမိုးမှု ကမရှိတဲ့အချိန်ကို အခွင့်ကောင်းယူပြီး မုဒိမ်းကျူးလွန်တယ်လို့မြင်တယ်။ အရင်က ရွာငံမှာ မုဒိမ်းမှုဆိုတာ မကြားဖူးဘူး၊ အခုဆိုရင် ညမှောင်ရင် အိမ်သာတောင် မသွားရဲတော့ဘူး” ဟု ဓနုအမျိုးသမီးအရေး ဆောင်ရွက်သူက ဆိုသည်။
ယခုလက်ရှိ ရွာငံမြို့နယ်တွင် စစ်ကော်မရှင်လက်အောက်ခံ ပျူစောထီးနှင့် PDF များကြားလည်း အပြန်အလှန် သတ်ဖြတ်မှုများမကြာခဏရှိသည့် ဒေသတစ်ခုဖြစ်သည်။
Leave a Comments