သျှမ်းပြည်တောင်ပိုင်း၊ ရွာငံမြို့နယ် ပွေးနဖားကျေးရွာတွင် ဦးဇင်းတစ်ပါး ထပ်မံ အသတ်ခံရကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် ဇူလိုင်လ (၂၀) ရက်တွင်  ရွာငံမြို့နယ် ပွေးနဖားကျေးတွင် အမည်မသိ လက်နက်ကိုင် အဖွဲ့မှ ဦးဇင်းတစ်ပါးကို စစ်ဆေးမေးမြန်း စရာရှိသည်ဟု ခေါ်ဆောင်သွားပြီး ဇူလိုင်လ (၂၁) ရက် နံနက်ပိုင်းတွင် ဉီးဇင်း၏ ရုပ်အလောင်းကို  ပွေးနဖား- နွားဘန်းကြီး သွားလမ်းတွင် ပြန်တွေ့ခဲ့ကြောင်း ဖြစ်စဉ်ကို သိရှိသည့် ဉီးလုံးက သျှမ်းသံတော်ဆင့်ကိုပြောသည်။ 

အဆိုပါ ဦးဇင်း၏ ရုပ်အလောင်းတွင်  ဓားဒဏ်ရာနှင့် သေနတ်ဒဏ်ရာများ တွေ့ရှိခဲ့ပြီး လမ်းမကြီးပေါ်တွင် မှောက်လျှက် အနေထားဖြင့် သေဆုံးနေသည်ကို တွေ့ရှိရကြောင်း ဉီးလုံးက ပြောသည်။

“ အဲ့ဉီးဇင်းက တကယ်တော့ ဟန်ဆောင်ပြီး သူ့အပြစ်တွေလွတ်အောင် သင်္ကန်းခြုံထားတာ။ တကယ်တော့ သူက လူသတ်တယ်။ မုဒိမ်းကျင့်တဲ့သူပါ။ သင်္ကန်းခြုံတာ မကြာသေးဘူး” ဟု ၎င်းက ဆိုပြန်သည်။ 

အဆိုပါ ဦးဇင်းဝတ်ဖြင့် အသတ်ခံရသူမှာ (ကိုဂေါ်လီ)ဟု ခေါ်ဆိုပြီး ဦးဇင်းဝတ် ဘွဲ့နာမည်မှာ (ဦးဝိလာသ)  ဖြစ်ကြောင်း ၎င်းအမျိုးသားက ပြောသည်။

အသတ်ခံရသူ ဦးဇင်းသည် ၎င်း၏ အပြစ်များကို ဖုံးကွယ်ရန် ရွာမှ ရှောင်ပြေးပြီး ရွာငံမြို့နယ် မြသိန်းတန် ကျေးရွာတွင် ဦးဇင်းဝတ်နေခြင်း ဖြစ်ကြောင်းနှင့် ပွေးနဖားကျေးရွာသို့ အလည်ပြန်စဉ် ယခုကဲ့သို့ ခေါ်ယူ အသတ်ခံခဲ့ရကြောင်း သိရသည်။

ထိုသို့ ဦးဇင်းဝတ်နေစဉ်အတွင်း တော်လှန်ရေးတပ်ဖွဲ့များထံမှ သတိပေးစာ နှစ်ကြိမ်တိတိ ရဖူးကြောင်းနှင့် စစ်ကော်မရှင်တပ်နှင့်လည်း ပူးပေါင်းဆောင်ရွက်မှုများလည်း ရှိကြောင်း သိရသည်။ 

“ဦးဇင်းအလောင်းကို တွေ့တော့ ရွာငံမြို့ ဆေးရုံကို ခေါ်သွားကြတယ်၊ စစ်တပ်ကလည်း သူတို့နဲ့ အနီးနားမှာ ဖြစ်တော့ စစ်ကြောင်းတွေ တောက်လျှောက် သွားနေတယ်၊ စစ်ဆေးမှုတွေက တင်းကြပ်ရင်း တင်းကြပ်နေတယ်၊ ပြည်သူတွေလည်း သတိထားသွားလာဖို့ လိုတယ်။”ဟု ရွာငံ မြို့ခံ အမျိုးသားတစ်ဦးက ပြောသည်။

ယခုဖြစ်စဉ်သည် ပွေးနဖား-နွားဘန်းကြီး လမ်းနှင့် ရွာငံမြို့ စစ်တပ်ဂိတ်နေရာသည် ဆယ်မိုင်ခန့်သာ ကွာဝေးကြောင်း သိရသည်။

ပြီးခဲ့သည့် ဇူလိုင်လ (၁၄)ရက် ရွာငံမြို့ ညောင်ပင်ခွ ကျေးရွာဘက်တွင်လည်း ဓနုတိုင်းရင်းသားလူမျိုးများ ဒီမိုကရေစီ ပါတီဝင် တစ်ဦးနှင့် အရပ်သားတစ်ဦး အသတ်ခံခဲ့ရသည်။

ယခုလက်ရှိ ရွာငံမြို့နယ်တွင် စစ်ကော်မရှင်တပ်နှင့် တိုင်းရင်းလက်နက်ကိုင်များ နယ်မြေစိုးမိုးထားပြီး အုပ်ချုပ်‌ရေးမှူးများ၊ ဒလန်များ၊ ပျူစောထီးများ အပါဝင် အရပ်သားများ အသတ်ခံရမှု မကြာခဏ ဖြစ်ပေါ်နေသည်။