ကျောက်မဲမြို့အတွင်းသို့ ၂ နှစ်နီးပါး စစ်ဘေးတိမ်းရှောင်လာသည့် စစ်ရှောင် (၅) ထောင်ကျော်မှ စစ်ရှောင် (၄၀၀) ကျော် နေရပ်ပြန်သွားကြောင်း စုံစမ်း သိရသည်။
အဆိုပါ စစ်ရှောင်များသည် ပြီးခဲ့သည့် မေလမှ စတင်ပြီး လက်ရှိချိန်ထိ နေရပ်သို့ ပြန်သွားသည့် စစ်ရှောင် (၄၀၀) ကျော်၊ အိမ်ခြေ (၁၃၉) အိမ် နှင့် ရွာပေါင်း (၁၀) ကျော် နေရပ်သို့ ပြန်သွားကြောင်း သိရှိရသည်။
“လက်ရှိချိန်ထိ နေရပ်ပြန်လာတဲ့ သူတွေ အားလုံးကျေးရွာ ၄ အုပ်စုရှိတယ်။ ရွာပေါင်းက (၁၂) ရွာ နေရပ်ပြန်သွားတဲ့ သူတွေကို ဒေသတွင်း အာဏာပိုင်တွေက ဆန်၊ ဆီ၊ ဆား နဲ့ ဟင်းချိုမုန့် တွေကို ကူညီထောက်ပံ့ ပေးနေတာရှိပါတယ်” ဟု ဒေသတွင်း အာဏာပိုင် တစ်ဦး က သျှမ်းသံတော်ဆင့် ကိုပြောသည်။
နေရပ်ပြန်သွားသည့် ကျေးရွာများသည် ချုံးဟောင်းကျေးရွာအုပ်စု၊ ဟူးဆွန်ကျေးရွာအုပ်စု၊ လွယ်ကုံကျေးရွာအုပ်စု နှင့် ပုံးလုံကျေးရွာအုပ်စု တို့ဖြစ်သည်။
“အခု ပြန်သွားတဲ့ စစ်ရှောင်တွေက စားဝတ်နေရေးအတွက် အခက်ခဲ တအားဖြစ်နေတယ်။ မြို့ထဲနေရင်လဲ အိမ်ငှားခတွေက စျေးကြီးပြီး ပေးရတယ်။ တစ်လကို ၃ သောင်းကနေ ၁ သိန်း အထိ ပေးရတယ်။ တအား ခက်ခဲလို့ ကျမတို့ နေရပ်ကို ပြန်လာကြတာ” ဟု စစ်ရှောင် အမျိုးသမီး တစ်ဦး ကပြောသည်။
၂၀၂၁ ခုနှစ်ကတည်းကစပြီး သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ်ဖြစ်တဲ့ တအာင်း (ပလောင်) အမျိုးသားလွတ်မြောက်ရေးတပ်မတော် TNLA နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့သည် ကျောက်မဲမြို့နယ်အတွင်း တိုက်ပွဲပြင်းထန်စွာ ဖြစ်ပွားပြီးနောက် စစ်ရှောင် (၅,၃၇၆) ဦး နေရပ်သို့ စွန်ခွာထွက်ပြေး တိမ်းရှောင်ခဲ့ရသည်။
ထိုနေရပ် စွန့်ခွာထွက်ပြေးသည့် စစ်ရှောင် (၅,၃၇၆) ဦးထဲက စစ်ရှောင် (၅၀၀) ကျော်သည် သျှမ်းပြည်တောင်ပိုင်း ဟိုပုံးမြို့နယ်အတွင်းသို့ ထွက်ပြေး တိမ်းရှောင်လာခဲ့ကြသည်။
ထို စစ်ရှောင် ၅ ထောင်ကျော်သည် အိမ်ထောင်စုပေါင်း (၁,၂၅၉) ၊ အမျိုးသား (၂,၃၉၁) ဦး နှင့် အမျိုးသမီး (၂,၉၈၅) ဦး တို့ဖြစ်ကြသည်။
Leave a Comments