သျှမ်းပြည်တောင်ပိုင်း ပင်လောင်းမြို့နယ် ဆောင်းပြောင်းကျေးရွာသို့ နေရပ်ပြန် ဒေသခံများသည့် မြေမြှုပ်မိုင်းများကြောင့် စိုက်ပျိုးရေးလုပ်ငန်း ပြန်မလုပ်နိုင်သေးကြောင်း စုံစမ်းသိရသည်။
ဆောင်းပြောင်းကျေးရွာသည် ပြီးခဲ့သည့် ၂၀၂၄ ခုနှစ်အတွင်း စစ်ကော်မရှင်တပ်၊ ပအိုဝ်းပြည်သူ့စစ် (PNO) နှင့် ကရင်နီတော်လှန်ရေး တပ်ပေါင်းစုတို့ တိုက်ပွဲများ ဖြစ်ပွားခဲ့ခြင်းကြောင့် ဒေသခံများ ထွက်ပြေး တိမ်းရှောင်ခဲ့ရသည်။
သို့သော် ၂၀၂၅ ခုနှစ် ဇွန်လတွင် တိုက်ပွဲများ ငြိမ်သက်သွားသဖြင့် နေရပ်သို့ပြန်ခဲ့ကြသည်။
ထို့ပြင် ဆောင်းပြောင်းကျေးရွာအတွင်း တိုက်ပွဲကြောင့် ပျက်စီးမှုများခဲ့ပြီး တောင်ယာ နှင့် စိုက်ပျိုးရေးခြံအချို့တွင် မြေမြုပ်မိုင်းများကျန်ရှိနေပြီး ဒေသခံအချို့ စိုက်ပျိုးရေးလုပ်ငန်း ပြန်မလုပ်နိုင်သေးကြောင်း ဆောင်းပြောင်းကျေးရွာဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြန်ရောက်နေတာ တစ်နှစ်ပြည့်တော့မယ်။တားမြစ်ထားတဲ့ နေရာတွေ မြေမြုပ်မိုင်းရှိလို့ တောင်ယာမလုပ်နိုင်တာလည်း ရှိတယ်။မြေမြုပ်မိုင်းမရှိလောက်တဲ့ ရွာအနီးအနားလောက်မှာတော့ တောင်ယာလုပ်နေကြတယ်။မလုပ်ရင် စားဖို့မရှိကြဘူး။မြေမြုပ်မိုင်းမရှိတဲ့ အကွက်တွေဖက်မှာပဲ စိုက်ပျိုးကြတာပါ။”ဟု ဆောင်းပြောင်းကျေးရွာဒေသခံ အမျိုးသားတစ်ဦးကပြောသည်။
အဆိုပါ ဆောင်းပြောင်းကျေးရွာ အနီးအနားရှိ တောင်ယာအတွင်းကျန်ရှိနေသေးသည့် မြေမြုပ်မိုင်းကို ယခုအချိန်ထိ တာဝန်ရှိသူများ လာရောက်ဖြေရှင်ပေးခြင်း မရှိကြောင်း ၎င်းကပြောသည်။
တိုက်ပွဲကြောင့် (၂) နှစ်ကျော်ကြာ စစ်ရှောင်ရသည့်အတွက် ဆောင်းပြောင်းကျေးရွာဒေသခံများ ပြန်လည် ရောက်ရှိသော်လည်း နေအိမ်ပြန်လည်းထူထောင်ခြင်း နှင့် စိုက်ပျိုးရေးလုပ်ငန်း လုပ်ကိုင်ရန် အခက်အခဲရှိနေကြောင်း သိရသည်။
“ရွာကိုပြန်ရောက်တာကြာလို့လည်း စိုက်ပျိုးရေးပြန်မလုပ်နိုင်ကြသေးဘူး။စိုက်ပျိုးရမဲ့ အချိန်မှာ စစ်ပြေးရတယ် (၂) နှစ်ဆက်တိုက်ရှိပြီ။ ဆောင်ပြောင်းက စိုက်ပျိုးရေးကို အဓိကလုပ်တာ။ အဲ့တာ မလုပ်ခဲ့ရတော့ ပြန်လုပ်ဖို့ကအစစအရာရာ ခက်ခဲတာပေါ့။စားဝတ်နေရေး အတွက်တောင် အဘက်ဘက်ကနေ ကူညီကြလို့နည်းနည်းအဆင်ပြေနေတာ။”ဟု ၎င်းအမျိုးသားက ထပ်လောင်းပြောသည်။
ယခင် ဆောင်းပြောင်းကျေးရွာသည် ဇွန်လ ၊ ဇူလိုင်လတို့တွင် စိုက်ပျိုးရေးကို စတင် လုပ်ကိုင်ကြပြီး၊ ရေရှားပါးမှုကြောင့် တောင်ယာစပါး အဓိကထားစိုက်ကာ ပြောင်း နှင့် ဆီထွက်သီနှံများကို စိုက်ပျိုးကြကြောင်း သိရသည်။
ဆောင်းပြောင်းကျေးရွာတွင် အိမ်ခြေ (၆၀၀) ကျော်ရှိပြီး တိုက်ပွဲများဖြစ်ပွားခဲ့ခြင်းကြောင့် နီးစပ်ရာ ကျေးရွာအပြင် ပင်လောင်းမြို့ နှင့် တောင်ကြီးမြို့ပေါ်အထိထွင်ပြေးတိမ်းရှောင်ခဲ့ကြရသည်။
ပြီးခဲ့သည့် ၂၀၂၅ ခုနှစ်အတွင်း ကျေးရွာအတွင်း တိုက်ပွဲများ ပြင်းထန်စွာ ဖြစ်ပွားခဲ့ပြီး လက်နက်ကြီးကြောင့် မီးလောင်ခဲ့ရသည့် နေအိမ် ၅၀ ဝန်းကျင်ရှိပြီး စာသင်ကျောင်းနှင့် ဘုန်းကြီးကျောင်းတို့လည်း ထိခိုက်ပျက်စီးမှုရှိကြောင်း သိရသည်။
ပင်လောင်း – ဆောင်းပြောင်း – ဖယ်ခုံ လမ်းတကြောသည် စစ်ကော်မရှင်တပ် နှင့် ပအိုဝ်းပြည်သူ့စစ် (PNO) တို့ထိန်းချုပ် သွားလာမှုရှိသော်လည်း၊ ဖယ်ခုံမြို့ နောက်ခြမ်းတွင် စစ်ကော်မရှင်တပ်တို့ နှင့် ကရင်နီတော်လှန်ရေးတပ်ပေါင်းစုတို့ နေ့စဉ်နီးပါး ထိတွေ့ တိုက်ပွဲဖြစ်ပွား နေကြောင်း သိရသည်။
Leave a Comments