သျှမ်းပြည် လားရှိုးမြို့နယ် မိုင်းကျက်ကျေးရွာမှ ကိုရင်လေးတစ်ပါးသည် မပေါက်ကွဲသေးသည့် မြေမြှုပ်မိုင်းဆော့ကစားရင်း ပေါက်ကွဲမှုဖြစ်ပွားပြီး သေဆုံးသွားကြောင်း စုံစမ်းသိရသည်။
ယမန်နေ့ (မေလ ၂ ရက်) နံနက် ၆ နာရီခွဲခန့်တွင် လားရှိုးမြို့နယ် မိုင်းကျက်ကျေးရွာရှိ ဘုန်းကြီးကျောင်းမှ အသက် (၁၄)နှစ်အရွယ်ရှိ ရှင်ကုမာရ သည် အုတ်ခဲသွားသယ်နေစဉ် မပေါက်ကွဲသေးသည့် မြေမြှုပ်မိုင်းကို ကောက်ယူလာပြီး လက်တွန်းလှည်းတွင် ထုခွဲကစားကြည့်ရာမှ ပေါက်ကွဲ၍ ပွဲချင်းပြီးသေဆုံးသွားခဲ့ကြောင်း မိုင်းကျက်ဒေသခံများက ပြောသည်။
“ကိုရင်လေးနဲ့ ရွာသားနှစ်ယောက်က အုတ်ခဲသွားသယ်ကြတာ၊ ကိုရင်က မိုင်းတွေ့ပြီး လက်တွန်းလှည်းမှာ လာထုကြည့်တော့ ပေါက်ကွဲပြီး အဲ့မှာတင် ပွဲချင်းပြီး ဆုံးသွားတယ်။ မိုင်းစက စိုင်းခမ်းကိုလည်း မှန်ပြီးတော့ ဒဏ်ရာပြင်းထန်တော့ လားရှိုးဆေးရုံကို ပို့ထားရတယ်၊ နောက်တစ်ယောက်ကတော့ ဒဏ်ရာမပြင်းဘူး”ဟု မိုင်းကျက်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မပေါက်ကွဲသေးသည့် မြေမြှုပ်မိုင်းကို ယူဆော့ကစားရာမှ ပေါက်ကွဲပြီး သေဆုံးသွားခဲ့ရသည့် ရှင်ကုမာရ ၏ ရုပ်အလောင်းကို ယမန်နေ့ (မေလ ၂ ရက်) တွင် သင်္ဂြိုဟ်ပေးခဲ့ပြီးဖြစ်ကြောင်း သိရသည်။
မိုင်းစထိမှန်ပြီး ဒဏ်ရာပြင်းထန်ခဲ့သည့် စိုင်းခမ်းသည် လားရှိုးမြို့နယ် လွယ်မွမ်းကျေးရွာမှ မိုင်းကျက်ဘုန်းကြီးကျောင်းသို့ ပန်းရံလုပ်ရန် လာရောက်ခြင်းဖြစ်ပြီး လက်ရှိတွင် လားရှိုးဆေးရုံသို့ ဆေးဝါးကုသရန် ပို့ဆောင်ထားကြောင်း မိုင်းကျက်ဒေသခံများက ပြောသည်။
“စစ်ဆင်ရေးပြီးသွားတော့ မိုင်းကျက်ဒေသတဝိုက်မှာ မြေမြှုပ်မိုင်း အများကြီး ကျန်ခဲ့တယ်။ ဘုန်းကြီးကျောင်း၊ ဇရပ်နဲ့ စာသင်ကျောင်းတွေနားမှာ မပေါက်ကွဲသေးတဲ့ မိုင်းတွေကော၊ လက်နက်ကြီးတွေကော အများကြီး ရှိသေးတယ်။ ရွာသားတွေကတော့ ကြောက်လို့ မသွားရဲဘူး၊ ဘယ်အဖွဲ့မှလည်း လာမဖြုတ်ပေးသေးဘူး”ဟု မိုင်းကျက်ဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် မတ်လ ၂၃ ရက်က မိုင်းကျက်ကျေးရွာ ဘုန်းကြီးကျောင်းတွင် ‘ဝ’တပ်ဖွဲ့ UWSA မှ ရွာသားများကို အစည်းအဝေး ခေါ်ယူတွေ့ဆုံ၍ ပြန်လည်ထူထောင်ရေး ကိစ္စရပ်များအတွက် ပြောဆိုခဲ့သော်လည်း တိုက်ပွဲအတွင်း ထိခိုက်ပျက်စီးမှုများကို တာဝန်ယူမည့်အကြောင်း မပြောဆိုခဲ့ကြောင်း ဒေသခံများထံမှ သိရသည်။
အလားတူ မတ်လဆန်းမှ စတင်ပြီး လားရှိုးမြို့နယ်ရှိ ညီနောင်မဟာမိတ် ၃ ဖွဲ့က သိမ်းပိုက်ထိန်းချုပ်ထားသည့် မိုင်းကျက်ကျေးရွာအုပ်စုတွင် ‘ဝ’တပ်ဖွဲ့ UWSA က ပြန်လည်ထူထောင်ရေးလုပ်ငန်းများ စတင်လုပ်ဆောင်ရန် သံလွင်မြစ်မှ မိုင်းကျက်ကျေးရွာအထိ ၄၈ ပေ အကျယ်ရှိသည့် လမ်းကို ဖောက်လုပ်လာကြောင်း ဒေသခံများက ပြောသည်။
လားရှိုးမြို့နယ် အရှေ့မြောက်ဘက် မိုင် ၆၀ အကွာခန့်ရှိ မိုင်းကျက်ကျေးရွာအုပ်စုသည် သံလွင်မြစ် အနောက်ဘက်ခြမ်းရှိ လားရှိုး၊ သိန္နီနှင့် အရှေ့ဘက်ခြမ်းရှိ ကွမ်းလုံမြို့နယ်တို့ဆုံရာ နယ်စပ်ဖြစ်ပြီး ‘ဝ’တပ်ဖွဲ့က သံလွင်မြစ် အနောက်ခြမ်းတွင် ခြေကုပ်ရယူရန် ဖြစ်နိုင်ကြောင်း ဒေသခံများက သုံးသပ်ပြောဆိုသည်။
Leave a Comments