သျှမ်းပြည် မူဆယ်မြို့နယ် ဝိန်းနန်းကျေးရွာနေ အမျိုးသမီးတစ်ဦးသည် ခြံသွားပြီးမြက်ရိုင်း ရှင်းလင်းနေစဉ် မပေါက်ကွဲသေးသည့် မိုင်းတစ်လုံးကို ပေါက်ပြားဖြင့်ပေါက်မိလိုက်ကာ မိုင်းကွဲပြီးဒဏ်ရာရရှိခဲ့ကြောင်း စုံစမ်းသိရသည်။
ဖြစ်စဉ်မှာ ယမန်နေ့ (ဇန်နဝါရီလ ၁၆ ရက်) နံနက်ပိုင်းတွင် အသက် ၅၀ ကျော် ပါ့ရွှေသိန်းဆိုသူသည် ခြံသွားပြီး မြက်ရိုင်းရှင်းလင်းနေစဉ် မပေါက်ကွဲသေးသည့် မိုင်းတစ်လုံးကို ပေါက်ပြား ဖြင့်ပေါက်မိလိုက်သဖြင့် အဆိုပါမိုင်းအားပေါက်ကွဲသွားကာ ၎င်း၏မျက်နှာ၊ ခန္ဓာကိုယ်နှင့် လက်များ၌ ယမ်းစထိမှန်ဒဏ်ရာရရှိခဲ့ကြောင်း SSPP Infoမှ ထုတ်ပြန်ထားသည်။
“ဟုတ်တယ်။ ပါရွှေသိန်းက သူစိုက်ထားတဲ့ သစ်သီးခြံထဲကို မြက်သွားရှင်းရင်း မြေမှာမြုပ်ထားတဲ့ မိုင်းကို ပေါက်မိတာ။ မိုင်းလည်းပေါက်ကွဲသွားပြီး သူ့ကိုထိသွားတယ်။ ဒဏ်ရာရထားတာကတော့ ပြင်းတယ်။ ပြီးခဲ့တဲ့ တလောတုန်းက စစ်ကောင်စီနဲ့ TNLAတို့ တိုက်ပွဲဖြစ်ပြီးနောက် ဒီခြံထဲမှာစစ်ကောင်စီတပ်သားတွေ လာနေထားတာ”ဟု ဒေသခံတစ်ဦး၏ ပြောချက်အရ ရေးသားဖော်ပြထားသည်။
ခြံသွားရှင်းရင်း မိုင်းတစ်လုံးကိုပေါက်မိတာ။ ဒဏ်ရာတော့ တော်တော်ဆိုးတယ်။ ပြီးခဲ့တဲ့ တလောတုန်းက ” ဟု ၎င်းဒေသခံတစ်ဦးက ပြောသည်။
အလားတူ (ဇန်နဝါရီလ ၁၁ ရက်)တွင် မူဆယ်မြို့နယ် ခူးဝိန်းနယ်မြေ၊ စွမ်စော်ရပ်ကွက်တွင် အမျိုးသား ၁ ဦး ထင်းသွားရှာနေစဉ် မြေမြုပ်မိုင်းနင်းမိ၍ ခြေထောက်ပြတ်သွားသည်။
ပြီးခဲ့သည့် (ဇန်နဝါရီလ ၁၄ ရက်)တွင်လည်း မူဆယ်မြို့နယ် မန့်မိုင်ကျေးရွာအုပ်စုနှင့် စွမ်စော်ရပ်ကွက်တွင် အမျိုးသား ၂ ဦး မိုင်းနင်းမိပြီး ထိုထဲမှ စွမ်စော်ရပ်ကွက်က အမျိုးသားသည် ခြေထောက်ပြတ်သွားကြောင်း သိရသည်။
လက်ရှိ သျှမ်းမြောက်ဒေသတွင် “၁၀၂၇ စစ်ဆင်ရေး” တိုက်ပွဲကာလအတွင်း မြေမြုပ်မိုင်းကြောင့် ထိခိုက်ဒဏ်ရာရသူ ၂၀ နီးပါး ရှိနေပြီဖြစ်ကြောင်း သိရသည်။
ထိုထဲမှ မိုင်းနင်းမိသူ ဒေသခံအများစုသည် အမျိုးသားများဖြစ်ပြီး တချို့သည်ခြေထောက်ဖြတ်ထားရကာ ခြေအတုတပ်ရန် ငွေရေးကြေးရေးခက်ခဲနေကြောင်း (ဒီဇင်ဘာလ ၂၃ ရက်)ကမိုင်းနင်းမိသူ အမျိုးသားတစ်ဦး၏ ဇနီးက ပြောသည်။
“ကျမယောင်္ကျားလည်း မိုင်းနင်းမိလို့ ခြေထောက်ဖြတ်လိုက်ရတာ။ သူကတော့အခုခြေအတုတပ်ဖို့ ပြောထားတယ်။သူကတော့ မန္တလေးမှာရတယ်၊ ဆက်သွယ်ပေးပါဦးလို့ ပြောတယ်။ ကျမလည်း ရတယ်လို့ ဆက်သွယ်ပေးမယ်။ တစ်ယောက်တည်းလုပ်ထာထက်ဆိုင်ရင် အဖွဲ့အဖွဲ့အစည်းနဲ့ လုပ်ရင်တော့ ဈေးသက်သာတာပေါ့လို့။ အခုမှာသူက အလုပ်လုပ်ဖို့ခက်ခဲသွားပြီ။ ခြေတုတပ်ဖို့လည်း ကျမမှာမသက်နိုင်သေးဘူး” ဟု ၎င်းအမျိုးသမီးတစ်ဦးက ပြောသည်။
စစ်တပ်အာဏာသိမ်းပြီးနောက်ပိုင်း မြန်မာနိုင်ငံတစ်ဝှမ်း နေပြည်တော်မှလွဲ၍ တိုင်းနှင့်ပြည်နယ် အသီးသီးမှာ မြေမြုပ်မိုင်းနှင့် ပေါက်ကွဲစေတတ်သော စစ်အကြွင်းအကျန် ပစ္စည်းများကြောင့် ပြည်သူလူထု ထိခိုက်သေဆုံးမှု သိသိသာသာတိုးလာသကဲ့သို့ မြို့နယ်ပေါင်းထက်ဝက်ကျော်မှာ မိုင်းအန္တရာယ် ကြုံတွေ့နေရကြောင်း မြေမြုပ်မိုင်းစောင့်ကြည့်လေ့လာရေးအဖွဲ့မှ ပြောဆိုထားသည်။
