သျှမ်းပြည်မြောက်ပိုင်း၊ မူဆယ်မြို့တွင် အိမ်ထောင်စုစာရင်း ပြုလုပ်ခြင်းနှင့် ပြောင်းရွှေ့ခြင်းအတွက် ငွေကြေးကုန်ကျမှုများပြားလာပြီး မြို့ခံကိုယ်တိုင် အိမ်ထောင်စုစာရင်း ပြုလုပ်ရာတွင် ကျပ်သိန်းနှင့်ချီ ကုန်ကျနေကြောင်း စုံစမ်းသိရသည်။

မူဆယ်မြို့နယ်သို့ အခြားမြို့နယ်မှ ပြောင်းရွှေ့လာသည့် ပြည်သူများ၊ တရုတ်နိုင်ငံသားများလည်း ပြောင်းရွှေ့လာကာ အိမ်ထောင်စုစာရင်းသွင်းခြင်း၊ ဝယ်ယူခြင်းများကြောင်း မူဆယ်မြို့နယ် ဒေသခံများအတွက်လည်း အခက်ကြုံနေရကြောင်း မူဆယ်မြို့ ဒေသခံအမျိုးသားတဦးက သျှမ်းသံတော်ဆင့်ကို ပြောသည်။

“ တလောက ကျနော်ရဲ့ ညီတောင် သူ့အိမ်ထောင်စု စာရင်းလုပ်တာ ကျပ်သိန်း ၃၀ကုန်တယ်။ အခုနောက်ပိုင်း တရုတ်နိုင်ငံသားတွေကလည်း အိမ်ထောင်စု ဝယ်ယူတာတွေ နောက် အခြားဒေသခံတွေကလည်း အိမ်ထောင်စုတွေ လာဝယ်တော့ စျေးတွေက ပိုတက်လာတယ်။ ပိုစျေးကြီးလာတယ်” ဟု ၎င်းကဆိုသည်။

အခြားမြို့နယ်မှ မူဆယ်သို့ ပြောင်းရွှေ့လာသူများအနေဖြင့် မူဆယ်တွင် အမှန်တကယ်နေထိုင်သည့်အိမ် မရှိလျှင် အိမ်ထောင်စုစာရင်း ပြောင်းရွှေ့ရန် ခက်ခဲသည့်အပြင် အိမ်ပုံ၊ လူပုံများ ရိုက်ကူးတင်ပြရပြီး စစ်ဆေးမှုများ ပိုမိုတင်းကျပ်ကာ ငွေကြေးများကို အဆမတန်တောင်ခံမှုရှိနေကြောင်း မူဆယ်မြို့နယ်မှ ဒေသခံအမျိုးသားတစ်ဦးက ဆက်ပြောသည်။

“တခြားမြို့နယ်ကလူတွေ မူဆယ်ကို ပြောင်းလာပြီး တကယ်အိမ်မရှိရင် အိမ်ထောင်စုစာရင်း ပြောင်းလို့မရဘူး။ ဒေသခံတွေလုပ်ရင်လည်း အိမ်ပုံ၊ လူပုံလည်း ရိုက်ဖို့လိုတယ်။ အခုက နည်းနည်းတင်းကြပ်နေတာရှိတော့ ကုန်ကျစရိတ်များတယ်။” ဟု ၎င်းက ဆိုသည်။

အိမ်ထောင်စုစာရင်း ပြုလုပ်ရာတွင် ငွေကြေးပေးဆောင်ရခြင်းမှာ သက်ဆိုင်ရာဌာနများ၏ လုပ်ထုံးလုပ်နည်းများနှင့် ငွေကြေးတောင်းခံမှုများကြောင့် ဖြစ်ပေါ်နေခြင်းဖြစ်ပြီး စည်းမျဉ်း စည်းကမ်းများ ထုတ်ပြန်ထားသော်လည်း လက်တွေ့တွင် တိတိကျကျ လိုက်နာဆောင်ရွက်ခြင်း မရှိကြောင်း ၎င်းက ဝေဖန်သည်။

“တကယ်တော့ ငွေကြေးတွေကြောင့်၊ ဌာနဆိုင်ရာတွေ ဒီလိုတွေဖြစ်တယ် ပြောရမှာပေါ့။ သူတို့က စည်းမျဉ်းစည်းကမ်း ဘယ်လောက်ထွက်ထွက် သေချာလုပ်တာမျိုး မရှိဘူး။ သူတို့ ရိုက်စားချင်ရင် ရိုက်စားတာပဲ။ ခြိမ်းခြောက်ဖို့ ထွက်ထားတဲ့ စည်းမျဉ်းစည်းကမ်းတွေပါပဲ။ တရုတ်ကို သွားဖို့ စားအုပ်နီတောင် ကျပ်ရာဂဏန်များရှိရမှာ ခုက သောင်းနဲ့ချီပေးနေရတာလေ။” ဟု ၎င်းက ပြောသည်။

မူဆယ်မြို့ခံများအနေဖြင့် သက်ဆိုင်ရာဌာနများကို အားကိုး၍မရသည့်အပြင် အိမ်ထောင်စုစာရင်း ကိစ္စများ နှင့် ပတ်သက်၍လည်း ပြောဆိုရန် စိုးရိမ်နေကြသဖြင့် အဆင်ပြေသလိုသာ နေထိုင်နေကြရကြောင်း ဒေသခံက ပြောသည်။