သျှမ်းပြည် မိုင်းရယ်မြို့နယ်ရှိ ကျေးရွာဘက်တွင် ကိုးကန့်တပ်ဖွဲ့ MNDAA ကောက်ယူထားသည့် အိမ်ထောင်စုစာရင်းအတိုင်း ဒေသခံများကို တပ်သားသစ်အဖြစ် အတင်းအဓမ္မ ခေါ်ယူစုဆောင်းနေကြောင်း စုံစမ်းသိရသည်။

ပြီးခဲ့သည့် မေလ ၂၃ ရက်တွင် မိုင်းရယ်မြို့နှင့် လားရှိုးမြို့ကြားရှိ ဟိုယ၊ လွယ်ငင်း၊ ကောင်းမောင်၊ နောင်မို စသည့် ကျေးရွာအုပ်စုများမှ အုပ်ချုပ်ရေးမှူးများကို ကိုးကန့်တပ်ဖွဲ့ MNDAA က ၎င်းတို့တပ်စွဲထားသည့် လွယ်ငင်းကျေးရွာသို့ အစည်းအဝေး ခေါ်ယူခဲ့ပြီး (၁၀) ရက်အတွင်း တစ်ရွာလျှင် တစ်ဦးကျ တပ်သားသစ် ရှာဖွေပေးရန် ပြောဆိုခဲ့ကြောင်း ဒေသခံများထံမှ သိရသည်။

ထို့နောက် ဇွန်လ ၃ ရက်တွင် သက်ဆိုင်ရာ ကျေးရွာအုပ်ချုပ်ရေးမှူးများမှ MNDAA တာဝန်ရှိသူများထံ လူကိုယ်တိုင် သွားရောက်တောင်းပန်ခဲ့သော်လည်း ညှိနှိုင်း၍မရဘဲ အိမ်ထောင်စုစာရင်းအတိုင်း တပ်သားသစ် ရှာဖွေပေးရန်သာ ပြန်လည်ပြောဆိုခဲ့ကြောင်း ဖြစ်စဉ်သိရှိသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“လူကောက်တာက ကိုးကန့်တပ် မနှစ်က ကောက်ထားတဲ့ အိမ်ထောင်စုစာရင်းထဲကအတိုင်း နာမည်နဲ့ စာရင်းလာတာ။ ဒီတစ်ခေါက် ကိုးကန့်တပ်က လူထပ်ကောက်တော့ ရွာသူကြီးကော၊ နာမည်ပေါက်တဲ့ အိမ်ထောင်စုကော ထွက်ပြေးရတယ်။ တချို့ရွာက လူကြီးတွေလည်း အစည်းအဝေး သွားမတက်လို့ ရိုက်နှက်ခံရတယ်၊ လူမရှာပေးနိုင်တဲ့ ရွာဆိုရင် သူကြီးကို လာဖမ်းသွားတယ်” ဟု မိုင်းရယ်ဒေသခံ အဆိုပါ အမျိုးသားက ပြောသည်။

ကိုးကန့်တပ်ဖွဲ့ MNDAA မှ တပ်သားသစ် ထပ်မံကောက်ယူနေသည့် မိုင်းရယ်မြို့နယ်အတွင်းရှိ ဟိုယ၊ လွယ်ငင်း၊ ကောင်းမောင်၊ နောင်မို ကျေးရွာအုပ်စုများမှာ ကျေးရွာပေါင်း (၂၀) ကျော် ရှိပြီး တစ်ရွာလျှင် တစ်ဦးကျ နာမည်စာရင်းနှင့်တကွ တပ်သားသစ် အဓမ္မစုဆောင်းနေခြင်းကြောင့် အချို့မှာ မိသားစုလိုက် ထွက်ပြေးတိမ်းရှောင်နေရကြောင်း သိရသည်။

“စစ်ရေးလေ့ကျင့်ဖို့ ဟိုပန်၊ ကွမ်းလုံဘက်ထိ ခေါ်သွားမယ်လို့ ပြောတယ်။ ကိုးကန့်လူကြီးတွေ ကိုယ်တိုင်က စစ်သားကောက်တဲ့အကြောင်း သတင်းထွက်လည်း သူတို့မကြောက်ဘူးလို့ ပြောတာ။ ဒေသခံတွေကို လေးစားမှု မရှိတဲ့အပြင် စီးပွားရေး တစ်ခုတည်း ကြည့်ပြီး လူ့အခွင့်အရေး ချိုးဖောက်နေတာ၊ မိန်းကလေးလည်း မချန်ဘူး အကုန်ခေါ်တယ်” ဟု အဆိုပါ ဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

ယမန်နှစ် ၂၀၂၅ စက်တင်ဘာလမှ စတင်ပြီး မိုင်းနယ်မြို့နယ်အတွင်း ကိုးကန့်တပ်ဖွဲ့ MNDAA ထိန်းချုပ်ထားသည့် ကျေးရွာ (၁၆) ရွာတွင် ဒေသခံစိစစ်ရေးကတ် ပြုလုပ်ရန် အိမ်ထောင်စုစာရင်း ကောက်ခံခဲ့ပြီး မလုပ်လျှင် ဧည့်သည်အဖြစ် သတ်မှတ်မည်ဟု ပြောဆိုခဲ့ဖူးသည်။

မိုင်းရယ်မြို့နယ်အတွင်း အိမ်ထောင်စုစာရင်းနှင့် ဒေသခံစိစစ်ရေးကတ် ပြုလုပ်ပေးရန် MNDAA စာရင်းကောက်ယူခဲ့သည့် ကျေးရွာများမှာ နမ့်တုန်း၊ ကောင်းမောင်၊ နားဟုတ်၊ လတ်စန့်၊ ဝမ်လုံ၊ မန်အွယ်၊ ပန်ညောင်၊ ပန်ကိုး၊ နောင်မို၊ နမ့်လိုင်၊ ဟိုလောင်း၊ နားမွန်း စသည့် (၁၆) ရွာဖြစ်ကြောင်း သိရသည်။

ယခုအခါ MNDAA ကောက်ယူထားသည့် အိမ်ထောင်စုစာရင်းပါ လူနာမည်အတိုင်း တပ်သားသစ် အတင်းအဓမ္မ စုဆောင်းလာခြင်းကြောင့် ဒေသခံများမှာ လုံခြုံရေးစိုးရိမ်နေရပြီး ဒေသတွင်းရှိ သျှမ်းလက်နက်ကိုင်တပ်ဖွဲ့မှလည်း တာဝန်ယူ ကူညီဖြေရှင်းပေးခြင်း မရှိကြောင်း ဒေသခံများက ပြောဆိုသည်။

လက်ရှိတွင် မိုင်းရယ်မြို့နယ်အတွင်း ကိုးကန့်တပ်ဖွဲ့ MNDAA၊ ‘ဝ’တပ်ဖွဲ့ UWSA နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) တပ်များ သွားလာလှုပ်ရှားလျက် ရှိသည်။