သျှမ်းပြည်တောင်ပိုင်း လင်းခေးမြို့နယ်ရှိ စစ်ကော်မရှင်လက်အောက်ခံ ဝန်ထမ်းများသည် ရွေးကောက်ပွဲအတွက် အိမ်ထောင်စုစာရင်းများ အိမ်တိုင်ရာရောက် လိုက်လံ စစ်ဆေးနေကြောင်း သတင်းရရှိသည်။

လင်းခေးမြို့နယ်သည် ယခုလာမည့် ဒီဇင်ဘာ ၂၈ ရက်တွင် စစ်ကော်မရှင် ဦးဆောင်ကျင်းပမည့် ရွေးကောက်ပွဲ ပထမပိုင်းတွင် ပါဝင်သည်။

ထို့ကြောင့် နိုဝင်ဘာလ နောက်ဆုံးပတ်က စတင်ပြီး လင်းခေးမြို့ရှိ စစ်ကော်မရှင် လက်အောက်ခံ ဝန်ထမ်းများနှင့် ရပ်ကွက်အုပ်ချုပ်ရေးများက တစ်အိမ်တက် တစ်အိမ်ဆင်းကာ အိမ်ထောင်စု စာရင်းများ လိုက်လံစစ်ဆေးခဲ့ခြင်းကြောင့် ရွေးကောက်ပွဲတွင် မဲမထည့်လျှင် နောက်ဆက်တွဲပြဿနာများ စိုးရိမ်ရကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ပြည်သူတွေကတော့ မဲမထည့်ရင် နောက်ဖြစ်နိုင်တဲ့ ပြဿနာ အမျိုးမျိုးကို စိုးရိမ်နေကြတယ်။ အရေးယူခံရမှာကိုလည်း စိုးရိမ်နေကြတယ်။ သူတို့ဆီမှာက ကိုယ့်ရဲ့စာရင်းတွေကလည်း ရှိနေတာလေ။ အခုက စက်နဲ့ ဆိုတော့ ဘယ်သူက ပေးလဲ၊ မပေးလဲ စစ်လို့ရတယ်။ ပြီးရင် အရေးယူလာနိုင်တယ်”ဟု လင်းခေးဒေသခံ ၎င်းအမျိုးသားက ပြောဆိုသည်။

ပြီးခဲ့သည့် ဇူလိုင်လနှင့် သြဂုတ်လအတွင်း လင်းခေးမြို့နယ်တွင် မြန်မာအီလက်ထရောနစ် မဲပေးစက် (MEVM) တပ်ဆင်ကိုင်တွယ် အသုံးပြုခြင်းဆိုင်ရာ သင်တန်းများကို စစ်ကော်မရှင်လက်အောက်ခံ ဝန်ထမ်းများမှ ဦးဆောင် ပြုလုပ်ခဲ့သည်။

ထို့နောက် ရွေးကောက်ပွဲနှောင့်ယှက်မှုဥပဒေနှင့် ပတ်သက်သည့် အကြောင်းအရာများကို သတိပေး ပြောဆိုခြိမ်းခြောက်မှုများလည်း ရှိခဲ့ကြောင်း ဒေသခံများထံမှ သိရသည်။

“အခုက ကျနော်တို့မှာ ဘာမှ ပြောလို့မရဘူး။ ပါတီမကောင်းတာ လိုင်းပေါ်တင် ပြောဆိုတာတွေ မလုပ်ဖို့ သတိပေး တားမြစ်တာတွေ ပြောတယ်။ လင်းခေးက လူတွေ ဒီတစ်ခေါက် ရွေးကောက်ပွဲမှာ ငြိမ်နေကြတယ်၊ အဲ့လို သတိပေး တားမြစ်တာတွေလည်း ရှိနေတော့ ဒေသခံတွေက ကြောက်နေကြတာလည်း ပါတယ်”ဟု ၎င်းအမျိုးသားက ထပ်လောင်းပြောသည်။

ယနေ့ (ဒီဇင်ဘာလ ၂၆ ရက်) တွင်လည်း လင်းခေးမြို့နယ်မှ ရက်အတန်ကြာ ခရီးထွက်ရန် ရှိသူများနှင့် သက်ကြီးပိုင်းများမှာ ရွေးကောက်ပွဲအတွက် ကြိုတင်မဲထည့်ရပြီး၊ ယမန်နေ့ ( ဒီဇင်ဘာလ ၂၅ ရက်) တွင် လင်းခေးမြို့နယ်ရှိ မဲရုံများတွင် တာဝန်ယူ စောင့်ကြည့်မည့်သူများက ကြိုတင်မဲများ ပေးခဲ့ရကြောင်း သိရသည်။

လင်းခေးမြို့နယ်ရှိ ရပ်ကွက်နှင့် ကျေးရွာအုပ်စုများတွင် စစ်ကော်မရှင် ကျင်းပမည့် ရွေးကောက်ပွဲ အတွက် မဲဆန္ဒပေးနိုင်ရန် မဲရုံ (၃၈) ရုံ ရှိထားကြောင်း သိရသည်။

လင်းခေးမြို့နယ် မဲဆန္ဒနယ်အတွက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) တို့မှ ကိုယ်စားလှယ်လောင်းများ ဝင်ရောက်ယှဉ်ပြိုင်မည် ဖြစ်သည်။

စစ်ကော်မရှင်ကျင်းပမည့်‌ ရွေးကောက်ပွဲ ပထမပိုင်းတွင် သျှမ်းပြည်ရှိ မြို့နယ်ပေါင်း ၁၂ ခုပါဝင်ပြီး ၎င်းမြို့များမှာ ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေးနှင့် လွိုင်လင်မြို့နယ်တို့ ဖြစ်သည်။