သျှမ်းပြည် သိန္နီမြို့တွင် ကိုးကန့်တပ်ဖွဲ့ MNDAA မှ ဒေသခံစိစစ်ရေးကတ်နှင့် အိမ်ထောင်စုစာရင်းများ စတင်ပြုလုပ်ပေးနေကြောင်း စုံစမ်းသိရသည်။

ယခု နိုဝင်ဘာလ နောက်ဆုံးပတ်မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့တွင် ရပ်ကွက်နေ ပြည်သူများကို MNDAA ထုတ်ပေးသည့် အထူးဒေသ(၁) ဒေသခံစိစစ်ရေးကတ် တစ်ရက်လျှင် (၂၀၀) ယောက်နှုန်းဖြင့် ပြုလုပ်ပေးနေကြောင်း သိန္နီဒေသခံများက ပြောသည်။

“ရပ်ကွက်(၁)က ပြည်သူတွေကို အရင်ခေါ်လုပ်ပေးနေတာ။ တစ်ရက်ကို အယောက် ၂၀၀ ပဲ လုပ်ပေးသေးတယ်၊ ကတ်ကတော့ ချက်ချင်း မရဘူး။ ကိုးကန့်မှတ်ပုံတင်လုပ်ဖို့ ဝါတွင်းထဲက သူတို့ စာရင်းကောက်ထားတာ။ အခုလည်း စာရင်းထပ်ပေးရတယ် သူတို့ကွန်ပျူတာထဲ ရိုက်ထည့်ထားတာ၊ ကတ်ကတော့ တစ်ရက်လောက် စောင့်ပြီးမှ ရတယ်” ဟု သိန္နီဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

MNDAA ထုတ်ပေးသည့် အထူးဒေသ(၁) ဒေသခံစိစစ်ရေးကတ်နှင့် အိမ်ထောင်စုစာရင်းအတွက် တစ်ဦးလျှင် ကျပ်ငွေ ၂၀၀၀၀ မှ ၂၅၀၀၀ အထိ ပေးဆောင်ရကြောင်း သိန္နီဒေသခံများထံမှ သိရသည်။

သိန္နီမြို့ပေါ်ရပ်ကွက်များတွင် MNDAA မှ ဇူလိုင်လအတွင်း (၃) ကြိမ်ထက်မနည်း အစည်းအဝေး ခေါ်ယူ၍ အိမ်ထောင်စုစာရင်းနှင့်တကွ ရပ်ကွက်ရုံးများသို့ သွားရောက်စာရင်းသွင်းခဲ့ရပြီး နမ့်စလပ်ကျေးရွာရှိ ဈေးဆိုင်နှင့် ပွဲရုံဂိုထောင်များတွင် အခြားဒေသမှ အလုပ်လာလုပ်သူများကို ယာယီနေထိုင်ခွင့်လက်မှတ် ပြုလုပ်ခိုင်းခဲ့သည်။

“နမ့်စလပ်နဲ့ စယ်အူလို ရွာဘက်မှာတော့ ကိုးကန့်ဘက်က မှတ်ပုံတင်လုပ်ပေးလာတာ ကြာပြီ၊ အခုကျတော့ မြို့ပေါ် ရပ်ကွက်တွေ စလုပ်ပေးမှာ။ အဓိက တရုတ်ပြည် အဝင်အထွက် လုပ်ရင် လွယ်တယ်၊ လားရှိုးဘက်သွားရင်တော့ ဘယ်လိုဖြစ်မလဲ မပြောတတ်ဘူး။ သွားလုပ်ပြီးရင်လည်း စစ်သားကောက်မှာ ကြောက်တယ် အဲ့တာစိုးရိမ်တာပေါ့”ဟု သိန္နီဒေသခံ အမျိုးသမီးက သျှမ်းသံတော်ဆင့်ကို ဆက်ပြောသည်။

ထို့အပြင် သိန္နီမြို့ပေါ်တွင် MNDAA မှ အမှိုက်သိမ်းဆည်းခအဖြစ် တစ်အိမ်လျှင် တစ်လ ၁၅၀၀၀ ကျပ်နှုန်းဖြင့် စတင်ကောက်ခံနေပြီး ဈေးဆိုင်ဖွင့်လှစ်ထားပါက စတုရန်းပေအလိုက် ၆ လစာ သို့မဟုတ် တစ်နှစ်စာ ဆိုင်လိုင်စင်အဖြစ် ကောက်ခံနေကြောင်း ဒေသခံများထံမှ သိရသည်။

အလားတူ ပြီးခဲ့သည့် စက်တင်ဘာလ တတိယပတ်အတွင်း ကိုးကန့်တပ်ဖွဲ့ MNDAA ထိန်းချုပ်ထားသည့် မိုင်းရယ်မြို့နယ်ရှိ ဟိုယ ကျေးရွာအုပ်စု၊ ကောင်းမောင် ကျေးရွာအုပ်စုနှင့် နောင်မိုကျေးရွာအုပ်စုရှိ ကျေးရွာ(၁၆) ရွာတွင် ဒေသခံစိစစ်ရေးကတ် ပြုလုပ်ရန် MNDAA လက်အောက်ခံ အုပ်ချုပ်ရေးနှင့် လူဝင်မှုကြီးကြပ်ရေး တာဝန်ရှိသူများမှ စာရင်းကောက်ယူခဲ့သည်။

MNDAA ထုတ်ပေးသည့် အထူးဒေသ(၁) ဒေသခံစိစစ်ရေးကတ်ပြားနှင့် အိမ်ထောင်စုစာရင်းဖြင့် မြန်မာ-တရုတ်နယ်စပ်ရှိ မုံးကိုးနှင့် ချင်းရွှေဟော် နယ်စပ်ဂိတ်များတွင် MNDAA ၏ နယ်စပ်ဖြတ်ကျော်ခွင့်စာအုပ်များ ထပ်မံပြုလုပ်နိုင်ပြီး တရုတ်အစိုးရ ခွင့်ပြုချက်ဖြင့် တရုတ်နိုင်ငံ မံစီမြို့နယ်အထိ ဝင်ထွက်သွားလာနိုင်ကြောင်း နယ်စပ်ကုန်သည်များက ပြောသည်။

သျှမ်းပြည်မြောက်ပိုင်းတွင် TNLA နှင့် MNDAA ပြုလုပ်ပေးသည့် ယာဉ်လိုင်စင်များ၊ မှတ်ပုံတင်များနှင့် အိမ်ထောင်စုစာရင်းများမှာ ၎င်းတို့ ထိန်းချုပ်နယ်မြေ၌သာ အကျုံးဝင်ပြီး၊ အခြားမြို့များသို့ သွားလာလျှင် စစ်ကောင်စီလက်အောက်ခံများ၏ စစ်ဆေးမေးမြန်းမှုကြောင့် ဖမ်းဆီးခံရမည်ကို စိုးရိမ်နေရကြောင်း ဒေသခံများက ပြောဆိုသည်။