စစ်ကော်မရှင်ကျင်းပနေသည့် အတုအယောင်ရွေးကောက်ပွဲတွင် အီလက်ထရောနစ် မဲပေးစက်ကို ပထမဆုံးအကြိမ် အသုံးပြုခြင်းကြောင့် သက်ကြီးပိုင်းပုဂ္ဂိုလ်များ မဲပေးချိန်တွင် အခက်အခဲများ ကြုံတွေ့ခဲ့ကြောင်း စုံစမ်းသိရသည်။
ယနေ့ (ဒီဇင်ဘာလ ၂၈ ရက်) တွင် မူဆယ်မြို့ပေါ်၌ စစ်ကော်မရှင်ကျင်းပသည့် အတုအယောင် ရွေးကောက်ပွဲတွင် မြန်မာအီလက်ထရောနစ် မဲပေးစက် (MEVM) ကို အသုံးပြုခဲ့ရာ သက်ကြီးပိုင်းပုဂ္ဂိုလ်များ မဲပေးရန် အခက်အခဲများ ကြုံတွေ့ခဲ့ကြကြောင်း မူဆယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သက်ကြီးပိုင်းတွေကလည်း မဲပေးရမယ့်ရက် ရောက်တော့ မဲပေးဖို့ အခက်အခဲတွေ ဖြစ်ကုန်တာ။ တချို့က မီးစိမ်းပေါ်တဲ့ဟာကို နှိပ်တာ။ လူကြီးတွေက မဲပေးတဲ့နည်း မသိတော့ အခက်အခဲ ဖြစ်နေကြတယ်၊ မှားပေးလည်း ပြန်ပြင်လို့မရဘူး။ တာဝန်ကျတဲ့ ဝန်ထမ်းတွေကလည်း ပေါ့ဆနေကြတာ”ဟု မူဆယ်မြို့မှ အဆိုပါဒေသခံ အမျိုးသားက ပြောသည်။
အလားတူ လင်းခေးမြို့နယ်တွင်လည်း မဲရုံတွင် တာဝန်ကျသူများက မဲလာပေးသည့် သက်ကြီးပိုင်းများကို အချိန်လောသည့်အတွက် မဲပေးစက်ပေါ်ရှိ ပါတီအမှတ်အသားများကို သေချာမကြည့်လိုက်ရဘဲ မဲပေးလိုက်ရကြောင်း လင်းခေးမြို့တွင် ဆန္ဒမဲသွားပေးခဲ့သူ သက်ကြီးပိုင်းတစ်ဦးက သျှမ်းသံတော်ဆင့်ကို ပြောသည်။
“မဲရုံစောင့်နေတဲ့လူတွေက လောနေတော့ ဘယ်ပါတီကို မဲပေးခဲ့လဲ ဆိုတာ ကိုယ်ဟာကိုတောင် မသိဘူး။ တချို့ကလည်း နားမလည်ဘူး၊ မဲသွားပေးဆိုလို့ ပေးလိုက်ကြတာ။ သူတို့ကလည်း လောနေတာ၊ အဲ့ကြောင့် လူတွေက သေချာကြည့်ဖို့ အချိန်မရဘူး”ဟု လင်းခေးမြို့တွင် ဆန္ဒမဲပေးခဲ့သူ ၎င်းသက်ကြီးပိုင်း အမျိုးသမီးက ပြောသည်။
ယနေ့ (ဒီဇင်ဘာလ ၂၈ ရက်) တွင် စစ်ကော်မရှင်ကျင်းပနေသည့် အတုအယောင် ရွေးကောက်ပွဲတွင် အသုံးပြုသည့် မြန်မာအီလက်ထရောနစ် မဲပေးစက် (MEVM) သည် သက်ကြီးပိုင်းများအတွက် အသုံးပြုရန် အခက်အခဲ ဖြစ်စေသည့် အပြင် တချို့သော တိုင်းနှင့် ပြည်နယ်များတွင်လည်း မဲပေးစက် ချို့ယွင်းမှုများ ဆက်တိုက်ဖြစ်ပွားနေကြောင်း သိရသည်။
မူဆယ်မြို့ပေါ်တွင် ရွေးကောက်ပွဲ၌ မဲပေးပိုင်ခွင့်ရှိသူ အားလုံး မရောက်ရှိလာသဖြင့် မဲရုံပိတ်ချိန် မြန်မာစံတော်ချိန် ညနေ (၄)နာရီ အစား ညနေ (၆)နာရီ အထိ အချိန်ထပ်တိုးလိုက်ကြောင်း ဒေသခံများက ပြောသည်။
စစ်ကော်မရှင်ကျင်ပသည့် ရွေးကောက်ပွဲ ပထမပိုင်းတွင် သျှမ်းပြည်ရှိ မြို့နယ်ပေါင်း ၁၂ ခု ပါဝင်ပြီး ၎င်းမြို့များမှာ ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေးနှင့် လွိုင်လင်မြို့နယ်တို့ ဖြစ်သည်။
မြန်မာနိုင်ငံတွင် ယခင်က ကျင်းပခဲ့သည့် ရွေးကောက်ပွဲ အဆက်ဆက်တွင် စာရွက်ဖြင့် သမားရိုးကျ မဲပေးနည်းကို အသုံးပြုခဲ့သော်လည်း စစ်ကော်မရှင် ကျင်းပနေသည့် ၂၀၂၅ ရွေးကောက်ပွဲတွင် ပထမဆုံးအကြိမ် အီလက်ထရောနစ် မဲပေးစက်ကို အသုံးပြုလာခြင်း ဖြစ်သည်။
မြန်မာအီလက်ထရောနစ် မဲပေးစက် အသုံးပြုခြင်းကြောင့် မဲရုံပိတ်သိမ်းချိန်တွင် ယခင်ကဲ့သို့ မဲလက်မှတ်များကို ထုတ်ယူရေတွက်ရန် မလိုတော့ဘဲ မဲပေးသူ အရေအတွက်နှင့် ပါတီအလိုက် မဲရလဒ်အရေအတွက် ပါသည့် မဲရလဒ်စာရွက်ကို မဲပေးစက်မှတဆင့် ပရင့်ထုတ်ရုံဖြင့် စက္ကန့်ပိုင်းအတွင်း ထွက်လာပြီး အချိန်တိုအတွင်း မဲရလဒ်များ ရေတွက်နိုင်ခြင်း၊ တိကျသည့် မဲရလဒ်များ ရရှိနိုင်ခြင်း စသဖြင့် စစ်ကော်မရှင်ဘက်မှ အကြောင်းပြထားသည်။
သို့သော် စစ်ကော်မရှင်ဘက်မှ ရွေးကောက်ပွဲတွင် အသုံးပြုသည့် အီလက်ထရောနစ် မဲပေးစက်များမှာ မည်သည့်အဖွဲ့အစည်းမှ တာဝန်ယူထုတ်လုပ်ပြီး မည်သည့် နည်းပညာများဖြင့် တပ်ဆင်ထားသည်ကို ပွင့်လင်းမြင်သာစွာ ချပြခြင်း မရှိဘဲ ယုံကြည်စိတ်ချရန် မဖြစ်နိုင်ကြောင်း ရွေးကောက်ပွဲလေ့လာစောင့်ကြည့်သူများက သုံးသပ်ပြောဆိုသည်။
Leave a Comments