သျှမ်းပြည် လဲချားမြို့နယ်တွင် တောင်ယာမှ ပြန်လာစဉ် မိသားစုလိုက် မိုင်းနင်းမိပြီး ဒဏ်ရာအပြင်းအထန် ရရှိခဲ့ကြောင်း စုံစမ်းသိရသည်။

ဒီဇင်ဘာလ (၂၃) ရက် ညနေ (၄) နာရီကျော်တွင် လဲချားမြို့နယ် ဝမ်စဲ့ကျေးရွာအုပ်စု နောင်ဟွမ်ရွာနေ လင်မယားနှစ်ဦးသည် တောင်ယာမှ ပြန်လာစဉ် ဝမ်ဆန်းကျေးရွာအနီး ဟိုင်ရှန်လမ်းခွဲ တံတားထိပ်၌ မိသားစုလိုက် မိုင်းနင်းမိပြီး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။

“ခြံကအပြန် တံတားထိပ်မှာ ထိမိတာ။ သူတို့က ၀မ်ဆန်းကျေးရွာ ဟိုင်ရှန်လမ်းခွဲနားမှာ ကားနှစ်စီး ရှောင်ပေးရင် လမ်းချပေးလိုက်တော့ နင်းမိတယ်လို့ ပြောတယ်။ လင်မယား ၂ ယောက်လုံး ဒဏ်ရာရတယ်၊ သမီးလည်း ထိတယ်။ အမျိုးသားက ညာဘက်လက် ပေါက်သွားတယ်၊ မိန်းမက ဗိုက်မှာထိထားတာ အစ မထုတ်ရသေးဘူး”ဟု ဖြစ်စဉ်သိရှိသူ အသက်(၄၀)ကျော်အရွယ်ရှိ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

မိုင်းနင်းမိပြီး ဒဏ်ရာရရှိသူမှာ အသက် (၃၃) နှစ်အရွယ် အိုက်အောင်၊ ဇနီးဖြစ်သူ အသက် (၃၀) ကျော်အရွယ် အေးယွေးနှင့် သမီးဖြစ်သူ အသက် (၂) နှစ်အရွယ် ကလေးတို့ ဖြစ်ပြီး လက်ရှိတွင် လဲချားမြို့ ပြည်သူ့ဆေးရုံ၌ ဆေးကုသမှု ခံယူနေကြောင်း သိရသည်။

အခြားတစ်ဘက်တွင် လဲချားမြို့နယ်အတွင်း မိုင်းနင်းမိသည့် ဖြစ်စဉ်နှင့် ပတ်သက်ပြီး SSPP/SSA သတင်းပြန်ကြားရေး ဖေ့စ်ဘုတ်စာမျက်နှာ SSPP Info တွင် အများပြည်သူသွား လမ်းမပေါ် RCSS ဘက်မှ ရှော့ခ်တိုက်မိုင်း ထောင်ထားခြင်းကြောင့်ဟု ဒီဇင်ဘာလ (၂၄) ရက်စွဲဖြင့် သတင်းဖော်ပြထားသည်။

၎င်းဖြစ်စဉ်အသေးစိတ်ကို စုံစမ်းသိရှိနိုင်ရန် သျှမ်းသံတော်ဆင့်မှ နှစ်ဘက်တပ်ဖွဲ့ ပြောရေးဆိုခွင့်ရှိသူများထံ ဖုန်းဖြင့်ဆက်သွယ်ခဲ့သော်လည်း အဆက်အသွယ် မရရှိခဲ့ပါ။

အလားတူ ဒီဇင်ဘာလ (၁၅) ရက်ကလည်း မိုင်းကိုင်မြို့နယ် တုံလောနှင့် ပန်ကေတုအကြား သွားလာနေသည့် SSPP စစ်ယာဉ်တန်းကို RCSS တပ်သားများမှ အရပ်သားဝတ်စုံဖြင့် ရှော့ခ်တိုက်မိုင်း (၁၂)လုံးဖြင့် ဖောက်ခွဲခဲ့သည့်အပြင် နောက်တွင် လိုက်ပါလာသည့် အရပ်သားကားကိုလည်း ရှော့ခ်တိုက်မိုင်း (၇) လုံးဖြင့် ထပ်မံဖောက်ခွဲခဲ့ခြင်းကြောင့် ပြည်သူ (၃) ဦး ထိခိုက်ဒဏ်ရာ ရရှိခဲ့ကြောင်း SSPP Info မှ ဒီဇင်ဘာလ (၁၇) ရက်တွင် သျှမ်း/မြန်မာ နှစ်ဘာသာဖြင့် သတင်းထုတ်ပြန်သည်။

သျှမ်းတပ်နှစ်တပ်ဖြစ်သည့် SSPP/SSA နှင့် RCSS/SSA တို့သည် ၂၀၂၃ ခုနှစ် နိုဝင်ဘာလ ၂၉ ရက်က နှစ်ဘက်တပ်ဖွဲ့ အချင်းချင်းကြား အချက်(၉)ချက် ပါဝင်သည့် သဘောတူညီချက်ဖြင့် အပစ်အခတ် ရပ်စဲခဲ့သော်လည်း လေးလအကြာ ၂၀၂၄ မတ်လမှ စတင်၍ တိုက်ပွဲပြန်လည်ဖြစ်ပွားခဲ့ပြီး အပစ်ရပ်မလိုက်နာဟု နှစ်ဘက်တပ်ဖွဲ့ အပြန်အလှန် ဖြေရှင်းချက် ထုတ်ထားသည်။