သျှမ်းပြည် နမ့်ခမ်းမြို့နယ်တွင် တောင်ယာထဲ ကြံစိုက်နေစဉ် စစ်လက်ကျန်ဗုံးကို ဓားခုတ်မိပြီး တောင်သူတစ်ဦး ဒဏ်ရာအပြင်းအထန် ရရှိခဲ့ကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၅ ရက်) ညနေ ၃ နာရီခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့နယ် နောင်တိန်းကျေးရွာ၌ တောင်ယာထဲ ကြံစိုက်နေစဉ် စစ်လက်ကျန်ဗုံးကို ဓားခုတ်မိပြီး တောင်သူအမျိုးသားတစ်ဦး ဒဏ်ရာအပြင်းအထန် ရရှိခဲ့ကြောင်း ဒေသခံများက ပြောသည်။
“ကြံစိုက်နေတုန်း ညနေ ၃ နာရီလောက် ဖြစ်သွားတာ၊ မြေချထားတဲ့ ကြံချောင်းကို ဓားနဲ့ ပိုင်းနေတဲ့အချိန် ဗုံးသီးကို ခုတ်မိတာ။ မျက်နှာထိတယ်၊ ဒဏ်ရာပြင်းလို့ နမ့်ခမ်းဆေးရုံကို ပို့ထားတယ်”ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ဗုံးစထိမှန်ပြီး မျက်နှာနှင့် ခြေထောက်တို့တွင် ဒဏ်ရာရရှိခဲ့သည့် ၎င်းကြံစိုက်တောင်သူ အမျိုးသားကို ဒေသခံများမှ နမ့်ခမ်းမြို့ ပြည်သူ့ဆေးရုံသို့ ပို့ဆောင်ပြီး ဆေးကုသမှု ခံယူထားကြောင်း သိရသည်။
ကြံစိုက်ပျိုးနေစဉ် ဗုံးပေါက်ကွဲသည့် နေရာသည် နမ့်ခမ်းမြို့နှင့် ၁ ဖာလုံခန့်သာ ကွာဝေးပြီး ၎င်းနေရာအနီးတဝိုက်သည် “၁၀၂၇ စစ်ဆင်ရေး” တိုက်ပွဲပြင်းထန်စဉ် ဗုံးကြဲခံခဲ့ရသည့် နေရာများဖြစ်ကြောင်း ဒေသခံများက ပြောသည်။
အလားတူ ဇန်နဝါရီလ (၃၀) ရက်ကလည်း မူဆယ်မြို့နယ် မိုင်းယု (၁၀၅) မိုင်အုပ်စု အောက်နမ့်ဟွယ်ကျေးရွာတွင်လည်း အမျိုးသားတစ်ဦး ကြံသွားခုတ်ရာမှ မိုင်းနင်းမိပြီး ခြေထောက် ၂ ဘက်လုံး ပြတ်သွားခဲ့ကြောင်း မူဆယ်ဒေသခံများထံမှ သိရသည်။
ပြီးခဲ့သည့် ဇန်နဝါရီလအတွင်း TNLA ထိန်းချုပ်ထားသည့် မိုးမိတ်၊ ကွတ်ခိုင်နှင့် သီပေါမြို့တို့တွင် စစ်ကျန်လက်နက်ပစ္စည်းများကို ကိုင်တွယ်မိ၍ ပေါက်ကွဲခြင်း၊ မြေမြှုပ်မိုင်း နင်းမိ၍ ပေါက်ကွဲခြင်းတို့ကြောင့် ကလေးငယ် ၂ ဦး အပါအဝင် စုစုပေါင်း ၄ ဦး သေဆုံးပြီး ၅ ဦး ဒဏ်ရာရရှိခဲ့သည်။
သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” ဖြစ်ပွားပြီးနောက် နယ်မြေထိန်းချုပ်ထားသည့် ညီနောင်မဟာမိတ်တပ်ဖွဲ့များသည် မြေမြှုပ်မိုင်းကဲ့သို့ စစ်ကျန်လက်နက်ပစ္စည်းများကို တာဝန်ယူဖြေရှင်းမှု အားနည်းသေးကြောင်း ပြည်သူများက ထောက်ပြပြောဆိုသည်။
Leave a Comments