သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် သီပေါမြို့တွင် တာဝန်ရှိသူမှ ယခင်အချိန်ထိ မိုင်းရှင်းလင်းမှု မရှိသေးကြောင်း စုံစမ်းသိရသည်။
TNLA သည် သီပေါမြို့ကို ၂၀၂၄ခုနစ် အောက်တိုဘာနှောင်းပိုင်းတွင် ထိန်းချုပ်နိုင်ခဲ့သော်လည်း လက်ရှိအချိန်ထိ မိုင်းရှင်းလင်းရေး လုပ်ဆောင်မှုမရှိသေးကာ ဇန်နဝါရီလ ၇ ရက် တွင် သီပေါမြို့နယ် စံဖိတ်ကျေးရွာ(ဝၢၼ်ႈၸၢမ်ၽိူၵ်ႇ)နေ အသက်(၃၃) နှစ်ရှိသည့် စိုင်းအိုက်ဆိုင်သည် ခြံတွင်း မြက်ရိတ်နေစဉ်တွင် မြေမြုပ်မိုင်း နင်းမိပြီး ဘယ်ခြေတလုံးတဖက်တွင် ပြတ်တောက်သွားကြောင်း ဒေသခံအမျိုးသမီးတစ်ဦးက ပြောသည်။
“မိုင်းနင်းမိတာ စံဖိတ်ကျေးရွာက လီဆူးလူမျိုးဖြစ်တယ်၊ ခြံမှာ မြက်သွားရိတ်ရင်း နင်းမိတယ်။ ဘယ်ခြေတလုံးပြတ်သွားတယ်။ မိုင်းနင်းမိတာ ခနခနဖြစ်တယ်။ တိုက်ပွဲဖြစ်ပြီး မိုင်းနင်းမိတဲ့သူကများလာတယ် သေတဲ့သူရော ဒဏ်ရာရတဲ့သူရော ရှိတယ်။ ဘယ်သူမှ မိုင်းရှင်းလင်းရေး လာမလုပ်ပေးဘူး”ဟု ၎င်းက ပြောသည်။
အလားတူ ၂၀၂၄ ခုနှစ် နိုဝင်ဘာလ ၁ ရက် တွင် သီပေါမြို့နယ် ကုန်းစုံဒေသခံ အမျိးသား ၂ ဦးသည် တောထဲ မှိုသွားရှာနေစဉ် မြေမြုပ်မိုင်းနင်မိပြီး ပေါက်ကွဲခြင်းကြောင့် တစ်ဦးခြေထောက်တစ်ဖက် ပြတ်ထွက်သွားသည်ဟု သိရသည်။
“၁၀၂၇”စစ်ဆင်ရေး ဒုတိယလှိုင်းဖြစ်ပွားပြီးနောက် ၂၀၂၄ ခုနှစ်အတွင်း ဇန်နဝါရီလမှ ၂၀၂၅ ဇန်နဝါရီလ ၉ ရက်)နေ့အထိ တစ်နှစ်အတွင်း မိုင်းနင်းမိသူ ၈ ဦးရှိပြီး ၎င်းထဲတွင် ၂ ဦးသေဆုံးသွားကြောင်းသိရသည်။
“၁၀၂၇” စစ်ဆင်ရေး ဖြစ်ပြီးသည့်နောက် စစ်ကောင်စီလက်ကျန် ခလရ-(၂၃) တပ်ရင်းကို အောက်တိုဘာ ၂၃ ရက်နေ့မှစ၍ တအာင်း (ပလောင်) အမျိုးသားလွတ်မြောက်ရေးတပ်မတော် TNLA က တိုက်ခိုက်သိမ်းပိုက်ပြီး နေရပ်ပြန်သွားသည့် ဒေသခံအချို့သည် မြေမြုပ်မိုင်း ပေါက်ကွဲမှုနှင့် ကြုံတွေ့နေရခြင်းဖြစ်သည်။
ထို့အပြင် ယခုနှစ် ဇန်နဝါရီ လဆန်းပိုင်းမှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ် မိုင်းရှင်းလင်းမှုများစတင်ပြုလုပ်လာကြောင်း လားရှိုးဒေသခံအမျိုးသားတစ်ဉီးက သျှမ်းသံတော်ဆင့်ကို ပြောသည်။
“ဒီလဆိုရင် ကိုးကန့်တပ်ဖွ့က မြို့ကို ပြန်လည်စည်ကားဖို့ စည်းလုံးနေကြတယ်။ လျှပ်စစ်မီးတို့ လိုင်စင်ကားတို့ ပြန်လုပ်ပေးတယ် တဖြေးဖြေးနဲ့ လုပ်နေတာပေါ့။ ခုက မြို့တွင်းနဲ့ မြို့ပြင်တွေမှာ မိုင်းရှင်းလင်းရေးတွေ ပြုလုပ်နေကြတယ်။ ပေါက်ကွဲသံကြားရင်လည်း မလန့်ဖို့ ပြောကြတယ်”ဟု ၎င်းအမျိုးသားက ပြောသည်။
သျှမ်းပြည်မြောက်ပိုင်း “၁၀၂၇” စစ်ဆင်ရေး ဖြစ်ပွားပြီးနောက် မြေမြှုပ်မိုင်းရှင်းလင်းမှုကို ညီနောင်မဟာမိတ်တပ်ဖွဲ့ နှင့် စစ်ကောင်စီတပ်ဖွဲ့တို့က တာဝန်ယူဖြေရှင်းမှုနည်းသေးကြောင်း ပြည်သူများက ပြောသည်။
လက်ရှိတွင် တိုက်ပွဲဖော်ဆောင်မှု ရပ်တန့်နေသည့်အတွက် အခြားဒေသသို့ စစ်ဘေးရှောင်သွားသည့် ပြည်သူများသည် မိမိနေရပ်ကို ပြန်ရန်အတွက် ကြိုးစားနေသော်လည်း တဖက်တွင် မြေမြုပ်မိုင်းဒဏ်ကို စိုးရိမ်နေသေးကြောင်းလည်း တောင်ကြီးရောက် သျှမ်းမြောက် စစ်ဘေးရှောင်များကပြောသည်။
“ တချို့လည်း ပြန်နေကြပြီ၊စစ်ရှောင်လာရတာ ငွေကုန်တယ်၊ ဝင်ငွေလည်းမရှိဘူးလေ၊ ပြန်ရင်လည်း မိုင်းတွေကိုတော့ ကြောက်တယ်။ မိုင်းရှင်းလင်းရေး အမြန်လုပ်ဆောင်စေချင်တယ်” ဟု တောင်ကြီးရောက် သီပေါစစ်ရှောင် တစ်ဉီးက ပြောသည်။
မြေမြှုပ်မိုင်းနှင့် ပေါက်ကွဲစေတတ်သော စစ်ကျန်လက်နက်ပစ္စည်းများ၏ ဖြစ်ရပ်များကို လတ်တလောစောင့်ကြည့်လေ့လာချက်များအရ ၂၀၂၄ ခုနှစ် ဇန်နဝါရီမှ စက်တင်ဘာလအတွင်း တစ်နိုင်ငံလုံး အတိုင်းအတာဖြင့် ထိခိုက်ခံစားရသူအရေအတွက် (၈၈၉ ဦး) ရှိခဲ့ပြီး ထိုထဲတွင် သျှမ်းပြည်သည် ထိခိုက်ခံစားမှု အများဆုံးဖြစ်ကြောင်း UNICEF ( မြန်မာ) ၏ အစီအရင်ခံစာအရသိရသည်။
အလုပ်သင်သတင်းထောက် နန်းဆိုင်ခမ်း ရေးသားသည်။
Leave a Comments