သျှမ်းပြည် နမ့်ဆန်မြို့နယ်တွင် မပေါက်ကွဲသေးသည့် စစ်အကြွင်းအကျန် လက်နက်ကြီး ဆော့ကစားပြီး ပေါက်ကွဲမှုကြောင့် ကလေးငယ် ၃ ဦး ပွဲချင်းပြီး သေဆုံးသွားခဲ့ကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၃ ရက်) နံနက် ၉ နာရီခန့်တွင် နမ့်ဆန်မြို့နယ် ဇယန်းကြီးကျေးရွာတွင် မပေါက်ကွဲသေးသည့် စစ်အကြွင်းအကျန် လက်နက်ကြီးကို ယူဆော့ကစားမိရာမှ ပေါက်ကွဲမှု ဖြစ်ပွားသောကြောင့် အသက် (၁၀)နှစ်အောက် ကလေးငယ် ၃ ဦး ပွဲချင်းပြီး သေဆုံးသွားကြောင်း တအာင်းအမျိုးသမီးအဖွဲ့ (TWO)မှ ထုတ်ပြန်လာသည်။
“မိုင်းအမျိုးအစားက ဘယ်လိုလဲဆိုတာ သေချာမသိရဘူး။ ကလေးတွေက အဲ့ဒီမိုင်းကို ဆော့ရင်းနဲ့ ပေါက်ကွဲမှုဖြစ်ပြီးမှ အဲ့ဒီမှာပဲ ကလေး ၂ ယောက်က ပွဲချင်းပြီး သေဆုံးသွားခဲ့တယ်။ တစ်ယောက်ကတော့ ဒဏ်ရာပြင်းတယ်၊ ပွဲချင်းပြီး သေတာမျိုး မဟုတ်ဘဲနဲ့ ဆေးရုံပို့ဖို့ လုပ်နေတုန်းမှာ သေဆုံးသွားတယ်”ဟု တအာင်းအမျိုးသမီးအဖွဲ့မှ ပြောရေးဆိုခွင့်ရှိသူတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်အကြွင်းအကျန် အမျိုးအစားသည် စစ်ကောင်စီတပ်နှင့် တအာင်း(ပလောင်)တပ်ဖွဲ့ TNLA တို့၏ နှစ်ဘက်တိုက်ပွဲ ဖြစ်ပွားပြီးနောက် ကျန်ရှိခဲ့သည့် လက်နက်ကြီးနှင့် မြေမြှုပ်မိုင်းဖြစ်သည်ကို မသိရှိနိုင်သေးကြောင်း နမ့်ဆန်ဒေသခံများက ပြောသည်။
အလားတူ TNLA တပ်ဖွဲ့ကလည်း စစ်ကောင်စီ၏ စွန့်လွှတ်မိုင်းများနှင့် စစ်လက်နက် အကြွင်းအကျန်ပစ္စည်းများသည် အချိန်မရွေး ပေါက်ကွဲစေတတ်သောကြောင့် စစ်အသုံးအဆောင် ပစ္စည်းများနှင့် လက်နက်ကြီး ကျည်ဆံများကို ကိုင်တွယ်ခြင်း၊ ထုနှက်ခြင်းနှင့် ဆော့ကစားခြင်းများ မပြုလုပ်ကြရန်ကိုလည်း ယနေ့ (ဖေဖော်ဝါရီလ ၃ ရက်)တွင် သတိပေးလာသည်။
မြေမြှုပ်မိုင်း စောင့်ကြည့်လေ့လာရေးအဖွဲ့၏ ၂၀၁၉ ခုနှစ်မှ ၂၀၂၂ ခုနှစ်အထိ မှတ်တမ်းများအရ မြေမြှုပ်မိုင်းနှင့် ပေါက်ကွဲစေတတ်သော စစ်အကြွင်းအကျန်များကြောင့် မြန်မာနိုင်ငံတဝှမ်းလုံး၌ သျှမ်းပြည်တွင် အရပ်သားထိခိုက်သေဆုံးမှု အများဆုံးဖြစ်ပွားခဲ့ပြီး ကလေးထိခိုက်သေဆုံးမှုမှာ စုစုပေါင်း၏ လေးပုံတစ်ပုံခန့်ရှိကြောင်း ထုတ်ပြန်ထားသည်။
ထိုအထဲတွင် အများစုမှာ စစ်လက်နက်အကြွင်းအကျန်နှင့် မိုင်းများကို ပေါက်ကွဲစေတတ်သည့် ပစ္စည်းမှန်းမသိဘဲ ထိမိကိုင်မိပြီး ယူဆော့ကစားရာမှ ပေါက်ကွဲမှုဖြစ်ပွား၍ ထိခိုက်သေဆုံးရခြင်းဖြစ်ကြောင်း သိရသည်။
Leave a Comments