ဓာတ်ပုံများမှ သတင်းစကား သို့မဟုတ် စစ်ခေါင်းဆောင်၏ အကြောက်တရား

နိဒါန်း

မတ်လ ၂၇ ရက်တွင် ဖြစ်သည်။ အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်၏ နှုတ်ထွက်သတင်း စကားများကို ၇၈ နှစ်မြောက် တပ်မတော်နေ့ အခမ်းအနားမှတဆင့် ကြားသိခဲ့ရပြီဖြစ်သည်။ အမျိုးသားညီ ညွတ်ရေးအစိုးရ(NUG) အပါအဝင် ပြည်သူ့ကာကွယ်ရေးတပ်ဖွဲ့(PDF)များနှင့် ၎င်းတို့အား ကူညီနေသော တိုင်း ရင်းသားလက်နက်ကိုင်တော်လှန်ရေးအဖွဲ့(ERO)အချို့ကို ပြတ်ပြတ်သားသားအရေးယူမည်ဟု ဗိုလ်ချုပ်မှူးကြီး က ဆိုထားသည်။

စစ်ခေါင်းဆောင်၏ ဆိုခဲ့ပါသတင်းစကားသည် လက်တွေ့မကျ၊ ဖြစ်နိုင်ခြေနည်းပါးပြီး စစ်အုပ်စုနှင့် အနွှယ် အပါးများအကြား ဝါဒဖြန့်စည်းရုံးရေးဆန်သော သတင်းစကားတစ်ရပ်သာ ဖြစ်ကြောင်း နိုင်ငံရေး၊ စစ်ရေးအကဲ ခတ်သူများက ဝေဖန်ရှုမြင်ကြပါသည်။

ယခုတစ်ပတ် BNI-Myanmar Peace Monitor ၏ အပတ်စဉ်သတင်းသုံးသပ်ချက်တွင် ဗိုလ်ချုပ်မှူးကြီး၏ မိန့် ခွန်းပါသတင်းစကားများအပြင် ထူးခြားသည့် သတင်းစကားများကို ထုတ်ပြပြောဆိုနေသော ဗိုလ်ချုပ်မှူးကြီး ၏ ဓာတ်ပုံများမှ ပေးပို့လာသောသတင်းစကားများကို စိတ်ဝင်စားဖွယ်တွေးဆတင်ပြသွားပါမည်။

မိန့်ခွန်းမှတ်တမ်း

မတ်လ ၂၇ ရက်၊ နေပြည်တော်တွင် ကျင်းပသော ၇၈ နှစ်မြောက် တပ်မတော်နေ့အခမ်းအနားတွင် စစ်ရေးပြ မြင်ကွင်းများ၊ ဗိုလ်ချုပ်မှူးကြီး၏ မိန့်ခွန်းပြောကြားစဉ် မြင်ကွင်းများအပြင် ဦးသိန်းစိန်၊ ဦးတင်အေး စသော စစ်ခေါင်းဆောင်ဟောင်းများနှင့် ဗိုလ်ချူပ်မှူးကြီးတို့၏ တွေ့ဆုံမှုမြင်ကွင်းများသည် ထိုနေ့အတွက် ထူးခြား သည့် သတင်းမှတ်တမ်းများ ဖြစ်ခဲ့သည်။

ဗိုလ်ချုပ်မှူးကြီး၏ မိန့်ခွန်းတွင် ERO ၁၀ ဖွဲ့နှင့် ငြိမ်းချမ်းရေးအတွက် တွေ့ဆုံဆွေးနွေးမှုအကြောင်း၊ NUG ၊ PDF နှင့် ၎င်းတို့အား ကူညီနေကြသော ERO များအကြောင်း၊ နိုင်ငံတကာအစိုးရများနှင့် အဖွဲ့အစည်းများအကြောင်း၊ စစ်အုပ်ချုပ်ရေးအမိန့်များနှင့် ရွေးကောက်ပွဲများအကြောင်း၊ ရွေးကောက်ပွဲတွင် အသုံးပြုမည့် ရွေးကောက်ပွဲ စနစ်များအကြောင်း စသဖြင့် ပါဝင်ပါသည်။

မိန့်ခွန်းပါသတင်းစကားများသည် စစ်အာဏာသိမ်းကာလအတွင်း ၎င်းတို့ရင်ဆိုင်ကြုံတွေ့နေရသည့် ခက်ခဲကြပ်တည်းမှုများကို လစ်ဟပြသနေသော်လည်း လက်တွေ့မကျသော သတင်းစကားများဖြင့် စစ်အုပ်စုအနွှယ်အပွားများကို ဝါဒဖြန့်စည်းရုံးရေးဆန်စွာ ပြောဆိုခဲ့သည်မှာ ထင်ရှားနေ သည်။

“အရေးကြီးတဲ့မြို့နယ်တွေကို စစ်အုပ်ချုပ်ရေးအမိန့်များ တိုးမြှင့်သတ်မှတ်ပြီး ထိန်းချုပ်ဆောင်ရွက်လျက် ရှိ တယ်။ ဒါဟာ ပြည်သူများကို ထိန်းချုပ်ကန့်သတ်ခြင်းမဟုတ်ဘဲ ဒေသခံပြည်သူလူထုအကျိုးစီးပွားကို ထိခိုက် ပျက်စီးအောင် ဆောင်ရွက်နေကြတဲ့ အကြမ်းဖက်သမားများရဲ့ လုပ်ဆောင်ချက်တွေကို ထိရောက်စွာ ထိန်းချုပ် နိုင်ဖို့ပဲဆိုတာ ထည့်သွင်းပြောကြားလိုတယ်”ဟု စစ်ခေါင်းဆောင်က ပြောဆိုခဲ့သော်လည်း လက်တွေ့မြေပြင် အခြေအနေများနှင့် ကင်းကွာလျက်ရှိပါသည်။ စစ်ကောင်စီတပ်သားများ၏ ကျေးရွာအလိုက် မီးရှိုဖျက်ဆီးမှု၊ ဒေ သခံအရပ်သားပြည်သူများအား ဖမ်းဆီးသတ်ဖြတ်မှုများကို နေ့စဉ်မြင်တွေ့ကြားသိနေရသည်မဟုတ်ပါလား။

“အရေးပေါ်ကာလဆိုင်ရာ ပြဋ္ဌာန်းချက်များနှင့်အညီ ဆောင်ရွက် ပြီးစီးပါက ဖွဲ့စည်းပုံအခြေခံဥပဒေ(၂၀၀၈)နှင့် အညီ လွတ်လပ်ပြီးတရားမျှတသော ပါတီစုံဒီမိုကရေစီ အထွေထွေရွေးကောက်ပွဲကို ပြန်လည်ကျင်းပ၍ အနိုင်ရ သည့်ပါတီအား ဒီမိုကရေစီစံနှုန်းများနှင့်အညီ နိုင်ငံတော်တာဝန်အား လွှဲအပ်နိုင်ရေး ဆက်လက်ဆောင်ရွက် သွားမည်”ဆိုသော စစ်ခေါင်းဆောင်၏ ကတိစကားသည်လည်း စစ်အာဏာသိမ်းကာလ အစကတည်းက ရေ ပက်မဝင်ပြောဆိုနေသော နှုတ်ထွက်စကားဖြစ်နေပြီး အရေးပေါ်ကာလကိုသာ စိတ်တိုင်းကျသက်တမ်းတိုးခွင့် ရှိနေသည်ကို တွေ့ရပါသည်။

ထိုနည်းတူစွာ NUG အပါအဝင် PDF များနှင့် ၎င်းတို့အား ကူညီနေသော ERO များကို ပြတ်ပြတ်သားသား အရေး ယူသွားမည်ဆိုသော သတိပေးစကားသည်လည်း စစ်ခေါင်းဆောင်နှင့် မြင်ပြင်သတင်းအချက်အလက်များ အကြား ကင်းကွာမှုကို ပြသနေသည်ဟု ဆိုနိုင်ပါသည်။

စစ်ရေးပြအခမ်းနားမတိုင်ခင် မတ်လ ၂၆ရက်နေ့ ည ၇နာရီခွဲခန့်အချိန်က ကိုဇေယျာသော်မွေးနေ့အဖြစ် စစ်ရေး ပြလေ့ကျင့်ရေးကွင်းအား ရှော့တိုက်ဒုန်းဖြင့် တိုက်ခိုက်ခံရသည့် သတင်းဖြစ်စဉ်ကိုပင် ဗိုလ်ချုပ်မှူးကြီးတစ် ယောက် သိရှိနိုင်ပါ့မလားဟု မေးခွန်းထုတ်ဖွယ်ဖြစ်သည်။

ထူးခြားသည့် ဓာတ်ပုံများမှ သတင်းစကား

လူမှုကွန်ယက်စာမျက်နှာများတွင် ပျံ့နှံ့လာနေသော ဗိုလ်ချုပ်မှူးကြီး၏ ဓာတ်ပုံများကမူ ပြည်သူလူထုအကြား သတင်းစကားမျိုးစုံ ပေးပို့လျက်ရှိနေပါသည်။ ဗိုလ်ချုပ်မှူးကြီးသည် အထက်တွင်ဆိုခဲ့သလို မြေပြင်သတင်းအ ချက်အလက်များနှင့် ကင်းကွာနေခြင်းမဟုတ်ဘဲ လက်တွေ့အရှိတရားကို ဖုံးကွယ်ကာ ၎င်းကိုယ်တိုင်နှင့် ၎င်း၏ အစေအပါး၊ အနွှယ်အပွားများကို လိမ်ညာနေခြင်းဖြစ်သည်ဟု ရှုမြင်ကြပါသည်။

ဖော်ပြပါဓာတ်ပုံပါ ဗိုလ်ချုပ်မှူးကြီး၏မျက်လုံးအစုံသည် တစ်စုံတစ်ရာအပေါ် စိုးရွံ့စိတ်၊ မမြင်ရသော အရာ တစ်ခုအပေါ် သံသယဖြင့် ကြောက်စိတ်ကို ပြသနေသည်ဟု ဆိုကြသည်။ ၎င်းတို့အား ဆန့်ကျင်တော်လှန်ကြ သော နွေဦးတော်လှန်ရေးအင်အားစုများအပေါ် ခြိမ်းခြောက်သတိပေးစကားများ နှုတ်မှပြောဆိုနေသည့်တိုင် မျက်နှာအမူအရာသည် အတွင်းစိတ်တွင် ဖြစ်ပေါ်နေသော အကြောက်တရားကို လစ်ဟပြနေသည်ဟု ရှုမြင် သုံးသပ်နိုင်ပါသည်။ စစ်ရေးပြအခမ်းအနားသို့ တက်ရောက်ပြီး ဗိုလ်ချုပ်မှူးကြီး၏ မိန့်ခွန်းအား လက်ခုတ်သြ ဘာပေးကာ နာယူနေကြသူများက အထက်ပါဗိုလ်ချုပ်မှူးကြီး၏ လျှပ်တပျက်မြင်ကွင်းဓာတ်ပုံကို တိုက်ရိုက် မြင်တွေ့ကြရမည် မဟုတ်ချေ။

ယခုဓာတ်ပုံသည် ဦးသိန်းစိန်၏ ခြေအစုံကို ဗိုလ်ချုပ်မှူးကြီးမှ ဦးတိုက်နေခြင်းဖြစ်သည်။ စစ်ယူနီ‌ဖောင်းချွတ် သမ္မတဟောင်းအား ဦးတိုက်နေသာ ဗိုလ်ချုပ်မှူးကြီး၏ မြင်ကွင်းပုံရိပ်သည် အင်မတန်ရိုကျိုးသဖွယ် ဖြစ်နေ သော်လည်း အာဏာသိမ်းစစ်အုပ်စုတစ်ခုလုံး၏ မလုံခြုံမှုနှင့် အချင်းချင်းရိုင်းပင်းလက်တွဲနိုင်ရေးအတွက် စိုးရိမ် ကြောင့်ကျမှုကို မြင်တွေ့ရပါသည်။

စစ်ကောင်စီဥက္ကဋ္ဌနှင့် ဇနီးသည် ယခင်စစ်တပ်ခေါင်းဆောင်ဟောင်းများဖြစ်သည့် ဦးသိန်းစိန်၊ ရွေးကောက်ပွဲ ကော်မရှင်ဥက္ကဋ္ဌဟောင်း ဦးတင်အေး အပါအဝင် အငြိမ်းစားတပ်အရာရှိကြီး ၁၉ ဦးနှင့် ဇနီး ၇ ဦးတို့အား မတ် ၂၇ ရက်နေ့လယ်ပိုင်းတွင် ကန်တော့ခဲ့ပြီး ယင်းကန်တော့ပွဲတွင် ကန်တော့ခံအငြိမ်းစား တပ်အရာရှိကြီးများ ကိုယ်စား ဒု-ဗိုလ်ချုပ်ကြီး ထွန်းကြည်(ငြိမ်း)နှင့် ဦးသိန်းစိန်တို့က ဩဝါဒပေးခဲ့သည်ဟု ဆိုပါသည်။

ပြည်သူလူထု၏ ရွေးကောက်ပွဲဆန္ဒမဲလက်မှတ်များအား ပစ်ပယ်ကာ တိုင်းပြည်အာဏာလုယူထားသော အာ ဏာသိမ်းစစ်အုပ်စုသည် လူထုထောက်ခံမှုအောက်ဆုံးအထိ ရောက်ရှိနေသကဲ့သို့ ပြည်သူလူထုတစ်ရပ်လုံး၏ ဆန့်ကျင်တော်လှန်မှုကိုပါ တောင်တန်းမြေပြန့်တဝှမ်းလုံး ရင်ဆိုင်ကြုံတွေ့နေရသည့်အတွက်ကြောင့်သာ စစ် အုပ်စုအသိုင်းအဝိုင်းနှင့် လူထုအပေါ် တစုံတခုသြဇာသက်ရောက်မှုရှိခဲ့သော စစ်ခေါင်းဆောင်ဟောင်းများ၏ ပုံရိပ်ကို အသုံးချခဲ့ခြင်း ဖြစ်နိုင်ကြောင်း ရှုမြင်နိုင်ပါသည်။ ကုလသမဂ္ဂစင်မြင့်ထက်တွင် မိန့်ခွန်းပြောဆိုခဲ့ဖူး သော သမ္မတဟောင်း ဦးသိန်းစိန်အပေါ် နိုင်ငံတကာအသိုင်းအဝိုင်း၏ ထောက်ခံအားပေးခဲ့သည့် အတိတ်ပုံရိပ် များသည်လည်း ဘေးကြပ်နံကြပ်ရိုက်နေသော နိုင်ငံတကာဖိအားများကို တွန်းလှန်စည်းရုံးရာတွင် ဗိုလ်ချုပ်မှူး ကြီးအတွက် ခွန်အားတစ်ရပ်ဟု မှတ်ယူနေပုံရပါသည်။

အထက်ပါမြင်ကွင်းသည် စစ်အာဏာရှင်ဟောင်း ဗိုလ်ချုပ်နေဝင်း၏ မိသားစုဝင်များနှင့် စစ်ခေါင်းဆောင်တို့ ဇနီးမောင်နှံ တွေ့ဆုံမှုဖြစ်သည်။ ဘက်ပေါင်းစုံ၊ အလွှာပေါင်းစုံမှ လူထုထောက်ခံမှုကျဆင်းနေသော ဗိုလ်ချုပ် မှူးကြီးမင်းအောင်လှိုင်အနေဖြင့် စစ်တပ်နှင့် နှီးနွှယ်ပက်သက်သော လူပုဂ္ဂိုလ်၊ အဖွဲ့အစည်းတိုင်းကို ကောင်းမွန် သည့်ဆက်ဆံရေးရှိကြောင်း ထုတ်ဖော်ပြသလျက်ရှိသကဲ့သို့ မကြာခဏဆိုသလို အမျိုးသားဒီမိုကရေစီအဖွဲ့ချုပ် (NLD)နှင့် ပတ်သက်သော လူပုဂ္ဂိုလ်များ၏ ပုံရိပ်ကို အသုံးချကာ လူထုထောက်ခံမှုကို ဆွဲတင်လေ့ရှိပါသည်။

NLD နာယကဟောင်း ဗိုလ်ချုပ်ကြီးတင်ဦး၊ NLD မှ ရွေးချယ်တင်မြောက်ခဲ့သော သမ္မတဟောင်းဦးထင်ကျော်တို့ သည် ဗိုလ်ချုပ်မှူးကြီးမင်းအောင်လှိုင်နှင့် စစ်အုပ်စုအတွက် အသုံးချခံသပ်သပ် ဓာတ်ပုံရိုက်ခြင်းမျိုးကြုံတွေ့ခဲ့ ရသည်ကို သတိပြုမိပါသည်။

သုံးသပ်တင်ပြချက်

ဗိုလ်ချုပ်မှူးကြီး၏ တပ်မတော်နေ့မိန့်ခွန်းတွင် လက်တွေ့မကျ၊ ဖြစ်နိုင်ချေနည်းသော နှုတ်ထွက်စကားများကို တွေ့ရှိခဲ့ရသကဲ့သို့ ၎င်းတို့ချမှတ်ထားသော ရှေ့လုပ်ငန်းစဉ်များအတိုင်း မဖြစ်ဖြစ်အောင် အချိန်ယူလုပ်ဆောင် သွားမည့် အလားလာများကိုလည်း ပြသနေပါသည်။ NUG ၊ PDF နှင့် ERO များအား ပြတ်ပြတ်သားသားအရေး ယူမည်ဟု ပြောဆိုခြင်းသည် လက်တွေ့မကျဟု ဆိုနိုင်သော်လည်း ရွေးကောက်ပွဲနှင့် ရွေးကောက်ပွဲအတွက် ပြင်ဆင်မှုများကိုမူ အချိန်ယူကာ မဖြစ်ဖြစ်အောင် လုပ်ဆောင်မည့်လက္ခဏာများ မြင်တွေ့ရပါသည်။

၎င်းတို့ကျင်းပမည့် ရွေးကောက်ပွဲတွင် နိုင်သူအကုန်ယူစနစ် (FPTP-First Past The Post) နှင့် အချိုးကျ ကိုယ်စားပြုစနစ် (PR-Proportional Representation) ကို ပေါင်းစပ်ကျင့်သုံးသွားမည်ဟု ဆိုထားပြီး မတ်လ ၂၈ ရက်တွင် NLD ပါတီအပါအဝင် ပါတီပေါင်း (၄၀)ကို ဖျက်သိမ်းကြောင်း ကြေညာခဲ့ပါသည်။

အာဏာသိမ်းစစ်အုပ်စုသည် ၎င်းတို့ပြန်လည်အသက်သွင်းမည့် စစ်တပ်စပွန်ဆာဒီမိုကရေစီစနစ်တစ်ရပ်ကို အ ကောင်အထည်ဖော်နိုင်ရေး တစိုက်မတ်မတ်ပြုမူဆောင်ရွက်နေသော်လည်း နွေဦးတော်လှန်ရေးအင်အားစုများ ၏ ခုခံ‌တော်လှန်မှု၊ နိုငံတကာအသိုင်းအဝိုင်း၏ ဖိအားနှင့် ပြည်သူလူထု၏ ဆန့်ကျင်မှုများကို စိုးရိမ်ထိပ်လန့်နေ ကြောင်း အထက်ဖော်ပြပါစစ်ခေါင်းဆောင်၏ ဓာတ်ပုံများက သတင်းစကားပါးလျက်ရှိပါသည်။ ထိုထက် ပို၍ ကြောက်ရွံ့နေသည်ကတော့ စစ်အုပ်စုအချင်းချင်းအကြား စည်းရုံးမှုပြိုကွဲမည်ကို ပိုမိုကြောက်လန့်နေနိုင် ကြောင်း ရှုမြင်ရပါသည်။

ဗိုလ်ချုပ်မှူးကြီးမင်းအောင်လှိုင်၏ ဓာတ်ပုံများမှ သတင်းစကား သို့မဟုတ် စစ်ခေါင်းဆောင်၏ အကြောက် တရားများသည် နွေဦးတော်လှန်ရေးအင်အားစုများအတွက် ခွန်အားတစ်ရပ်ဖြစ်လာနိုင်သလားဆိုသည်ကမူ အင်အားစု တစ်စုတစ်ဖွဲ့ချင်းစီ၏ ချဉ်းကပ်မှုအပေါ်တွင်သာ တည်မှီနေလိမ့်မည်ဟု သုံးသပ်တင်ပြအပ်ပါသည်။

(မှတ်ချက် ။ ။ BNI-Myanmar Peace Monitor မှ အပတ်စဉ်သတင်းသုံးသပ်ချက်စာစောင် အမှတ် – ၉၈မှ ကူးယူ ဖော်ပြထားခြင်း ဖြစ်သည်။)