ရှမ်းပြည်နယ်တောင်ပိုင်း၊ပင်လောင်းမြို့နယ်၊လုံးပျဉ်ရွာ စစ်ရှောင် လင်မယားနှစ်ဦးသည် မေလ၅ရက်တွင် ရွာသို့ ဆိုင်ကယ်ဖြင့် ရိက္ခာပြန်ယူစဉ် ရွာမရောက်ခင် ဆိုင်းဘုတ်အနီးတွင် ဆိုင်ကယ်က မိုင်းနင်းမိပြီး ပြင်းထန်စွာဒဏ်ရာရရှိခဲ့ကြောင်း သိရသည်။
မိုင်းနင်းမိသည့် စစ်ရှောင်လင်မယားသည် အသက်၄၆နှစ်အရွယ်ရှိ ဦးဘုန်းနှင့် အသက်၄၁အရွယ်ရှိ ဒေါ်နန်းခင်ထွေးတို့ ဖြစ်ပြီး ဆောင်းပြောင်းဆေးရုံတွင် ဆေးကုသနေသော်လည်း ဒဏ်ရာ ပြင်းထန်ခြင်းကြောင့် တောင်ကြီးမြို့ရှိဆေးရုံသို့ ပြောင်းကုသရကြောင်း သိရသည်။
“အရင်နှစ်က ရွာပြန် စိုက်ပျိုးပြီး စုထားတဲ့ ရိက္ခာတစ်ချို့ရှိတယ်။အဲဒါပြန်ယူတာ။ပြီးရင် ခုကမျို့စေ့ တွေ မြေချတော့မယ်အချိန်ရောက်တော့မယ်လေ။ သူတို့ ပြောင်းမျိုးစေ့ ဝယ်ထားတာလည်း ပြန်ယူမယ်ပြောပြီး ပြန်သွားတာ။ သူတို့ဆိုင်ကယ်က ရွာမဝင်ခင်ဘဲ မိုင်းနင်မိသွားတယ်”ဟု လုံပျဉ်ရွာနေ အသက်၂၀ကျော်အမျိုးသမီးကသျှမ်းသံတော်ဆင့်ကိုပြောသည်။
ဦးဘုန်းသည် ဘယ်ခြေတောင်စုတ်ပြတ်၊ဘယ်ပေါင်နှင့် ဘယ်ခြေသလုံမိုင်းအစဝင်ဒဏ်ရာနှင့်မခင်ထွေးသည် ဘယ်ပေါင်ဘယ်ခြေကျင်းဝတ်ညာခြေကျင်းဝတ်အစထိမှန်ဒဏ်ရာများ အသီးသီးရရှိခဲ့ကြောင်း သိရသည်။
ပြီးခဲ့သည့် ၂၀၂၃ခုနှစ် တိုက်ပွဲ ဖြစ်ပွားသည့် အချိန်တွင်လည်း ပင်လောင်းတောင်ဘက်ရှိ နမ်းနိန်း၊လုံးပျဉ်၊တောင်မဲသင်း စသည့် ကျေးရွာများတွင် မြေမြုပ်မိုင်း နင်းမိသူ ၁၀ဦးထက်မနည်း ရှိခဲ့ကြောင်း သိရသည်။