သျှမ်းပြည် ဆီဆိုင်မြို့နယ် ဝိန်းကောင်ကျေးရွာရှိ ဝိန်းကောင်တံတားကို ကရင်နီအမျိုးသားများကာကွယ်ရေးတပ် (KNDF)နှင့် ပြည်သူ့ကာကွယ်ရေးတပ် PDF များက မိုင်းထောင်ဖောက်ခွဲဖျက်ဆီးခဲ့သည်ဟု စစ်ကောင်စီက ဝါဒဖြန့်ချိနေလျက်ရှိသည်။

စစ်ကောင်စီတပ်၏ တပ်မတော်ကာကွယ်ရေးဦးစီးချုပ်ရုံး (CINCDS) မှ “ဒေသအတွင်း လူမှုစီးပွားရေးဘဝဖွံ့ဖြိုး တိုးတက်စေရေးနှင့် ပြည်သူများခရီးသွားလာမှု လွယ်ကူမြန်ဆန်စေရေးအတွက် အခြေခံအဆောက်အုံဖြစ်သည့် လမ်း၊ တံတားများ ဖောက်လုပ်တည်ဆောက်ပေးလျက်ရှိရာ အကြမ်းဖက်သောင်းကျန်းသူများက လမ်း၊ တံတားများအား လက်လုပ်မိုင်း၊ လက်လုပ်ဗုံးများဖြင့် မိုင်းထေင်ဖောက်ခွဲ၊ တိုက်ခိုက်ခြင်းများကို ဆင်ခြင်တုံတရား နည်းပါးစွာဖြင့် ကျူးလွန်ပြုလျက်ရှိသည်” ဟုဆိုကာ ရေးသားဖြန့်ချိခဲ့သည်။

မူရင်းလင့် – https://archive.ph/DDnpQ

ထို့အတူ စစ်ကောင်စီဝါဒဖြန့် တယ်ရီဂရမ်ချယ်နယ်တစ်ခုဖြစ်သည့် PAN အကောင့်ကလည်း အဆိုပါအကြောင်းအရာကို ထပ်မံဖြန့်ချိထားပြီး ကြည့်ရှု့သူပေါင်း ၂ ထောင်ကျော်ရှိသည်။

မူရင်းလင့် – https://archive.ph/ndKP0

သျှမ်းသံတော်ဆင့် အချက်အလက်စစ်ဆေးသူများအနေဖြင့် ထိုအကြောင်းအရာကို
ယုံကြည်စိတ်ချရသော မီဒီယာများနှင့်သက်ဆိုင်စစ်ဆေးခြင်းလည်းကောင်း၊ ဒေသခံများကို မေးမြန်းအတည်ပြုခြင်းလည်းကောင်း စစ်ဆေးမှုပြုလုပ်ခဲ့သည်။

ဆီဆိုင်မြို့မှ ဝိန်းကောင်ကျေးရွာအကြားရှိ ဝိန်းကောင်တံတားကို ဧပြီ ၂၇ ရက်နေ့ ညပိုင်းက စစ်ကောင်စီတပ်နှင့် ပြည်သူ့စစ် PNO တို့မှ တော်လှန်းရေးတပ်ဖွဲ့များ၏စစ်ကူလမ်းကြောင်း မလာနိုင်ရန်အတွက် မိုင်းခွဲဖျက်ဆီးခဲ့ကြောင်း၊ ဒေသခံနေအိမ်များကိုလည်း ဒရုန်း ၂ စီးဖြင့် ဗုံးကြဲခဲ့ကြောင်း Black Fox Southern Shan Local Defence Force တပ်ဖွဲ့ကို ကိုးကား၍ ဖယ်ဒရယ် FM သတင်းတစ်ပုဒ်တွင် ဖော်ပြထားသည်။

မူရင်းလင့် – https://shorturl.at/fyzIO

အလားတူ ပအိုဝ်းအမျိုးသားလွတ်မြောက်ရေးတပ်မတော် PNLO က “ဆီဆိုင်မြို့နယ် ဝိန်းကောင်ကျေးရွာအနီးရှိ သဘက်ချောင်းတံတားကို စစ်ကောင်စီတပ်ဖွဲ့က မိုင်းဖြင့်ဖော်ခွဲဖျက်စီးလိုက်သည်” ဟုဆိုကာ ဧပြီလ ၂၈ ရက်၌ ထုတ်ပြန်ထားသည်။

ထို့အပြင် ယုံကြည်စိတ်ချရသည့် သတင်းဌာနများတွင် ဆီဆိုင်မြို့အတွက် အရေးပါသည့် ဝိန်းကောင်ကျေးရွာမှ သဘက်ချောင်းတံတား (ဝိန်းကောင်တံတား) ကို စစ်ကောင်စီတပ်နှင့် ပြည်သူ့စစ် PNO တို့ မိုင်းခွဲ့ဖျက်စီးခဲ့သည်ဟု ဒေသခံနှင့် PNLO ထုတ်ပြန်ချက်ကိုကိုးကား၍ RFA သတင်းတစ်ပုဒ်တွင်လည်း ဖော်ပြထားသည်။

မူရင်းလင့် – https://shorturl.at/ikA04

ဒေသအတွင်း သတင်းဌာနတစ်ခုဖြစ်သည့် The People’s Voice (ခမ်းသားငေါဝ်း) ကလည်း ဆီဆိုင်မြို့နယ် ဝိန်းကောင်းကျေးရွာမှ သဘက်ချောင်းတံတားအား စစ်ကောင်စီတပ်ဖွဲ့ဝင်များက မိုင်းခွဲဖျက်စီးခဲ့ခြင်းဖြစ်ကြောင်း ရေးသားဖော်ပြထားသည်။

မူရင်းလင့် – https://shorturl.at/lDLS4

ထို့ကြောင့် အထက်ပါ ဖော်ပြခဲ့သည့် အချက်အလက်တွေနှင့် တိုက်ဆိုင်စစ်ဆေးသည့် အခါမှာ ဆီဆိုင်မြို့၊ ဝိန်းကောင်တံတားကို KNDF နှင့် PDF တို့ကမိုင်းခွဲဖျက်စီးခဲ့ဟု စစ်ကောင်စီမှ ထုတ်ပြန်သည့် သတင်းအချက်အလက်များ မှားယွင်းနေကြောင်းတွေ့ရှိရသည်။

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများသို့ သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။