သျှမ်းပြည်အရှေ့ပိုင်း အထူးဒေသ (၄) မိုင်းလားတပ်ဖွဲ့ (NDAA) သည် စစ်ကော်မရှင်နှင့် စစ်ရေးအရ ပူးပေါင်းလိုက်ပြီဖြစ်ကြောင်းနှင့် တော်လှန်ရေးအဖွဲ့များကို တိုက်ခိုက်ရန် အင်အားနှစ်သောင်းဖြင့် စစ်ပြင်နေပြီဖြစ်ကြောင်း ဓာတ်ပုံများနှင့်တကွ လူမှုကွန်ရက်တွင် ပျံ့နှံ့နေသည်။

ပြီးခဲ့သည့် ရက်ပိုင်းအတွင်း “နောင်ရိုး” အမည်ရှိ လူမှုကွန်ရက်အသုံးပြုသူတစ်ဦးက NDAA တပ်ဖွဲ့ဝင်များ လက်နက်ကိုင်ဆောင်ထားသည့် ဓာတ်ပုံများနှင့်အတူ အဆိုပါသတင်းကို စတင်ဖြန့်ဝေခဲ့ခြင်း ဖြစ်သည်။

၎င်း၏ရေးသားမှုတွင် ဒုတိယဗိုလ်ချုပ်ကြီး ရာပြည့်၏ မိုင်းလားခရီးစဉ်အပြီး၌ NDAA တပ်ဖွဲ့ဝင် အင်အားနှစ်သောင်းခန့်က စစ်ကော်မရှင်နှင့် ပူးပေါင်းကာ တော်လှန်ရေးအင်အားစုများကို တိုက်ခိုက်ရန် အသင့်ရှိနေပြီဟု ဖော်ပြထားသည်။

၎င်းပို့စ်ကို Reaction ပြုလုပ်သူနှင့် ပြန်လည်မျှဝေသူ အများအပြားရှိခဲ့သည်။

မူရင်းလင့်ခ် – https://shorturl.at/aH0a0

သတင်းစိစစ်ချက်

MFCN အဖွဲ့ဝင် သျှမ်းသံတော်ဆင့်၏ အချက်အလက်စစ်ဆေးသူသည် အဆိုပါပျံ့နှံ့နေသော သတင်းနှင့် ဓာတ်ပုံများကို အချက်အလက် စစ်ဆေးခဲ့ရာတွင် အများပြည်သူကို လှည့်စားရန် လုပ်ကြံဖန်တီးထားသည့် သတင်းမှားဖြစ်ကြောင်းစိစစ် အတည်ပြုနိုင်သည်။

လူမှုကွန်ရက်တွင် အသုံးပြုထားသည့် ဓာတ်ပုံများကို Google Reverse Image Search ဖြင့် စစ်ဆေးခဲ့ရာ အဆိုပါဓာတ်ပုံများသည် မိုင်းလားတပ်ဖွဲ့၏ လက်ရှိလှုပ်ရှားမှုများ မဟုတ်ကြောင်း တွေ့ရှိရသည်။

၎င်းဓာတ်ပုံများသည် တရုတ်လူမှုကွန်ရက်တစ်ခုဖြစ်သည့် Douyin (ID: XYbaby2023) မှ ကူးယူထားသည့် Screenshot များဖြစ်ပြီး၊ အမှန်တကယ်တွင် တရုတ်ကျောင်းသားများ၏ စစ်သင်တန်းဗီဒီယိုများသာ ဖြစ်သည်။

ယင်းဓာတ်ပုံများကို ၂၀၂၅ ခုနှစ်၊ စက်တင်ဘာလကတည်းက Instagram တွင် ဖော်ပြခဲ့ပြီးဖြစ်သဖြင့် လက်ရှိ နိုင်ငံရေးအခြေအနေနှင့် သက်ဆိုင်ခြင်းမရှိပါ။

Instagram – https://www.instagram.com/reels/DOTIKWED-hH/

အဆိုပါသတင်းနှင့်ပတ်သက်၍ NDAA ၏ အထွေထွေအတွင်းရေးမှူး ဦးကြည်မြင့်က MPA သတင်းဌာနသို့ ဖြေကြားရာတွင် ၎င်းတို့အနေဖြင့် မည်သည့်တော်လှန်ရေးအဖွဲ့ကိုမျှ တိုက်ခိုက်ရန် အစီအစဉ်မရှိကြောင်းနှင့် အေးချမ်းစွာသာ နေထိုင်လျက်ရှိကြောင်း အတိအလင်း ငြင်းဆိုထားသည်။

MPA သတင်းဌာနကဖော်ပြထားတဲ့သတင်း- https://shorturl.at/HGliC

ပြီးခဲ့သည့် ဇွန်လအတွင်း စစ်ကော်မရှင်၏ ငြိမ်းချမ်းရေးကိုယ်စားလှယ်အဖွဲ့ (NSPNC) နှင့် မိုင်းလားအဖွဲ့တို့ တွေ့ဆုံခဲ့ခြင်းမှာ ဒေသတွင်းတည်ငြိမ်ရေးအတွက် သံတမန်ရေးအရ အလွတ်သဘောတွေ့ဆုံမှုသာ ဖြစ်သည်။

သို့သော် အဆိုပါတွေ့ဆုံမှုကို အခွင့်ကောင်းယူ၍ စစ်တပ်ထောက်ခံသည့် လူမှုကွန်ရက်စာမျက်နှာများက တော်လှန်ရေးအင်အားစုများအကြား သံသယဖြစ်စေရန်နှင့် စစ်ကော်မရှင်တပ်များအတွက် စိတ်ဓာတ်မြှင့်တင်ရန် ဝါဒဖြန့်ချိခဲ့ခြင်းဖြစ်သည်။

သုံးသပ်ချက်

မိုင်းလားတပ် (NDAA) နှင့် စစ်ကော်မရှင် ပူးပေါင်းတိုက်ခိုက်မည်ဆိုသည့် သတင်းသည် လုပ်ကြံဖန်တီးထားသော သတင်းမှားဖြစ်ပါသည်။

အသုံးပြုထားသည့် ဓာတ်ပုံများသည်လည်း အခြားနိုင်ငံမှ ဗီဒီယိုများမှ ရယူထားသောပုံများ ဖြစ်သောကြောင့် ယင်းသတင်းကို “သတင်းမှား” အဖြစ် အတည်ပြုနိုင်ပါသည်။

စာဖတ်သူများအနေဖြင့် မှန်ကန်သည့်သတင်း ဟုတ်၊ မဟုတ် အတည်ပြုမေးမြန်းလိုလျှင်ဖြစ်စေ၊ သတင်းတု/သတင်းမှားဖြစ်နိုင်သည်ဟု သံသယရှိလျှင်ဖြစ်စေ Fact-Checking စစ်ဆေးပေးသည့် သတင်းဌာန သို့မဟုတ် အဖွဲ့အစည်းများသို့ သွားရောက်မေးမြန်းကြရန် တိုက်တွန်းလိုပါသည်။

Myanmar Fact-Checking Network အဖွဲ့ဝင်များ အချက်အလက်စစ်ဆေးထားသည့် သတင်းများကို အောက်ဖော်ပြပါ လင့်ခ်များမှတစ်ဆင့် ဝင်ရောက်ဖတ်ရှုနိုင်ပါသည်။