သျှမ်းပြည် သိန္နီမြို့နယ် ကောင်းဟော်ကျေးရွာအုပ်စု ဟိုတာရွာရှိ ဆောက်လုပ်လက်စ ခရစ်ယာန်ဘုရားကျောင်းတစ်ခုတွင်

သန့်ရှင်းရေးဝင်လုပ်သည့် အမျိုးသား ၂ ဦး မြေမြုပ်မိုင်းနင်းမိပြီး၊ ၁ ဦးသေဆုံးသွားကြောင်း စုံစမ်းသိရသည်။ 

ဖြစ်စဉ်မှာ ယမန်နေ့ မေလ ၆ ရက် နံနက်ပိုင်း ၁၁ နာရီအချိန်တွင် ဖြစ်ပွားခဲ့ပြီး မိုင်းနင်းမိသူ အမျိုသား ၂ ဦးထဲမှ ၁ ဦးသည် ပြင်းထန်သည့်ဒဏ်ရာများကြောင့် သေဆုံးသွားခဲ့ကြောင်း သိန္နီမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ကချင် ဘုရားကျောင်းလုပ်အားပေးရင်း မိုင်းထိတာ။ အစတော့ သူတို့နှစ်ယောက်ကို ဆိုင်ကယ်ပေါ်တင်ပြီး ဆေးရုံခေါ်သွားသေးတယ်။ ကံမကောင်းစွာနဲ့ဘဲ တစ်ယောက်ကတော့ ဆုံးသွားတယ်” ဟု ၎င်းကပြောသည်။ 

သေဆုံးသွားသူမှာ အသက် ၂၄ နှစ်အရွယ် အမျိုးသားတစ်ဦးဖြစ်ပြီး ၎င်းနာမည်နှင့် နေရပ်လိပ်စာ အတိအကျမသိရှိရကြောင်း ဆိုသည်။ အလားတူ ထိခိုက်ဒဏ်ရာသူ အမျိုးသားတစ်ဦးကိုလည်း လက်ရှိတွင် သိန္နီမြို့ဆေးရုံမှာ ဆေးကုသနေရသည်ဟု သိရသည်။ 

သိန္နီမြို့တွင် “၁၀၂၇ စစ်ဆင်ရေး” တိုက်ပွဲပြီးသည့်နောက် ၄ လကျော်ကာလမှာ ဒေသခံများနေရပ် ပြန်လာနိုင်ကြသော်လည်း မည်သည့် အဖွဲ့အစည်းများမှ နယ်မြေရှင်းလင်းရေး မလုပ်နိုင်သကဲ့သို့ မြေမြုပ်မိုင်းအကြောင်းနှင့်ပတ်သက်၍ အသိပညာပေးခြင်းမရှိခဲ့ကြောင်း ဒေသခံများကပြောကြသည်။

“အခုဘယ်အဖွဲ့အစည်းမှ မရှင်းပေးဘူး။ သိန္နီမှာအခုဆို ကိုးကန့်တပ်ဖွဲ့ MNDAA တစ်ဖွဲ့ပဲရှိတာ။ မိုင်းကတော့ အများဆုံးသိန္နီတောင်မြို့မှာ ကျန်နေတာ။ စစ်ဖြန်တုန်းကလည်း ဟိုဘက်ကမ်းတွေပဲ အများကြီး၊ အကြာကြီး ဖြစ်တော့ဘယ်သူတွေမိုင်းထောင်ထားလဲ၊ ဘယ်နေရာလဲဆိုတာ ဘယ်သူမှမသိဘူး။ ပြည်သူတွေအတွက် အန္တရာယ် ပိုဖြစ်တာပေါ့။ အခုဆိုအိမ်ပြန်လာတဲ့ရွာသူ၊ ရွာသားတွဆို မိုင်းအသိပညာလည်းမရှိဘူး” ဟု သိန္နီမြို့ဒေသခံ အသက် ၄၀ ကျော်အမျိုးသမီးတစ်ဦးက ဆက်ပြောသည်။ 

ထို့အပြင် နေရပ်သို့ပြန်လာသည့် ပြည်သူအများစုသည် နဂိုလမူအတိုင်းကောင်းမွန်သည့် နေအိမ်ထဲတွင် နေရသည်မဟုတ်ဘဲ လက်နက်ကြီးကြောင့် ယိုယွင်းပျက်စီးသွားသည့် အိမ်ပျက်ကြီးထဲမှာသာ နေထိုင်ရကြောင်း သိရသည်။

ပြီးခဲ့သည့် ဧပြီလ ၂၁ ရက်တွင်လည်း သိန္နီမြို့နယ် ကောင်းဟော်ကျေးရွာတွင် နေထိုင်သူ စိုင်းအောင်မင်းသည်လည်း ၎င်းအိမ်ခြံနောက်ဖေးသို့သွားပြီး ဟင်းရွက်သွားခူးနေစဉ် မြေမြုပ်မိုင်းနင်းမိ၍ ဒဏ်ရာပြင်းထန်စွာနှင့် သေဆုံးခဲ့ရသည်။

၂၀၀၇ ခုနှစ်မှ ၂၀၂၂ ခုနှစ်အထိ သျှမ်းပြည်တွင် မိုင်းနှင့်ပေါက်ကွဲစေတတ်သော ပစ္စည်းများကို မသိဘဲ ကိုင်မိပေါက်မိ၍ သေဆုံးမှု ၂၆.၅၅ ရာခိုင်နှုန်း အမြင့်ဆုံးဖြစ်ခဲ့ကြောင်း မြေမြုပ်မိုင်းနှင့်ထပ်ဆင့်ပေါက်ကွဲစေသော လက်နက်ပစ္စည်းများ စောင့်ကြည့်လေ့လာရေးအဖွဲ့ Landmine & Cluster Munition Monitor မှ ၂၀၂၃ နှစ်ကုန်ပိုင်းက ထုတ်ပြန်ထားသည်။

စစ်တပ်အာဏာသိမ်းပြီးနောက်ပိုင်း မြန်မာတစ်ဝှမ်း နေပြည်တော်မှလွဲ၍ တိုင်းနှင့်ပြည်နယ် အသီးသီးတွင် မြေမြုပ်မိုင်းနှင့် ပေါက်ကွဲတတ်သော စစ်အကြွန်းအကျန်များကြောင့် ထိခိုက်ဒဏ်ရာရသူ သိသိသာသာတိုးလာနေပြီး မြို့နယ်ပေါင်းတစ်ဝက်ကျော်မှာ မြေမြုပ်မိုင်းအန္တရာယ် ကျရောက်နေပြီဖြစ်ကြောင်းလည်း ထုတ်ပြန်ချက်တွင် ရေးသားဖော်ပြထားသည်။