သျှမ်းပြည် တောင်ကြီးခရိုင် ဆီဆိုင်မြို့နယ်တွင် ဒေသခံ လုံခြုံရေးအကြောင်းပြ၍ ပြည်သူ့စစ်တပ်ဖွဲ့ PNO မှ ကားရှိသည့် ဒေသခံနေအိမ်ထံ ကားဘီး ၁ ဘီးလျှင် ကျပ်ငွေ ၁ သိန်း သတ်မှတ်ပြီး ကျည်ဆံဖိုးကောက်ခံ နေကြောင်း စုံစမ်းသိရှိရသည်။

ပြီးခဲ့သည့် မတ်လမှစပြီး ဆီဆိုင်မြို့နယ် လွယ်ပွတ်ကျေးရွာအုပ်စု၊ တောင်ရှေ့ကျေးရွာအုပ်စု နှင့် နောင်ကျောကျေးရွာအုပ်စုရှိ ဒေသခံများကို ဒေသခံလုံခြုံရေးအတွက်ဟုဆိုပြီး ပအိုဝ်း ပြည်သူ့စစ်တပ်ဖွဲ့ PNO မှ ကားရှိသည့် ဒေသခံနေအိမ်ထံ ကားဘီး ၁ ဘီးလျှင် ကျပ်ငွေ ၁ သိန်းသတ်မှတ်ပြီး ကောက်ခံပေးရန် ရပ်ရွာသူကြီးများကို အစည်းဝေးခေါ်ခဲ့ကြောင်း ဆီဆိုင်မြို့ဒေသခံ တစ်ဦးက သျှမ်းသံတော်ဆင့်ကို ပြောသည်။

“ သူတို့က ရွာဖက်ကို အရင်အစည်းဝေးခေါ်ပြီး ကောက်တာ။ ကားရှိတဲ့အိမ်ကို ကားဘီး ၁ ဘီး ၁ သိန်းကျပ် ကောက်တယ်။ ကားက ၆ ဘီးရှိရင် ၆ သိန်းပေးရတယ်။ ဒီချိန်က ရွာမှာ တောင်သူတွေ ရောင်းဖို့သီးနှံလည်း မရှိတော့ဘူး။ ဘယ်လိုလုပ်ရမှန်း မသိတော့ဘူး၊ ဒုက္ခရောက်တယ် “ ဟု ၎င်း ဒေသခံတစ်ဦးက ပြောသည်။

အလားတူ ဆီဆိုင်မြို့နယ် တောင်ဖက်ခြမ်းဒေသရှိ နောင်ထော်ကျေးရွာတွင်လည်း ပြည်သူ့စစ်တပ်ဖွဲ့ PNO မှ တစ်အိမ်ကို ၅ သောင်းကျပ် ကောက်ခံနေကြောင်း နောင်ထော်ကျေးရွာဒေသခံ အမျိုးသားတစ်ဦးက ပြောသည်။

“ နောင်ထော်မှာက လူမျိုးပေါင်းစုံနေတယ်။ သျှမ်း၊ ကယန်း၊ ဗမာ၊ ပအိုဝ်းတွေ အတူနေကြတာ။ သူကြီးတွေကတော့ ပိုက်ဆံမထည့်တဲ့ အိမ်ဆို PDF တွေထောက်ပံ့တယ်ဆိုပြီး သတ်မှတ်တယ်။ ကျနော်တို့က တစ်နေ့လုပ်မှ တစ်နေ့စားရတာ။ ကျပ်ငွေ ၅ သောင်းကတော့ ကျနော်တို့အတွက် မသက်သာဘူး။ ပေးဖို့လည်း မလွယ်ဘူး “ ဟု ၎င်းဒေသခံ အမျိုးသားတစ်ဦးက ပြောသည်။

ထို့အပြင် PNO မှ စေခိုင်းပြီး ရပ်ရွာသူကြီးများမှ ကျည်ဆံဖိုးကောက်ယူပေးခြင်းအပေါ် ဒေသခံများ ပိုက်ဆံမထည့်ပါက “ ပြည်သူ့ကာကွယ်ရေးတပ်ဖွဲ့ PDF ကို ထောက်ပံ့ကြောင်း “ စွပ်စွဲပြီး ခြိမ်းခြောက်ခဲ့ကြောင်းလည်း သိရသည်။

အဆိုပါ ပြည်သူ့စစ်တပ်ဖွဲ့ PNO မှ ကျည်ဆံဖိုးကောက်ယူခြင်းနှင့် ပတ်သက်ပြီး ဆီဆိုင်မြို့ခံ တစ်ဦးက “ ကိုဗစ် – ၁၉ ရောဂါကော၊ စစ်တပ်အာဏာသိမ်းတာကော ဒီချိန်မှာ ပြည်သူတွေက အတော်ကို ဒုက္ခရောက်နေတယ်။ ဒီချိန်မှာ ကုန်စျေးနှုန်းတွေလည်း တအားတက်နေတယ်။ ဒုက္ခရောက်နေသူကို မကူညီဘဲ ဝန်ထုပ်ဝန်ပိုး ဖြစ်အောင် ဆက်လုပ်နေတယ်။ သူတို့သာ ဒီလိုဆက်လုပ်နေရင်တော့ နောင်တစ်ချိန်မှာ အမဲစက်ကြီး သူတို့နောက်ကို ပါသွားမှာပဲ “ ဟု ၎င်းက ပြောသည်။

ဆီဆိုင်မြို့နယ်တွင် ကျေးရွာပေါင်း ၃၂၀ ခန့်ရှိရာ ထိုထဲမှ ကျေးရွာ ၂၀၀ ခန့်သည် ပအိုဝ်းတိုင်းရင်းသား လူမျိုးများ နေထိုင်ကြပြီး ပြည်သူ့စစ်တပ်ဖွဲ့ PNO သည် ဒေသခံ လုံခြုံရေးအကြောင်းပြပြီး ကျည်ဆံဖိုးကောက်ယူမည်ဖြစ်ကြောင်း ဒေသခံများ၏ ပြောပြချက်အရ သိရသည်။