Sunday, July 21, 2024

မူဆယ် – နမ့်ခမ်းကြား TNLA တပ်ဖွဲ့ ဆက်ကြေးကောက်၊ ပြည်သူအိမ်ထဲ နေထိုင်မှုကြောင့် ဒေသခံများ စိုးရိမ်နေ

Must read

သျှမ်းပြည် မူဆယ်ခရိုင် မူဆယ်မြို့ – နမ့်ခမ်းမြို့အကြား တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်ဖွဲ့၏ ဆက်ကြေးတောင်းခံမှု နှင့် ပြည်သူ အိမ်ဝန်းထဲ ဝင်ရောက် နေထိုင်မှုများကြောင့် ဒေသခံများက လုံခြုံရေးအတွက် စိုးရိမ်ကြောက်လန့်နေရကြောင်း သိရသည်။

နမ့်ခမ်း

ယနေ့ (ဧပြီလ ၂) ရက်တွင် မူဆယ် – နမ့်ခမ်းကြား တိုးဂိတ်အနီး ကောင်းမူးရွာ နှင့် မန့်ဟောင်းလွယ်ရွာ အနီးတွင် TNLA တပ်ဖွဲ့သည် ကားသမားများ ထံမှ ပိုက်ဆံတောင်း ဆက်ကြေးကောက်နေကြောင်း ဒေသခံများက ပြော သည်။

“မနက် ၁၁ နာရီကတည်းကနေ ဒီအချိန်ထိ TNLA စစ်သားတွေက လမ်းမှာစောင့်ပြီး ကားသမားတွေဆီကနေ ပိုက်ဆံ တောင်းနေတယ်၊ ကုန်တင်ကား အသေး/ အကြီး အကုန်ကောက်တယ်၊ ကုန်နည်းနည်းလေးပါတာတောင် ပိုက်ဆံ တစ်သိန်းတောင်းတယ်၊ ကားအကြီးတွေဆိုရင် ၃ သိန်းထိတောင်းတယ်” ဟု မျက်မြင် ကြုံတွေ့ရသည့် ဒေသခံ တစ်ဦးက သျှမ်းသံတော်ဆင့်ကို ပြောသည်။

TNLA တပ်ဖွဲ့သည် ကုန်တင်ကားများကို ဆက်ကြေးအဖြစ် ပိုက်ဆံ မြန်မာငွေ ကျပ်သိန်း ၁ သိန်းမှ ၃ သိန်းအထိ ကောက်ယူ တောင်းခံနေရာ လက်ရှိတွင်လည်း ကားလမ်းများပိတ်ကာ ခရီးကြန့်ကြာမှု ဖြစ်စေကြောင်းလည်း ဒေသခံများက ပြောသည်။

မူဆယ်-နမ့်ခမ်း ဆက်ကြေးကောက်နေတဲ့ TNLA

ထို့အပြင် ယခုရက်ပိုင်း အတွင်း၌ TNLA တပ်ဖွဲ့သည် မူဆယ် – နမ့်ခမ်းကြားရှိ အရပ်သား နေအိမ်ဝန်း ထဲတွင် ရက်ရှည် နေထိုင်မှုများလည်း ပြုလုပ်နေကြောင်းလည်း သိရသည်။

ယင်းကဲ့သို့ TNLA ၏ အရပ်သားနေအိမ်ဝင်းထဲ ရက်ရှည်ဝင်ရောက်နေထိုင်မှုကြောင့် ဒေသခံများက လုံခြုံရေး အတွက် စိုးရိမ်ကြောက်လန့်နေရကြောင်း အမည်မဖော်လိုသူ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သူတို့ (TNLA) က အိမ်ဝန်းထဲ နေချင်သလို ဝင်နေနေကြတာ၊ မီးဖိုဆောင်ထဲ ဝင်ချက်ပြုတ်ပြီး ဖြစ်သလို ထား ကြတာ၊ စောင်တွေဆိုလည်း ယူသုံးတယ်၊တစ်ပတ် လောက်ကြာအောင် နေတယ်၊ တချို့ အိမ်ရှင်က ကြောက်လို့ စစ်သားတွေနဲ့ အတူ မနေရဲလို့ သူတို့ (TNLA) တွေကို အိမ်မှာ နေခိုင်းပြီး၊ အိမ်ရှင်တွေက တခြားအိမ်မှာ သွားအိပ် ရတာမျိုးတွေရှိတယ်” ဟု အသက် ၅၀ ကျော် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် TNLA တပ်ဖွဲ့သည် နမ့်ခမ်းမြို့နယ် နှင့် ကပ်လျက်ရှိသည့် မူဆယ်မြို့နယ်မှ ကောင်းဝန်းရွာ၊ နောင်ခန်ရွာတို့ရှိ ပြည်သူ့အိမ်ဝန်းထဲတွင် ဝင်ရောက်နေထိုင်သည်မှာ တစ်ပတ်ခန့် ရှိလာပြီ ဖြစ်ကြောင်း ဒေသခံများထံမှ သိရသည်။

TNLA တပ်ဖွဲ့တို့မှ ဝင်ရောက်နေထိုင်သည့် တချို့သော အိမ်များသည် အမျိုးသမီးသာ ရှိနေသည့် အိမ်ဖြစ်နေကြောင်းလည်း ဒေသခံများက သျှမ်းသံတော်ဆင့်ကို ပြောသည်။

“အမျိုးသမီးချည်းသက်သက်ရှိနေတဲ့အိမ်မို့ တခြားနေရာ စီစဥ်ပေးမယ်လို့ ပြောတာလည်း လက်မခံကြဘူး၊ အိမ်ရှင် အမျိုးသမီးတွေက ကြောက်ပြီး အိမ်မှာမနေရဲတော့ပဲနဲ့ တခြားအိမ်မှာ သွားနေနေရတာ၊ နောက်တစ်ခု စိုးရိမ် ရတာက တိုက်ပွဲဖြစ်မှာကိုပေါ့၊ TNLA က ဒီမှာ ရှိနေလို့ ဆိုပြီး တစ်ဖွဲ့ဖွဲ့က လာပစ်ရင် ပြည်သူတွေကပဲ နစ်နာရမှာ” ဟု အထက်ပါ အမျိုးသမီးက ဆက်ပြောသည်။

TNLA တပ်ဖွဲ့သည် မူဆယ် – နမ့်ခမ်း ကြား လမ်းပိုင်းတစ်လျှောက်ရှိ ကားများကို တားမြစ် အခွန်ကောက်ခြင်း၊ ဆိုင်ကယ်ဖြင့် လိုက်လံ အခွန်ကောက်ခြင်းများ၊ ရပ်ရွာအသီးသီးရှိ အရပ်သား အိမ်ဝန်းထဲ လှည့်လည် ဝင်ရောက် နေထိုင်ခြင်းများ ပြုလုပ်နေသည်မှာ တစ်လခန့် ရှိပြီဟုလည်း သိရသည်။

ယင်းကိစ္စ ဖြစ်စဥ်များ နှင့် ပတ်သက်ပြီး ဖြစ်စဥ် သိရှိနိုင်ရန် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၏ ပြောရေးဆိုခွင့် ဗိုလ်မှူးကြီး တားအိုက်ကျော်ထံသို့ အကြိမ်ကြိမ် ဖုန်းဆက်သော်လည်း ဖုန်းလက်ခံ ဖြေကြားခြင်း မရှိပေ။

လက်နက်ကိုင် တပ်ဖွဲ့များမှ လူနေကျေးရွာအတွင်း ရပ်ရွာအတွင်း ဝင်ရောက်နေထိုင်ခြင်း၊ လူထု နှင့် အတူ ရောနှော နေထိုင်ခြင်းတို့သည် ဂျီနီဗာကော (Geneva Call) ဥပဒေ နှင့် ဆန့်ကျင်သည့်အပြင် စစ်ရာဇဝတ်မှု မြောက်ကြောင်း လည်း သိရသည်။

Leave a Comments

- Advertisement -spot_img

Latest article