သျှမ်းပြည် အောင်ပန်းမြို့တွင် ရေရှားပါးမှုကြောင့် ရပ်ကွက် အချို့နှင့် စစ်ဘေးရှောင် နေရာအချို့ ရေအခက်အခဲများကြုံတွေ့နေရကြောင်း သိရသည်။
သျှမ်းပြည် အောင်ပန်းမြို့တွင် မတ်လ နောက်ဆုံးပတ်မှ စ၍ ယခု မေလထိ မြို့ဟောင်းရပ်ကွက်၊ မင်္ဂလာရပ်ကွက်နှင့် ကောင်းမူတော်ဘုန်းကြီးကျောင်း စသည့် ရပ်ကွက်နှင့် စစ်ဘေးရှောင်နေရာ အချို့တွင် ရေရှားပါမှု အခက်အခဲများ ကြုံတွေ့နေကြောင်း အောင်ပန်းမြို့ဒေသခံ အမျိုးသားတစ်ဦက သျှမ်းသံတော်ဆင့်ကို ပြောသည်။
“ဒါနဲ့ဆို ၂ လကျော်နေပြီ။ရှာတွေအခက်အခဲ ဖြစ်နေတဲ့ နေရာက ၈ နေရာလောက်ရှိတယ်။ စစ်ဘေးရှောင်တွေ အတွက်လည်း ခက်ခဲတာပေါ့။ သင်္ကြန်တွင်းတောင် မနားရဘူး။တချို့ကြတော့ ရေကမရှိ အလုပ်အကိုင် က ခက်ခဲ ဆိုတော့ တချို့အတွက်ကြတော့ ရေဝယ်သုံးဖို့က အဆင်မပြေကြဘူးလေ။ဝင်ငွေမရှိဘဲ ဝယ်မသုံးနိုင်လူတွေက ပိုခက်ခဲတာပေ့ါ။” ဟု အောင်ပန်းမြို့ဒေသခံ အမျိုးသားတစ်ဦကပြောသည်။
ထိုပြင် ရေဂါလံ ၆ ထောင်ခန့်ဝင်သော ၁၀ ဘီးကား ဖြင့် ရေများကို တစ်နေ့လျှင် ၃ ခေါက်ကူညီ ပို့ဆောင်မှုများ ပြုလုပ်ပေးနေပြီး၊ ရေရှာပေးသော နေရာများကို အဓိက ကူညီနေကာ ၁ လကျော်အတွင်း အကြိမ်ရေ ၇၀ ကျော်နေပြီဖြစ်ကြောင်း ၎င်းက ဆက်ပြောသည်။
“ဆီဖိုးတွေလည်း အခက်အခဲရှိတာပေါ့။တချို့လည်းလှူကြပါတယ်။နေ့တိုင်းလိုလိုရေတွေလိုက် ကူညီနေရတာဆိုတော့ ကားဆီဖိုးကလည်း ၂၂ သိန်းလောက်ရှိသွားပြီ။ဆီဖိုးလည်း ခက်တယ်။ကျနော်တို့လည်း အကူအညီ လိုတာပေါ့။” ဟု ၎င်းက ဆက်ပြောသည်။
သျှမ်း-ကရင်နီနယ်စပ်တကြောမှ အောင်ပန်းသို့ ထွက်ပြေးသိမ်းရှောင်လာသူ နှစ်ထောင်ကျော်သည် လက်ရှိမှာ အလှူရှင် နှစ်လကျော်ကြာ မရှိသဖြင့် စားနပ်ရိက္ခာနှင့် ဆေးဝါးများလိုအပ်နေကြောင်း သိရသည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် ၂၀၂၃ နိုဝင်ဘာလ ဒုတိယပတ်မှ ထွက်ပြေးလာကြပြီး၊ လက်ရှိ စစ်ဘေးရှောင် နှစ်ထောင် ကျော်သည် သျှမ်းပြည် အောင်ပန်းမြို့ရှိ ဘုန်းကြီးကျောင်းများ နှင့် ဆွေမျိုးအိမ် များ သို့ လာရောက် စစ်ဘေးရှောင် နေကြကြောင်းသိရသည်။
