သျှမ်းပြည်တောင်ပိုင်း၊ အောင်ပန်းမြို့အနီး နောင်ရဲကျေးရွာမှ အသက် (၆) နှစ် ကလေးငယ်ထံမှ နားကပ်လုပြီး သတ်ဖြတ်ခဲ့သူကို ဖမ်းဆီးမိကြောင်း သတင်းရရှိသည်။

ပြီးခဲ့သည့် ဩဂုတ်လ (၆) ရက် ညနေ ၅ နာရီခွဲ တွင် အောင်ပန်းမြို့ နောင်ရဲကျေးရွာရှိ အသက် (၆) နှစ်အရွယ် မဆောင်းနှင်းကို နားကပ်များမပါဘဲ ကျေးရွာနှင့် အလှမ်းဝေးသည့် တောင်ပေါ် ဘုရားတောင် ရေတွင်းထဲ၌ သေဆုံးလျက် တွေ့ရှိခဲ့ကြသည်။

ထိုဖြစ်စဉ် နှင့်ပတ်သက်၍ သက်ဆိုင်ရာ လူကြီးများက စုံစမ်းရာ သံသယရှိသူ အမျိုးသမီးကို ပြီးခဲ့သည့် ဩဂုတ်လ (၈) ရက်တွင် ဖမ်းဆီးမိခဲ့သည်။

၎င်းအား စစ်ဆေးချက်အရ ကလေးငယ်ကို ခေါ်ဆောင်ကာ ၎င်းထံ နားကပ်ကို လုယူပြီး ရေတွင်းထဲသို့ ပစ်ချခဲ့ကြောင်း ဝန်ခံထွက်ဆို ခဲ့သည်ဟု ဖြစ်စဉ်ကို သိရှိသည့် အမျိုးသား တဉီးက သျှမ်းသံတော်ဆင့်ကိုပြောသည်။​

“ကလေးငယ်နားက နားကပ်လှတယ် အမနဲ့ လိုက်ခဲ့မလား ဆိုပြီး မျှားခေါ်တယ်လို့ သိရတယ်၊ ကလေးဆီက နားကပ်ချွတ်ပြီး ကလေးကို ရေတွင်းထဲ ပစ်ချခဲ့တယ်လို့ ထွက်ဆိုထားတယ်၊ တရားခံ ကလေးမက အသက် (၁၉) ပဲရှိသေးတယ် ၊သူစလော့ဂိမ်းတွေ ဆော့တယ်လို့လည်း သိရတယ်။”ဟု ၎င်းအမျိုးသားကပြောသည်။

အဆိုပါ ကလေးငယ်အား ရေတွင်းထဲသို့ တွန်းချ သတ်ခဲ့သူသည် နောင်ရဲကျေးရွာနေ အသက် (၁၉) နှစ်အရွယ် မမိုးမိုးထွေး(ခ) မိုးစက် ဖြစ်ပြီး​၊ ၎င်းကို အောင်ပန်းမြို့ ရဲစခန်းတွင် အမှု့ဖွင့်ထားကြောင်း ၎င်းအမျိုးသားက ဆက်ပြောသည်။

ထိုအဖြစ်ပျက် များအရ ကလေးမိဘများသည် ကလေးငယ်အား ရွှေများ ဝတ်ဆင်ပေးခြင်း မပြုလုပ်ရဲကြောင်းနှင့် ညနေမိုးချုပ်ချိန်တွင် ကလေးငယ်ကို အပြင်သို့ ပေးမထွက်ရဲကြတော့ကြောင်း ကလေးမိဘများက သျှမ်းသံတော်ဆင့်ကိုပြောသည်။

“ရှေးလူကြီး မိဘပြောတာ မမှားဘူး ကလေးတွေကို ရွှေတွေ မဝတ်ပေးသင့်ဘူးတဲ့ ဒီအဖြစ်ပျက်ကြောင့် ဒီစကားက အရမ်းကို မှန်နေတာ ၊ ကျမကလေးကို ကျမ ဘာရွှေမှ မဆင်ပေးရဲတော့ဘူး ၊ မျက်စိအောက်ကတောင် အပျောက်မခံရဲလောက်တော့ဘူး၊ ခေတ်ကာလက မကောင်းတော့ တစ်ခုခုဖြစ်ရင် ကိုယ်ပဲ ခံရတာ မူးယစ်ဆေးသုံးတဲ့သူ စလော့ဂိမ်းစွဲတဲ့သူက များသထက် များလေ ပိုကြောက်ဖို့ကောင်းလာလေပဲ။”ဟု အောင်ပန်း မြို့ ကလေးမိခင်တဉီးက ပြောသည်။

ထိုသို့ လူသတ်မှုများ၊ ခိုးဆိုးလုယက်မှုများနှင့် မိမိကိုယ်ကိုယ် အဆုံးစီရင်မှု များသည် တစ်လလျှင် (၁၀) ကြိမ် အနည်းဆုံး ဖြစ်ပွားနေကြောင်း အောင်ပန်းနာရေး ကူညီမှုအသင်းက ဆိုသည်။

လက်ရှိ သျှမ်းတောင်တွင် လူပျောက်မှုများ၊ လုယက် အသတ်ခံရသူများ နှင့် မုဒိမ်းမှုများ မကြာခဏ ဖြစ်လာသောကြောင့် ဒေသခံများအနေဖြင့် အသွားလာသတိထားသင့်ကြောင်း အောင်ပန်းဒေသခံများကပြောသည်။