သျှမ်းပြည်အရှေ့ပိုင်း မိုင်းဆတ်မြို့တွင် ဆိုင်ကယ်သူခိုးများ သောင်းကျန်းနေပြီး သက်ဆိုင်ရာ အာဏာပိုင်များက အရေးယူ ဆောင်ရွက်ခြင်းမရှိကြောင်း စုံစမ်းသိရသည်။

ယနေ့ (ဇူလိုင်လ ၃၁ ရက်) နံနက် ၇ နာရီခွဲခန့်က မိုင်းဆတ်မြို့ မြို့မဈေးအဝင်လမ်းတွင် ရပ်ထားသည့် Wave 110 အမျိုးအစား ၂၀၂၆ ခုနှစ်ထုတ် ဆိုင်ကယ်နက်ပြာရောင် တစ်စီးနှင့် ဝမ်ကတ်ကျေးရွာမှ ၂၀၂၄ ခုနှစ်ထုတ် ဆိုင်ကယ်အပြာရောင် တစ်စီးတို့ ခိုးယူခံလိုက်ရကြောင်း မိုင်းဆတ်ဒေသခံများက ပြောသည်။

“ဒီမနက်ပဲ ဆိုင်ကယ်နှစ်စီး အခိုးခံရတာ။ တစ်စီးက ဈေးအဝင်နား ရပ်ထားတာ အဲ့မှာ ဈေးကောက်ရှိတာတောင် ဆိုင်ကယ်အခိုးခံလိုက်ရတာ။ ဈေးထဲ ခနဝင်ပြီး ပြန်ထွက်လာတော့ မတွေ့တော့ဘူး၊ သူတို့သော့ချက်တဲ့ပစ္စည်းလည်း ပါလောက်တယ်။ နောက်တစ်စီးက ဝမ်ကတ်က ဆိုင်ကယ်ပျောက်တာ” ဟု ဖြစ်စဉ်သိရှိသူ မိုင်းဆတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုသို့ ခိုးယူခံလိုက်ရပြီးနောက် ဆိုင်ကယ်ပိုင်ရှင်များမှ သက်ဆိုင်ရာ တာဝန်ရှိသူများနှင့် စစ်အစိုးရလက်အောက်ခံ ရဲတပ်ဖွဲ့ထံသို့ သွားရောက်တိုင်ကြားခဲ့သော်လည်း လက်ရှိအချိန်ထိ ဆိုင်ကယ်ခိုးယူသူများကို မဖမ်းမိသေးဘဲ ဒေသခံများမှာ လုံခြုံရေးစိုးရိမ်မှုကြောင့် သတိထား သွားလာနေရကြောင်း သိရသည်။

လက်ရှိ မိုင်းဆတ်မြို့တွင် KTV ဆိုင်များ ပေါများလာပြီး မူးယစ်ဆေးဝါး ပြဿနာလည်း ပိုမိုဆိုးရွားလာသော်လည်း မည်သည့် လက်နက်ကိုင် အဖွဲ့အစည်းမှ တာဝန်ယူ ဖြေရှင်းပေးနိုင်ခြင်း မရှိခြင်းကြောင့် ခိုးဆိုးလုယက်မှုများ ထပ်မံသောင်းကျန်းလာမည်ကို စိုးရိမ်နေရကြောင်း ဒေသခံများက ပြောသည်။

မိုင်းဆတ်မြို့တွင် တြိဂံဒေသ တိုင်းစစ်ဌာနချုပ်လက်အောက်ခံ အမှတ်(၁၄) စစ်ဆင်ရေးကွပ်ကဲမှု ဌာနချုပ် (စကခ-၁၄) အခြေစိုက်ပြီး ခြေလျင်တပ်ရင်း ခလရ ၄၉ နှင့် ၂၇၈၊ ခြေမြန်တပ်ရင်း ခမရ ၃၃၃ နှင့် ၅၂၇ တို့အပြင် အင်ဂျင်နီယာနှင့် ဆက်သွယ်ရေးတပ်ခွဲများ၊ နယ်မြေခံ ပြည်သူ့စစ် ဌာနေတပ်ဖွဲ့များလည်း ရှိသည်။