အာဏာသိမ်းစစ်ခေါင်းဆောင် ဗိုလ်ချုပ်မှူးကြီး အဖြစ်မှ နိုင်ငံတော်သမ္မတအဖြစ် တာဝန်ယူထားသူ ဦးမင်းအောင်လှိုင်သည် လာမည့် သြဂုတ်လဆန်းပိုင်းတွင် ထိုင်းနိုင်ငံသို့ တရားဝင်ခရီးစဉ်အဖြစ် လာရောက်ရန်ရှိနေကြောင်း ဘန်ကောက်ပို့စ် သတင်းတွင်ဖော်ပြသည်။

ယခုခရီးစဉ်သည် ပြီးခဲ့သည့် ဒီဇင်ဘာနှင့် ဇန်နဝါရီလများတွင် ကျင်းပခဲ့သည့် အထွေထွေရွေးကောက်ပွဲအပြီး သမ္မတရာထူး ရယူခဲ့ပြီးနောက်ပိုင်း အာဆီယံအဖွဲ့ဝင်နိုင်ငံတစ်ခုသို့ ဒုတိယအကြိမ်မြောက် သွားရောက်မည့် ခရီးစဉ် ဖြစ်လာမည်ဖြစ်သည်။ သမ္မတဖြစ်လာပြီးနောက် ပထမဆုံးအကြိမ် တရားဝင် အာဆီယံခရီးစဉ်အဖြစ် ယခုလအစောပိုင်းက လာအိုနိုင်ငံသို့ သွားရောက်ခဲ့ပြီး ဖြစ်သည်။

ထိုင်းနိုင်ငံခရီးစဉ်နှင့် ပတ်သက်၍ အသေးစိတ် အစီအစဉ်ဇယားကို ထုတ်ဖော်ထားခြင်းမရှိသေးပေ။

ထိုင်းနိုင်ငံသည် ၂၀၂၁ ခုနှစ် ဖေဖော်ဝါရီ ၁ ရက် စစ်အာဏာသိမ်းမှုအပြီး မြန်မာနိုင်ငံအား အာဆီယံနှစ်ပတ်လည် ထိပ်သီးအစည်းအဝေးများမှ ချန်လှပ်ထားခဲ့ရာမှ လက်ရှိတွင် ဒေသတွင်းမဟာမိတ်အဖွဲ့အဖြစ် အပြည့်အဝ ပြန်လည်လက်တွဲလာနိုင်ရန် ကြိုးပမ်းဆောင်ရွက်နေသည့် အဓိကနိုင်ငံ ဖြစ်လာသည်။

အာဆီယံမှ ၂၀၂၁ ခုနှစ် အောက်တိုဘာလတွင် ထိုစဉ်က စစ်ကောင်စီဥက္ကဋ္ဌဖြစ်သူ ဗိုလ်ချုပ်မှူးကြီး မင်းအောင်လှိုင်အား အကြမ်းဖက်မှုများ ချက်ချင်းရပ်တန့်ရန် အပါအဝင် အချက် ၅ ချက်ပါ ဘုံသဘောတူညီချက် (Five-Point Consensus) များကို အကောင်အထည်ဖော်ရာတွင် တိုးတက်မှုမရှိခြင်းကြောင့် နှစ်ပတ်လည် ထိပ်သီးအစည်းအဝေးများ တက်ရောက်ခွင့်မပြုရန် ဆုံးဖြတ်ခဲ့ခြင်း ဖြစ်သည်။

ပြီးခဲ့သည့် တနင်္ဂနွေနေ့က ဘန်ကောက်မြို့တွင် ပြုလုပ်ခဲ့သည့် အာဆီယံနိုင်ငံခြားရေးဝန်ကြီးများ၏ အလွတ်သဘော အစည်းအဝေးအတွင်း၊ ထိုင်းနိုင်ငံခြားရေးဝန်ကြီး သီဟာဆတ် (Sihasak Phuangketkeow) က အဆိုပါ ဘုံသဘောတူညီချက်ကို အကောင်အထည်ဖော်ရန် လက်တွေ့ကျသော ဆောင်ရွက်မှုများ ပြုလုပ်ရန် မြန်မာနိုင်ငံအား တိုက်တွန်းခဲ့သည်။

ထို့အပြင် အစည်းအဝေးပြင်ပတွင် လက်ရှိမြန်မာနိုင်ငံ၏ နိုင်ငံခြားရေးဝန်ကြီး တာဝန်ယူထားသူ ဦးတင်မောင်ဆွေနှင့် ထိုင်းနိုင်ငံခြားရေးဝန်ကြီးတို့ သီးခြားတွေ့ဆုံဆွေးနွေးခဲ့ကြပြီး၊ အိမ်နီးနားချင်းနိုင်ငံများအဖြစ် ရင်းနှီးသော ဆက်ဆံရေးကို ပြန်လည်အတည်ပြုခဲ့ကြကြောင်း ထိုင်းနိုင်ငံခြားရေးဝန်ကြီးဌာနက ထုတ်ပြန်သည်။ ၎င်းဆွေးနွေးပွဲတွင် နယ်စပ်လုံခြုံရေး၊ ကုန်သွယ်ရေးနှင့် မြန်မာနိုင်ငံ၏ ပြည်တွင်းအခြေအနေတို့အား အဓိကဆွေးနွေးခဲ့သည်။

အာဏာသိမ်းခေါင်းဆောင် ဦးမင်းအောင်လှိုင်သည် ဘန်ကောက်မြို့တွင် ကျင်းပခဲ့သည့် ဘင်္ဂလားပင်လယ်အော် ဒေသတွင်း နည်းပညာနှင့် စီးပွားရေး ပူးပေါင်းဆောင်ရွက်မှု အဖွဲ့ (BIMSTEC) ထိပ်သီးအစည်းအဝေးသို့ တက်ရောက်ရန်အတွက် ပြီးခဲ့သည့် ၂၀၂၅ ခုနှစ် ဧပြီလအတွင်းက ထိုင်းနိုင်ငံသို့ နောက်ဆုံးအကြိမ် လာရောက်ခဲ့သေးသည်။

ကိုးကား – Bangkok Post