မြန်မာနိုင်ငံတွင် အာဏာသိမ်းပြီးနောက်ပိုင်း သံတမန်ရေးအရ အပယ်ခံထားရသည့် အာဏာသိမ်းသမ္မတ ဦးမင်းအောင်လှိုင်သည် ယနေ့ (သြဂုတ် ၆ ရက်) နံနက်ပိုင်းတွင် ထိုင်းနိုင်ငံသို့ ထွက်ခွာသွားသည်။

ယခုခရီးစဉ်အတွင်း ထိုင်းဝန်ကြီးချုပ်နှင့် တွေ့ဆုံမည်ဖြစ်ပြီး နိုင်ငံတော်အဆင့် ဂုဏ်ပြုအခမ်းအနားဖြင့် ကြိုဆိုရန် စီစဉ်ထားပြီး နှစ်နိုင်ငံခေါင်းဆောင်များသည် စီးပွားရေးပူးပေါင်းဆောင်ရွက်မှု၊ ချစ်ကြည်ရေးနှင့် ကဏ္ဍပေါင်းစုံ ပူးပေါင်းဆောင်ရွက်ရေးကိစ္စရပ်များကို ဆွေးနွေးမည်ဟု စစ်ကော်မရှင်ဘက်က ထုတ်ပြန်ထားသည်။

အထူးသဖြင့် နယ်စပ်တစ်လျှောက်ရှိ အွန်လိုင်းငွေလိမ်လုပ်ငန်းများ (Scam Centers)၊ မူးယစ်ဆေးဝါး ကုန်သွယ်မှု မြင့်တက်လာခြင်းနှင့် မြန်မာဘက်ခြမ်း မြေရှားသတ္တုတူးဖော်မှုကြောင့် ဖြစ်ပေါ်လာသည့် နယ်စပ်ဖြတ်ကျော် မြစ်ရေညစ်ညမ်းမှု ပြဿနာများကို ထိရောက်စွာဖြေရှင်းရန် ဆွေးနွေးမည် ဖြစ်ကြောင်း သိရသည်။

အာဏာသိမ်းသမ္မတ ဦးမင်းအောင်လှိုင်သည် ခရီးစဉ်အတွင်း စီးပွားရေးဖိုရမ်တစ်ခုသို့လည်း တက်ရောက်ရန် စီစဉ်ထားသော်လည်း ထိုင်းပြည်သူများနှင့် အရပ်ဘက်အဖွဲ့အစည်းများ၏ ဝေဖန်မှုနှင့် ပြင်းပြင်းထန်ထန် ရင်ဆိုင်နေရသည်။

အာဏာသိမ်းသမ္မတ ဦးမင်းအောင်လှိုင်သည် ပြည်တွင်းစစ်ကြောင့် နယ်မြေအများအပြား ဆုံးရှုံးနေရချိန်နှင့် နိုင်ငံတကာ၏ ပိတ်ဆို့မှုများ ရင်ဆိုင်နေရချိန်တွင် ယခုကဲ့သို့ အိမ်နီးချင်း ထိုင်းနိုင်ငံသို့ သွားရောက်ခြင်းဖြင့် သံတမန်ရေးရာ အခွင့်အလမ်းတစ်ခုကို ရှာဖွေနေခြင်းဖြစ်ကြောင်း နိုင်ငံရေးလေ့လာသူများက သုံးသပ်ကြသည်။