အာဏာသိမ်း သမ္မတ ဦးမင်းအောင်လှိုင်အနေဖြင့် ထိုင်းနိုင်ငံ ဘန်ကောက်မြို့သို့ ထိုင်းဝန်ကြီးချုပ်၏ ဖိတ်ကြားချက်အရ လာရောက်မည်ဖြစ်ပြီး ခရီးစဉ်အတွက် ထိုင်းဝန်ကြီးချုပ် အနုတင် ချာန်ဗီရာကူးလ်မှ ထိုင်းအစိုးရအဖွဲ့ရုံးတွင် ကြိုဆိုရေးပြင်ဆင်မှုများကို ကိုယ်တိုင်စစ်ဆေးဆောင်ရွက်နေကြောင်း Khaosod သတင်းတွင်ဖော်ပြသည်။

လာမည့် ဩဂုတ်လ ၆ ရက်မှ ၇ ရက်ထိ လာရောက်မည့်ခရီးစဉ်သည် အာဏာသိမ်း သမ္မတအဖြစ် ထိုင်းနိုင်ငံသို့ ပထမဆုံး တရားဝင်ခရီးစဉ်ဖြစ်ပြီး၊ သံတမန်ရေးအရ ပိတ်ဆို့ခံထားရသည့််အခြေအနေများမှ ရုန်းထွက်ရန် အရေးကြီးသည့် ကြိုးပမ်းမှုတစ်ခုလည်းဖြစ်သည်။

ခရီးစဉ်အတွင်း နှစ်နိုင်ငံ သီးသန့်ဆွေးနွေးပွဲများ၊ နားလည်မှုစာချွန်လွှာ (MOU) လက်မှတ်ရေးထိုးပွဲအပြင် “ထိုင်း-မြန်မာ စီးပွားရေးဖိုရမ် ၂၀၂၆” ကိုလည်း တက်ရောက်မည်ဖြစ်ကြောင်းသိရသည်။

အလားတူ နယ်စပ်ဖြတ်ကျော် ကျူးလွန်နေသည့် အွန်လိုင်းငွေလိမ်ဂိုဏ်းများ၊ မူးယစ်ဆေးဝါးနှင့် လူကုန်ကူးမှု ပြဿနာများကိုလည်း ယခုခရီးစဉ်အတွင်း အဓိကထည့်သွင်း ဆွေးနွေးသွားမည်ဟု သိရသည်။

ထိုင်းနိုင်ငံအနေဖြင့် မြန်မာနိုင်ငံနှင့် လက်တွေ့ဆက်ဆံရေးတွင် တိုးတက်မှုများ ရရှိအောင် ဆောင်ရွက်မည့် “အခြေအနေကိုကြည့်၍ ပြန်လည်ထိတွေ့ဆက်ဆံရေး” (Calibrated Re-engagement) မူဝါဒကို ကျင့်သုံးနေခြင်းဖြစ်ကြောင်း ထိုင်းဝန်ကြီးချုပ်က ပြောဆိုထားသည်။

တဖက်တွင်လည်း ယူကေအခြေစိုက် ဗမာရိုဟင်ဂျာအသင်း (BROUK) က အာဏာသိမ်း သမ္မတ ထိုင်းနိုင်ငံသို့ ရောက်ရှိနေစဉ်အတွင်း ဖမ်းဆီးပြီး အာဂျင်တီးနားနိုင်ငံသို့ လွှဲပြောင်းပေးနိုင်ရန် ထိုင်းအာဏာပိုင်များအား ညှိနှိုင်းပေးစေလိုကြောင်း အာဂျင်တီးနား တရားရုံးတွင် တောင်းဆိုထားသည်။

ထို့အပြင် တော်လှန်ရေးအဖွဲ့အစည်းများနှင့် Justice for Myanmar ကဲ့သို့ အဖွဲ့အစည်းများမှ လူသားမျိုးနွယ်အပေါ် ပြစ်မှုကျူးလွန်ထားသည့် စစ်ခေါင်းဆောင်တစ်ဦးအား ယခုကဲ့သို့ ကော်ဇောနီခင်းကြိုဆိုခြင်းသည် စစ်အာဏာရှင်အစိုးရအား မဟုတ်မမှန်တရားဝင်မှု ပေးအပ်ရာရောက်သည်ဟု ဝေဖန်ထောက်ပြထားသည်။

ကိုးကား – Khaosod English