ထိုင်းနိုင်ငံ၊ ဘန်ကောက်မြို့အတွင်း အသက် ၆ နှစ်အရွယ် ကလေးငယ်တစ်ဦးအပါအဝင် ကလေးသူငယ်များအား ညဉ့်နက်သန်းခေါင်အထိ လမ်းပေါ်တွင် ကုန်ပစ္စည်းများ အတင်းအဓမ္မ လိုက်လံရောင်းချခိုင်းပြီး၊ အရောင်းသတ်မှတ်ချက်မပြည့်လျှင် ရိုက်နှက်ညှင်းပန်းခဲ့သည့် မြန်မာနိုင်ငံသား ၃ ဦးကို ရဲတပ်ဖွဲ့က ဖမ်းဆီးလိုက်ကြောင်း ဘန်ကောက်ပို့စ် သတင်းတွင်ဖော်ပြသည်။

ရဲတပ်ဖွဲ့မှ လက်ကျိုးနေသည့် ဒဏ်ရာအပြင်းအထန်ဖြင့် အသက် ၆ နှစ်အရွယ်ကလေးတစ်ဦးကို ကယ်တင်ပေးနိုင်ခဲ့ပြီး ထိုဖြစ်စဉ်မှဆက်စပ်ကာ နောက်ဆက်တွဲပြစ်မှုကျူးလွန်သူများကိုဖမ်းမိခြင်းဖြစ်သည်။

ဘန်ကောက်မြို့၊ Suan Luang ရှိ နေအိမ်တစ်လုံးကို ဝင်ရောက်စီးနင်းခဲ့ပြီး၊ ပြစ်မှုကျူးလွန်ကြောင်း သံသယရှိသူ မြန်မာနိုင်ငံသား အမျိုးသား ၁ ဦးနှင့် အမျိုးသမီး ၂ ဦးတို့ကို ဖမ်းဆီးနိုင်ခဲ့သည့်အပြင်  ထိုနေအိမ်အတွင်း စပိတ်လှောင်ခြင်းခံထားရသည့် အခြားကလေးငယ် ၅ ဦးကိုလည်း ထပ်မံကယ်တင်နိုင်ခဲ့ကြောင်း ဘန်ကောက်ရဲတပ်ဖွဲ့ အကြီးအကဲ ရဲချုပ် ဆယမ် (Pol Lt Gen Sayam Boonsom) ၏ ပြောကြားချက်အရသိရသည်။ 

ရဲတပ်ဖွဲ့၏ စုံစမ်းစစ်ဆေးချက်အရ သံသယရှိသူများသည် အသက်မပြည့်သေးသည့် ကလေးငယ်များအား နေ့စဉ် မွန်းလွဲ ၃ နာရီမှ နံနက် ၃ နာရီအထိ ၁၂ နာရီတိုင်တိုင် ဘန်ကောက်မြို့အနှံ့ရှိ စားသောက်ဆိုင်များနှင့် ဖျော်ဖြေရေး ဝန်ဆောင်မှုပေးသည့်နေရာများတွင် သွားလာလှုပ်ရှားကာ ပန်းများနှင့် မုန့်များကို လိုက်လံရောင်းချခိုင်းခြင်းဖြင့် ခေါင်းပုံဖြတ်ခဲ့ကြကြောင်းသိရသည်။

ကလေးငယ်များသည် ၎င်းတို့ သတ်မှတ်ထားသော အရောင်းသတ်မှတ်ချက်များ မပြည့်မီလျှင် ရိုက်နှက်ခြင်းနှင့် အစာငတ်ခံထားခြင်းစသည့် နှိပ်စက်မှုများကို ပြုလုပ်ခဲ့ကြကြောင်း ပေါ်ပေါက်ခဲ့သည်။ ကယ်တင်ခြင်းခံရသည့် ကလေးငယ်များမှာလည်း မြန်မာနိုင်ငံရှိ တိုင်းရင်းသားမျိုးနွယ်စုဝင် ကလေးငယ်များဖြစ်ကြသည်ဟု ရဲတပ်ဖွဲ့က ဖြည့်စွက်ပြောကြားခဲ့သည်။

လက်ရှိတွင် ဘန်ကောက်ရဲတပ်ဖွဲ့သည် ဖမ်းဆီးရမိသူ မြန်မာနိုင်ငံသား ၃ ဦးအား ကလေးအလုပ်သမား ဥပဒေချိုးဖောက်မှု၊ ကလေးသူငယ်များအပေါ် ရက်စက်စွာ ညှင်းပန်းနှိပ်စက်မှု၊ ကလေးသူငယ်အခွင့်အရေးဆိုင်ရာ ဥပဒေများကို ပြင်းထန်စွာ ချိုးဖောက်မှုများဖြင့် အမှုဖွင့်လှစ်ထားပြီး လူကုန်ကူးမှုမြောက်ခြင်း ရှိ၊ မရှိကိုပါ အထူးအဖွဲ့ဖြင့် ဆက်လက်စစ်ဆေးလျက်ရှိသည်။

ကလေးငယ် ၆ ဦးစလုံးအား လက်ရှိတွင် လူမှုဝန်ထမ်းဦးစီးဌာနနှင့် ကလေးသူငယ်စောင့်ရှောက်ရေးအဖွဲ့များ၏ လက်အောက်သို့ လွှဲပြောင်းပေးထားပြီး၊ လိုအပ်သည့် ဆေးဝါးကုသမှုများနှင့် စိတ်ပိုင်းဆိုင်ရာ ပြန်လည်ထူထောင်ရေးလုပ်ငန်းများကို အထူးဂရုစိုက် စောင့်ရှောက်ပေးလျက်ရှိကြောင်း သိရသည်။

ကိုးကား – Bangkok Post