ထိုင်းနိုင်ငံအစိုးရနှင့် အာဏာသိမ်းသမ္မတ ဦးမင်းအောင်လှိုင်တို့သည် ထိုင်းနိုင်ငံ ဘန်ကောက်မြို့တွင် တွေ့ဆုံပြီး နှစ်နိုင်ငံပူးပေါင်းဆောင်ရွက်ရေးဆိုင်ရာ သဘောတူညီချက်အသစ်များကို လက်မှတ်ရေးထိုးခဲ့ကြောင်း ထိုင်းသတင်းဌာနများ၏ ဖော်ပြချက်အရ သိရသည်။

သို့သော် အဆိုပါခရီးစဉ်သည် လူ့အခွင့်အရေးတက်ကြွလှုပ်ရှားသူများ၊ အရပ်ဘက်အဖွဲ့အစည်းများနှင့် ထိုင်းရောက်မြန်မာနိုင်ငံသားများ၏ ကန့်ကွက်ရှုတ်ချမှုများနှင့် ရင်ဆိုင်နေရသည်။

ယနေ့ (ဩဂုတ် ၆ ရက်) နံနက်ပိုင်းတွင် ဘန်ကောက်မြို့ အစိုးရအိမ်တော်၌ ထိုင်းဝန်ကြီးချုပ် မစ္စတာအနုတင်နှင့် အာဏာသိမ်းသမ္မတ ဦးမင်းအောင်လှိုင်တို့ တွေ့ဆုံခဲ့ပြီး အလုပ်သမားရေးရာ၊ နယ်စပ်မြစ်များ ရေအရည်အသွေး စီမံခန့်ခွဲမှုနှင့် အာကာသနည်းပညာ ပူးပေါင်းဆောင်ရွက်မှုဆိုင်ရာ (MOU) ၃ စောင်ကို လက်မှတ်ရေးထိုးခဲ့ကြကြောင်း ထိုင်းသတင်းဌာနများတွင် ဖော်ပြထားသည်။

ထို့အပြင် Queen Sirikit အမျိုးသားကွန်ဗင်းရှင်းစင်တာတွင်လည်း ဝန်ကြီးချုပ် အနုတင်နှင့် အာဏာသိမ်းသမ္မတတို့သည် ထိုင်း- မြန်မာ စီးပွားရေးခေါင်းဆောင်များနှင့် သီးသန့် တွေ့ဆုံမည် ဖြစ်ကြောင်း သိရသည်။

သို့သော် အဆိုပါခရီးစဉ်နှင့် ပတ်သက်၍ Solidarity Collective TH – SEM အပါအဝင် ထိုင်းအရပ်ဘက်အဖွဲ့အစည်း ၁၆ ဖွဲ့က ပူးတွဲကြေညာချက်တစ်ရပ် ထုတ်ပြန်ကာ ပြင်းထန်စွာ ရှုတ်ချလိုက်သည်။

ထိုင်းအစိုးရအနေဖြင့် မိမိပြည်သူကို သတ်ဖြတ်နေသည့် စစ်အုပ်စုအား တရားဝင်မှုပေးခြင်းနှင့် အကျိုးအမြတ် လွှဲပြောင်းပေးခြင်းများကို ချက်ချင်းရပ်တန့်ရန် ၎င်းတို့က တောင်းဆိုထားသည်။

“စစ်အုပ်စုကို အကျိုးအမြတ်ပေးခြင်းသည် ဒေသတွင်းငြိမ်းချမ်းရေးကို ဆောင်ကြဉ်းပေးခြင်းမဟုတ်ဘဲ အကြမ်းဖက်မှုများကို သက်ဆိုးရှည်စေရုံသာ ရှိလိမ့်မည်” ဟု အရပ်ဘက်အဖွဲ့များ၏ ထုတ်ပြန်ချက်တွင် ဖော်ပြထားသည်။

အလားတူ ယနေ့ (သြဂုတ် ၆ ရက်) မွန်းလွဲပိုင်းတွင် ဘန်ကောက်မြို့ရှိ ကုလသမဂ္ဂရုံးရှေ့၌ တောက်ပသောအနာဂတ်အဖွဲ့နှင့် ထိုင်းရောက်မြန်မာလုပ်သားများက စုဝေးကာ ဆန္ဒထုတ်ဖော်ခဲ့ကြသည်။

ဆန္ဒပြသူများသည် “မင်းအောင်လှိုင် ကျရှုံးပါစေ”၊ “ရာဇဝတ်ကောင်ကို ငါတို့မကြိုဆို” စသည့် စာသားများကိုင်ဆောင် ကာ ဟစ်ကြွေးခဲ့ကြပြီး၊ ထိုင်းအာဏာပိုင်များကမူ ဆန္ဒပြသူများကို ဟန့်တားခြင်းနှင့် လုံခြုံရေး တင်းကျပ်ခြင်းများ ပြုလုပ်ခဲ့သည်။