ထိုင်းနိုင်ငံ၊ ရယောင်းခရိုင်အတွင်း တရုတ်ရင်းနှီးမြှုပ်နှံသူများ ဦးစီးလုပ်ကိုင်နေသည့် ဒေတာစင်တာ ဆောက်လုပ်ရေး လုပ်ငန်းခွင်တစ်ခုကို ထိုင်း အာဏာပိုင်များက ဝင်ရောက်စီးနင်းခဲ့ပြီး တရားမဝင် မြန်မာနိုင်ငံရွှေ့ပြောင်းအလုပ်သမား ၂၀ ဦးနှင့် တရုတ်နိုင်ငံသား ၄ ဦး၊ စုစုပေါင်း ၂၄ ဦး ဖမ်းဆီးရမိခဲ့ကြောင်း ဘန်ကောက်ပို့စ်တွင်ဖော်ပြသည်။
ပြီးခဲ့သည့် သြဂုတ် ၁၁ ရက်နံနက်ပိုင်းတွင် ဘာန်ချမ်းမြို့နယ်ရှိ ယခင် ဂေါက်ကွင်းဟောင်းနေရာ မြေကွက်တွင် တရုတ်နိုင်ငံသားများ ရင်းနှီးမြှုပ်နှံထားသည့် ဒေတာစင်တာ ဆောက်လုပ်ရေးလုပ်ငန်းတခုတွင် လူအယောက် ၄၀၀ ကျော် လုပ်ကိုင်နေထိုင်လျက်ရှိကြောင်း သတင်းရရှိခဲ့သည်။
ထိုကြောင့် ရယောင်းခရိုင် လူဝင်မှုကြီးကြပ်ရေး ရုံး၊ ရဲတပ်ဖွဲ့နှင့် ခရိုင် အလုပ်သမားညွှန်ကြားမှုဦးစီးဌာနတို့ ပူးပေါင်းတွင် သြဂုတ် ၁၁ရက် နံနက် ၁၀ နာရီခန့်တွင် အဆိုပါ လုပ်ငန်းခွင်သို့ စစ်ဆေးရန် ဝင်ရောက်စီးနင်းခဲ့ရာ လုပ်ငန်းခွင်အတွင်းရှိ အလုပ်သမား ထွက်ပြေးခဲ့ကြပြီး အချို့မှာ အနီးရှိ မြောင်း/ချောင်း အတွင်းသို့ ခုန်ဆင်းကာ ထွက်ပြေးသွားခဲ့ကြသည်။
ထွက်ပြေးလွတ်မြောက်သွားသူများအနက် တရားဝင် အလုပ်လုပ်ခွင့်နှင့် လူဝင်မှုကြီးကြပ်ရေး စာရွက်စာတမ်း မရှိသူ မြန်မာနိုင်ငံသား ၂၀ ဦးနှင့် တရုတ်နိုင်ငံသား ၄ ဦး (အမျိုးသား၊ အမျိုးသမီး စုစုပေါင်း ၂၄ ဦး) ကို ဖမ်းဆီးခဲ့သည်။
လက်ရှိတွင် ၎င်းတို့အား တရားမဝင် ဝင်ရောက်လုပ်ကိုင်မှုဖြင့် ဘာန်ချမ်း ရဲစခန်းတွင် ဥပဒေအရ အရေးယူဆောင်ရွက်နေပြီး ၎င်းတို့၏ နိုင်ငံများကို ပြည်နှင်ဒဏ်ပေးနိုင်ရေး လူဝင်မှုကြီးကြပ်ရေး ရဲတပ်ဖွဲ့ထံ လွှဲပြောင်းပေးထားသည်။
ထို့အပြင် တရားမဝင် ရွှေ့ပြောင်းအလုပ်သမားများကို ခွင့်ပြုချက်မရှိဘဲ ငှားရမ်းလုပ်ကိုင်စေမှုဖြင့် အမည်မဖော်ပြထားသည့် ကန်ထရိုက်တာ ၃ ဦးအား အာဏာပိုင်များက အရေးယူထားသည်။
အဆိုပါ စီမံကိန်း မြေကွက် ပိုင်ရှင်ဟောင်းက မိမိအနေဖြင့် မြေကွက်ကို ရောင်းချခဲ့ခြင်းသာဖြစ်ပြီး တရားမဝင် အလုပ်သမား ခန့်ထားမှုတွင် ပါဝင်ပတ်သက်ခြင်း မရှိကြောင်းနှင့် အလုပ်သမားများသည် စီမံကိန်း၏ တိုက်ရိုက် ကြီးကြပ်စီမံမှုအောက်တွင်သာ ရှိကြောင်း ငြင်းဆိုထားသည်။ စီမံကိန်း ပိုင်ရှင် အသေးစိတ်ကိုမူ တာဝန်ရှိသူများက ထုတ်ဖော်ပြောဆိုခြင်း မရှိသေးပေ။
အဆိုပါ ဆောက်လုပ်ရေး လုပ်ငန်းခွင်သည် လပေါင်းများစွာ ကြာမြင့်နေပြီဖြစ်ပြီး ဒေသခံ လူထုမှ အများပြည်သူနှင့်ဆိုင်သော ရေနုတ်မြောင်း/ ရေချောင်းများကို ကျူးကျော်လုပ်ကိုင်မှု ရှိမရှိ စစ်ဆေးပေးရန် တောင်းဆိုခဲ့သည့်အတွက် စစ်ဆေးရေးပြုလုပ်ရာမှာ ယခုကဲ့သို့ တရားမဝင်ရွှေ့ပြောင်းလုပ်သားများကို ဖမ်းဆီးမိခဲ့ခြင်းဖြစ်သည်။
ကိုးကား – Bangkok Post
Leave a Comments