ထိုင်းနိုင်ငံ၊ ဘန်ကောက်မြို့၊ ဒင်ဒိန်း (Din Daeng) ခရိုင်ရှိ ပြည်သူ့အိမ်ရာတိုက်ခန်း၊ အိမ်ရာများတွင် မြန်မာနိုင်ငံသား ကလေးငယ် အများစုပါဝင်သည့် ရွှေ့ပြောင်းကလေး ၁,၃၀၀ ကျော်အား တရားမဝင် ပန်းရောင်ကတ် (Pink Card) မှတ်ပုံတင်ပေးခဲ့သည့် အမှုအား ထိုင်းအာဏာပိုင်များမှ စစ်ဆေးတွေ့ရှိခဲ့ပြီး တစ်နိုင်ငံလုံး စုံစမ်းစစ်ဆေးမှုများ စတင်နေပြီဖြစ်ကြောင်း ထိုင်းသတင်းဌာနများတွင် ဖော်ပြသည်။

ပြီးခဲ့သည့် ဧပြီလကတည်းက ဘန်ကောက်မြို့၊ ဒင်ဒိန်းခရိုင်ရုံး၌ အိမ်လိပ်စာ အချို့တွင် လူအများအပြားအား ပုံမှန်မဟုတ်သော စာရင်းသွင်းမှုများရှိလာသည်ကို အုပ်ချုပ်ရေး ဦးစီးဌာန (DoPA) က စတင်သတိပြုမိခဲ့ခြင်းဖြစ်သည်။

ထိုကြောင့် ၁၉၆၀ ပြည့်လွန်နှစ်များက ဆောက်လုပ်ခဲ့သော အခန်းပေါင်း ၅,၇၂၆ ခန်းပါ ဒင်ဒိန်းခရိုင်အတွင်းရှိ တိုက်ခန်းများကို ဝင်ရောက်စစ်ဆေးခဲ့ပြီး၊ အမှန်တကယ် နေထိုင်ခြင်းမရှိသည့် အသက် ၅ နှစ်မှ ၁၅ နှစ်အထိ ရှိသော (မြန်မာနိုင်ငံသား အများစုပါဝင်သော) ရွှေ့ပြောင်းအလုပ်သမား ကလေးငယ် ၁,၃၆၆ ဦးအား နေထိုင်သူများအဖြစ် မှတ်ပုံတင်ပေးခဲ့သည်ကို တွေ့ရှိခဲ့သည်။

စုံစမ်းစစ်ဆေးမှုများအရ အဂတိလိုက်စားသော အရာရှိများသည် အခန်းများတွင် လူဦးရေ ပြည့်ကျပ်နေကြောင်း ကွန်ပျူတာစနစ်၏ သတိပေးချက်များကို ကျော်လွန်ဆောင်ရွက်ခဲ့ကြပြီး အခန်း ၄၄ ခန်းတွင် အနည်းဆုံး ကလေး ၁၆ ဦးစီ စာရင်းသွင်းကာ အခန်း ၃ ခန်းတည်းတွင်ပင် ကလေး ၁၄၀ ဦး အထိ မှတ်ပုံတင်ထားခဲ့သည်။

ထို့ပြင် စာရွက်စာတမ်းများတွင် လက်မှတ်ရေးထိုးခြင်းနှင့် အိမ်ပိုင်ရှင်များ၏ လက်မှတ်များကို အတုပြုလုပ်ကာ ထိုင်းနိုင်ငံသား မဟုတ်သူများ အစိုးရ ဝန်ဆောင်မှုများ ရရှိနိုင်သည့် ဂဏန်း ၁၃ ခုပါ “ပန်းရောင်ကတ်” လျှောက်ထားနိုင်ရန် ဖန်တီးပေးခဲ့ကြခြင်းဖြစ်သည်။

ယခုဖြစ်စဉ်များတွင် ပွဲစားများမှ ပုံတင်ပေးရန်အတွက် ဘတ်ငွေ သောင်းဂဏန်းမှ သိန်းဂဏန်းအထိ တောင်းခံခဲ့ကြပြီး၊ ဩဂုတ် ၁၈ ရက်က တိုက်ခန်းများအတွင်း ဝင်််ရောက်စစ်ဆေးမှုတွင် ဒင်ဒိန်းခရိုင် အရာရှိ ၃ ဦး၊ ပွဲစား ၂ ဦး၊ အိမ်ပိုင်ရှင် ၁ ဦးနှင့် သက်သေ ၁ ဦး၊ စုစုပေါင်း ၇ ဦးလုံးကို ဖမ်းဆီးထိန်းသိမ်းခဲ့သည်။

ဘန်ကောက်မြို့တော်ဝန်က ဖမ်းဆီးခံရသည့် အရာရှိ ၃ ဦးအား တာဝန်မှ ဆိုင်းငံ့ထားပြီး ဘန်ကောက်မြို့တော်တစ်ခုလုံးကို စစ်ဆေးရာ အခြား ခရိုင် ၉ ခုတွင်လည်း ပန်းရောက်ကတ် ကိုင်ထားသူ ၁၆ ဦးထက်မနည်း အိမ်ထောင်စုတစ်ခုအတွင်း စာရင်းသွင်းထားမှုများကို ထပ်မံတွေ့ရှိခဲ့သည့်အတွက် အထူးတပ်ဖွဲ့များဖြင့် ဆက်လက်စုံစမ်းလျက်ရှိသည်။

ထိုင်းအာဏာပိုင်များမှ ထိုအမှုများမှတဆင့် နယ်စပ်ဖြတ်ကျော် ရာဇဝတ်မှုများ၊ အွန်လိုင်းငွေလိမ်လုပ်ငန်းများ၊ တရားမဝင်လူကုန်ကူးမှုကွန်ယက်များ နှင့် အခြားရာဇဝတ်မှုများနှင့် ဆက်စပ်မှုရှိမရှိ ဆက်လက်ဖော်ထုတ်နေပြီး တနိုင်ငံလုံးအတိုင်းအတာဖြင့် စစ်ဆေးသွားမည်ဖြစ်ကြောင်းသိရသည်။

ကိုးကား – Bangkok Post/Thai Enquirer