ထိုင်း-မြန်မာနယ်စပ် တက်ခ်ခရိုင်၊ မဲဆောက်မြို့နယ်အတွင်း တရားမဝင် ကိုယ်ရေးအချက်အလက် မှတ်ပုံတင်မှုများနှင့် စာရွက်စာတမ်း အတုပြုလုပ်သည့် အဂတိလိုက်စားမှုများအား ထိုင်းအာဏာပိုင် ပူးပေါင်းအဖွဲ့များမှ နှိမ်နင်းရေးစီမံချက် စတင်ကြောင်း ထိုင်းသတင်းများတွင်ဖော်ပြသည်။

ယနေ့ (ဩဂုတ် ၄ ရက်) နံနက် ၆ နာရီတွင် “တရားမဝင် ၁၀ နှစ်သက်တမ်းကတ်များ နှိမ်နင်းရေး စီမံချက်” အမည်ရ အထူးစစ်ဆင်ရေးအတွက် ပူးပေါင်းအင်အား ၁၃၀ ကျော်ပါဝင်သည့် တပ်ဖွဲ့သည် မဲဆောက်ရဲစခန်းမှစတင်၍ သတ်မှတ်ထားသော ပစ်မှတ်နေရာများကို တပြိုင်နက်တည်း ဝင်ရောက်စီးနင်းခဲ့ကြသည်။

အဆိုပါ စစ်ဆင်ရေးအတွင်း တရားရုံး၏ ရှာဖွေဝရမ်း ၂ ခုနှင့် ဖမ်းဝရမ်း ၁၃ ခုတို့ဖြင့် မဲဆောက်စည်ပင်အရာရှိဟောင်း ၁ ဦး၊ လက်ရှိ တာဝန်ထမ်းဆောင်နေသူ စည်ပင်အရာရှိ ၂ ဦးနှင့် ကိုယ်ရေးအချက်အလက်အတုများဖြင့် ကတ်များ လိမ်လည်လျှောက်ထားမှုတွင် ပါဝင်ပတ်သက်နေသည့် နိုင်ငံခြားသား ၁၂ ဦးတို့ကို ဖမ်းဆီးခဲ့သည်။

မဲဆောက်ဒေသအတွင်းရှိ လူကုန်ကူးဂိုဏ်းများနှင့် ဆက်နွယ်ပြီး “ခေါင်းစဉ် ၀ ကတ်” (Bat Hua 0) ဟု လူသိများသည့် ၁၀ နှစ်သက်တမ်းရှိ ထိုင်းနိုင်ငံသားမဟုတ်သော နေထိုင်ခွင့်ကတ် (10-year non-Thai residence cards) များကို တရားမဝင် လိမ်လည်ထုတ်ပေးနေသည့် အဂတိလိုက်စားမှုကွန်ယက်ကို ဖော်ထုတ်နိုင်ခြင်းဖြစ်သည်။

ဖမ်းဆီးရမိမှုများနှင့် ပတ်သက်သည့် အသေးစိတ် နှင့် နောက်ဆက်တွဲ စုံစမ်းစစ်ဆေးတွေ့ရှိချက်များကို ယနေ့ နံနက်ပိုင်းတွင် မဲဆောက်မြို့ လူဝင်မှုကြီးကြပ်ရေးရုံး၌ သက်ဆိုင်ရာ ဝန်ကြီးဌာနနှင့် အာဏာပိုင်များမှ သတင်းစာရှင်းလင်းပွဲပြုလုပ်သွားမည်ဖြစ်ကြောင်းသိရသည်။

ကိုးကား – The Reporter