လက်ရှိ အာဆီယံဥက္ကဋ္ဌ၏ မြန်မာနိုင်ငံဆိုင်ရာ အထူးကိုယ်စားလှယ်ဖြစ်သူ ဖိလစ်ပိုင်နိုင်ငံခြားရေးဝန်ကြီး မစ္စ လာဇရိုသည် တိုင်းရင်းသားလက်နက်ကိုင်တပ်ဖွဲ့ EAOs များနှင့် စစ်အစိုးရလက်အောက်ခံ NSPNC ကိုယ်စားလှယ်တို့ကို သီးခြားစီ တွေ့ဆုံဆွေးနွေးခဲ့ကြောင်း သတင်းသိရသည်။

ယမန်နေ့ (ဇူလိုင်လ ၁၂ ရက်) တွင် ထိုင်းနိုင်ငံ ဘန်ကောက်မြို့၌ လက်ရှိ အာဆီယံဥက္ကဋ္ဌ၏ မြန်မာနိုင်ငံဆိုင်ရာ အထူးကိုယ်စားလှယ်ဖြစ်သူ ဖိလစ်ပိုင်နိုင်ငံခြားရေးဝန်ကြီး မစ္စ လာဇရို သဘာပတိအဖြစ် ဦးဆောင်၍ အာဆီယံ နိုင်ငံခြားရေးဝန်ကြီးများနှင့် စစ်အစိုးရလက်အောက်ခံ နိုင်ငံခြားရေးဝန်ကြီး ဦးတင်မောင်ဆွေ တို့အကြား အလွတ်သဘော တွေ့ဆုံဆွေးနွေးခဲ့ကြသည်။

ထို့နောက် ထိုင်းနိုင်ငံ ပတ္တရားမြို့တွင် ဖိလစ်ပိုင်နိုင်ငံခြားရေးဝန်ကြီး မစ္စ လာဇရို နှင့် ထိုင်းနိုင်ငံခြားရေး ဝန်ကြီး မစ္စတာ ဆီဟာဆက် တို့သည် တိုင်းရင်းသားလက်နက်ကိုင်တပ်ဖွဲ့ EAOs များနှင့် စစ်အစိုးရလက်အောက်ခံ NSPNC ကိုယ်စားလှယ်တို့ကို သီးခြားစီ တွေ့ဆုံဆွေးနွေးခဲ့ကြောင်း ဖိလစ်ပိုင်နိုင်ငံခြားရေးဝန်ကြီးဘက်မှ ဆိုရှယ်မီဒီယာတွင် ထုတ်ပြန်ခဲ့သည်။

EAOs များနှင့် တွေ့ဆုံစဉ် မြန်မာနိုင်ငံတွင် ဆွေးနွေးညှိနှိုင်းမှုများ ဖြစ်ပေါ်လာစေရန်နှင့် လူသားချင်း စာနာထောက်ထားမှုဆိုင်ရာ အကူအညီပေးနိုင်ရန် အာဆီယံအနေဖြင့် မည်သို့ ကူညီပံ့ပိုးနိုင်မည်ကို ဆွေးနွေးခဲ့ကြောင်း သိရသော်လည်း မည့်သည့် တိုင်းရင်းသားလက်နက်ကိုင် EAOs အဖွဲ့များနှင့် တွေ့ဆုံခဲ့သည်ကို မသိရပေ။

အလားတူ စစ်အစိုးရလက်အောက်ခံ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ NSPNC ကိုယ်စားလှယ်များနှင့် တွေ့ဆုံရာတွင်လည်း ငြိမ်းချမ်းရေးလုပ်ငန်းစဉ် ရှေ့ဆက်ဆောင်ရွက်ရန် အမြင်ချင်း ဖလှယ်ခဲ့ကြပြီး မြန်မာကိုယ်တိုင် ဦးဆောင်သည့် (Myanmar-owned and -led) ရေရှည်တည်တံ့သော အဖြေတစ်ရပ်ကို ရှာဖွေနိုင်ရန် အာဆီယံက ပါဝင်ကူညီရေး အသင့်ရှိကြောင်း ဖိလစ်ပိုင်နိုင်ငံခြားရေးဝန်ကြီးက ပြောဆိုသည်။

ယမန်နေ့တွင် ထိုင်းနိုင်ငံ ဘန်ကောက်မြို့၌ ပြုလုပ်ခဲ့သည့် အလွတ်သဘော အစည်းအဝေးတွင်လည်း စစ်အစိုးရခန့် နိုင်ငံခြားရေးဝန်ကြီးက မြန်မာနိုင်ငံ အခြေအနေကို ရှင်းတင်းတင်ပြခဲ့ပြီး အာဆီယံ နိုင်ငံခြားရေးဝန်ကြီးများက မြန်မာနိုင်ငံတွင် အကြမ်းဖက်မှုများ ရပ်တန့်ရေး၊ အပြုသဘောဆောင်သည့် ဆွေးနွေးညှိနှိုင်းမှုများ ဖြစ်ပေါ်လာစေရန် ပံ့ပိုးကူညီရေး၊ လူသားချင်းစာနာထောက်ထားမှု အကူအညီများ တိုးမြှင့်ပေးအပ်ရေးနှင့် နယ်စပ်ဖြတ်ကျော် ရာဇဝတ်မှုများကို ဖြေရှင်းရန် နည်းလမ်းများ အမြင်ချင်း ဖလှယ်ခဲ့ကြောင်း သိရသည်။