ထိုင်းနိုင်ငံ ချင်းမိုင်ခရိုင်အတွင်း တရားမဝင် မူးယစ်ဆေးဝါးမှောင်ခိုကွန်ရက်တစ်ခုကို ဖမ်းဆီးရမိပြီး စိတ်ကြွဆေးပြား (ယာဘ) ၇.၃ သန်းကျော်နှင့် စိတ်ကြွဆေးခဲ (အိုက်စ်) ၂၅၀ ကီလိုဂရမ်တို့ကို သိမ်းဆည်းရမိခဲ့ပြီး သံသယရှိသူ ၃ ဦးကိုလည်း ဖမ်းဆီးထိန်းသိမ်းနိုင်ခဲ့ကြောင်း ချင်းမိုင်သတင်းတွင် ဖော်ပြသည်။

ယမန်နေ့ (ဇွန်လ ၂၃ ရက်) မွန်းလွဲပိုင်းတွင် ချင်းမိုင်ခရိုင်၊ မိန်း(Mueang) မြို့နယ်ရှိ မူးယစ်ဆေးဝါးနှိမ်နင်းရေးနှင့်ကွပ်ကဲမှုရုံး၌ ပြုလုပ်ခဲ့သည့် သတင်းစာရှင်းလင်းပွဲပြုလုပ် သတင်းထုတ်ပြန်ခဲ့သည်။

မူးယစ်ဆေးဝါးမှောင်ခိုဂိုဏ်းတစ်ခုသည် ချင်းမိုင်ခရိုင်၊ မယ်တန်း (Mae Taeng) မြို့နယ်အတွင်း ကြားခံစခန်းနှင့် ပစ္စည်းလာချရာနေရာ (Dead-drop point) အဖြစ် အသုံးပြုကာ မူးယစ်ဆေးဝါးများကို ထိုင်းနိုင်ငံအလယ်ပိုင်းသို့ သယ်ဆောင်ရန် ပြင်ဆင်နေကြောင်း သိရသဖြင့် ရဲတပ်ဖွဲ့မှ မယ်ဂျို (Mae Jo) ရဲစခန်းရှေ့လမ်းပေါ်တွင် ရှာဖွေစစ်ဆေးခဲ့ရာ ကားတစ်စီးအတွင်း ဝှက်သယ်လာသော စိတ်ကြွဆေးခဲ (အိုက်စ်) ၂၅၀ ကီလိုဂရမ်နှင့်အတူ အမျိုးသားတစ်ဦးအား ဖမ်းဆီးရမိခဲ့သည်။

ထိုသူကို ဖမ်းဆီးရမိပြီးနောက် နောက်ဆက်တွဲ စုံစမ်းမှုများမှတဆင့် မယ်တန်းမြို့နယ်အတွင်း လျှို့ဝှက်ကုန်လှောင်ရုံတစ်ခု ဖွင့်လှစ်ထားကြောင်း ရှာဖွေတွေ့ရှိခဲ့သဖြင့် ဝင်ရောက်စီးနင်းခဲ့သည်။

ထိုကုန်လှောင်ရုံအတွင်း ရှာဖွေစစ်ဆေးရာတွင် မူးယစ်ဆေးဝါးများ ဝှက်ထားရန်အတွက် အဆင့်မြင့်မွမ်းမံပြင်ဆင် တည်ဆောက်ထားသည့် “လျှို့ဝှက်မြေအောက်ဘန်ကာ” တစ်ခုကို ရှာဖွေဖော်ထုတ်နိုင်ခဲ့သည်။

ထိုထဲတွင် ဆာလာအိတ် ဒါဇင်ပေါင်းများစွာဖြင့် ထုပ်ပိုးထားသည့် ယာဘပြား စုစုပေါင်း ၇,၃၃၀,၀၀၀ (၇.၃ သန်းကျော်) ကို တူးဖော်သိမ်းဆည်းရမိခဲ့ပြီး၊ ကုန်လှောင်ရုံကို စောင့်ကြပ်နေသည့် သံသယရှိသူ ၂ ဦးကို ဖမ်းမိခဲ့သည်။

ယခုဖမ်းဆီးရမိသည့် မူးယစ်ဆေးဝါးကွန်ယက်များမှာ နောက်ကွယ်မှ အဓိကငွေကြေးပံ့ပိုးသူတစ်ဦးတည်း၏ တိုက်ရိုက်ကွပ်ကဲမှုအောက်တွင် လည်ပတ်နေသည့် တစ်ခုတည်းသော မှောင်ခိုဂိုဏ်းဖြစ်ကြောင်း ဖော်ပြထားသည်။

မူးယစ်ဆေးဝါးများကို နယ်စပ်ဒေသများမှတစ်ဆင့် ချင်းမိုင်အတွင်းသို့ သယ်ဆောင်ကာ ထိုမှတစ်ဆင့် ထိုင်းနိုင်ငံအလယ်ပိုင်းနှင့် အခြားဒေသများသို့ ဖြန့်ဖြူးရန် လုပ်ဆောင်နေခြင်း ဖြစ်ကြောင်းသိရသည်။

လက်ရှိတွင် နောက်ကွယ်မှ ကြိုးကိုင်နေသူများကို စုံစမ်းဖော်ထုတ်နိုင်ရန် စုံစမ်းမှုများကို အရှိန်မြှင့်် ဆက်လက်လုပ်ဆောင်နေကြောင်း သတင်းထုတ်ပြန်ထားသည်။

ကိုးကား – Chiang Mai News