သျှမ်းပြည်တောင်ပိုင်း၊ အောင်ပန်းမြို့ နောင်ရဲကျေးရွာနေ အသက် (၆)နှစ်အရွယ် ကလေးတဉီးသည် နားကပ် လုခံရပြီး ရေတွင်းထဲ ပစ်ချခံရကာ သေဆုံးသွားကြောင်း သတင်းရရှိသည်။  

ဖြစ်စဉ်မှာ ယမန်နေ့ ဩဂုတ်လ (၆) ရက်နေ့ ညနေ ၅ နာရီခွဲ တွင် အောင်ပန်းမြို့ နောင်ရဲကျေးရွာရှိ အသက် (၆) နှစ်အရွယ် မဆောင်းနှင်းသည် ဆော့ကစားရန် ထွက်သွားရာမှ ပြန်မလာ၍ ၎င်း၏ မိဘနှင့် ရွာသားများက လိုက်လံ ရှာဖွေခဲ့ကြသည်။

ထိုသို့ ရှာဖွေစဉ် ည(၁၁)နာရီ ဝန်းကျင်တွင် ကျေးရွာနှင့် အလှမ်းဝေးသည့် တောင်ပေါ် ဘုရားတောင် ရေတွင်းထဲ၌ သေဆုံးလျက် တွေ့ရှိခဲ့ကြောင်း အောင်ပန်း နာရေးကူညီမှုအသင်းမှ တာဝန်ရှိသူ အမျိုးသားတဉီးက သျှမ်းသံတော်ဆင့် ကိုပြောသည်။​

“ကလေးထွက်သွားတာ မိဘတွေကလည်း အလုပ်များတော့ သတိမထားမိပုံပဲ၊ ကလေးပြန်မလာလို့ လိုက်ရှာတော့ အလောင်းပဲ ပြန်တွေ့တယ်၊ ပြန်တွေ့တဲ့ အချိန် ကလေးရဲ့ နားကပ်တွေ မတွေ့တော့ဘူး၊ ရွာသားတွေပြောတာတော့ နားကပ် လု၊ သတ်ပြီးမှ ရေတွင်းထဲ ပစ်ချတာလို့ ယူဆကြတယ်” ဟု ၎င်းကပြောသည်။ 

ကလေး၏ ရုပ်အလောင်းကို တွေ့ရှိခဲ့သည့် ဘုရားတောင် ရေတွင်းနှင့် နောင်ရဲ ကျေးရွာသည် နာရီဝက်မျှ ကွာဝေးကြောင်းသိရသည်။​

လက်ရှိအချိန်ကာလသည့် စားဝတ်နေရေး ခက်ခဲနေသည့်အပြင် အောင်ပန်းမြို့နယ်အတွင်း  မူးယစ်ဆေးသုံးစွဲသူ၊ စလော့ဂိမ်း ကစားသူများလာမှုကြောင့်  လူသတ်မှုများ မကြာခဏ ကြားလာရကြောင်း အောင်ပန်း ဒေသခံ အမျိုးသားက ပြောသည်။

“အောင်ပန်းမှာတော့ ခိုးဆိုးလုယက်မှုတွေ မကြာခဏ ဖြစ်လာတယ်၊ မူးယစ်‌ဆေးသုံးတဲ့သူ ဂိမ်းဆော့သူတွေ များလာတော့ လူသတ်မှုတွေ လုယက်မှု ဖြစ်လာတာပေါ့၊ ကလေးတွေကို ညနေဘက်ဆို ဘယ်မှ ပေးမထွက်တာ အကောင်းဆုံး၊ ကိုယ့်အနီးက လူတောင် ကိုယ်မယုံရတဲ့ အခြေနေ ဖြစ်နေပြီ၊ ခေတ်ကာလက တော်တော် ဆိုးနေပြီ။”ဟု အောင်ပန်း ဒေသခံ အမျိုးသားတစ်ဦးက ပြောသည်။

ထိုသို့ လူသတ်မှုများ၊ ခိုးဆိုးလုယက်မှုများနှင့် မိမိကိုယ်ကိုယ် အဆုံးစီရင်မှု များသည် တစ်လလျှင် (၁၀) ကြိမ် အနည်းဆုံး ဖြစ်ပွားနေကြောင်း အောင်ပန်းနာရေး ကူညီမှုအသင်းက ဆိုသည်။

ယခုလက်ရှိ သျှမ်းတောင်တွင် လူပျောက်မှုများ၊ လုယက် အသတ်ခံရသူများ နှင့် မုဒိမ်းမှုများ မကြာခဏ ဖြစ်လာသောကြောင့် ဒေသခံများအနေဖြင့် အသွားလာသတိထားသင့်ကြောင်း အောင်ပန်းဒေသခံများကပြောသည်။ 

ပြီးခဲ့သည့် ဇူလိုင်လ အစောပိုင်းကာလတွင် အောင်ပန်း-ကလော သွားလမ်း လမ်းမကြီးတွင် အွန်လိုင်း စလော့ဂိမ်းရှုံး၍ ငွေကြေးကျပ်သိန်း ၁၅၀ ခန့်ဆုံး ရှုံးခဲ့သည့် ၁၂ ဘီးကားယာဉ်မောင်းတစ်ဦးသည် ကားကိုလမ်းဘေးရပ်ကာ ကိုယ့်ကိုယ်ကိုယ် ကြိုးဆွဲချအဆုံးစီရင်သွားခဲ့သည့် ဖြစ်ရပ် ဖြစ်ပွားခဲ့သည်။