သျှမ်းပြည် တောင်ပိုင်း ဟိုပုံး – ကျောက်တန်း – ပင်လုံလမ်းတွင် ဘုရားဖူးယာဉ်တစ်စီး ချောက်ထဲကျပြီး အမျိုးသမီး ၅ ဦး နှင့် အမျိုးသား ၁ ဦး သေဆုံးခဲ့ကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၁၈ ရက်) ညနေ ၄ နာရီ ခွဲကျော်တွင် ဟိုပုံး – ကျောက်တန်း – ပင်လုံ လမ်းပိုင်တွင် လူ ၁၅ ဦးတင်ဆောင်လာသည့် 4 wheel အဖြူရောင် ဘုရားဖူး ယာဉ်တစ်စီး ချောက်ထဲကျပြီး အမျိုးသမီး ၅ ဦး နှင့် အမျိုးသား ၁ ဦး သေဆုံးခဲ့ကြောင်း နှလုံးသား လူမှုကူညီရေး အသင်း တာဝန်းရှိသူတစ်ဦးက သျှမ်းသံတော်ဆင့်ကို ပြောသည်။
“ရပ်စောက်ကနေ ပင်လုံ ဘက်ကို ဘုရားဖူးလာတဲ့ ကားလို့ သိရတယ်။ကားပေါ်မှာ ကလေးအပါအဝင် လူကြီးတွေနဲ့ ဆိုရင် ၁၅ ယောက်ပါတယ်။၆ ယောက်ကတော့ ပွဲချင်းပြီးဆုံးသွားတယ်။ သူတို့ကို ထမ်းဆမ်းဂူဘက်ကနေ ညတွင်းချင်းလာ ကူညီသွားတယ်။ လူနာတွေကိုလည်း ချက်ချင်း တောင်ကြီး ဆေးရုံဖက်ကို ပို့လိုက်ကြတယ်။” နှလုံးသား လူမှုကူညီရေး အသင်း တာဝန်းရှိသူတစ်ဦးက ပြောသည်။
အဆိုပါ ကျောက်တန်းလမ်းမပေါ်တွင် လတိုင်းနီးပါး ကားကြီး၊ကားငယ် တိမ်းမှောက်မှုများဖြစ်ပွား နေသည့် အတွက်ကြောင့် ၎င်းလမ်းကို အသုံးပြုမည့် ကားသမားများအနေဖြင့် ကားသေချာစစ်ဆေးရန် နှင့် သတိထားသွားလာရန် နှလုံးသား လူမှုကူညီရေး အသင်း တာဝန်းရှိသူတစ်ဦးက ဆက်ဆိုသည်။
“ကားတွေကိုလည်း သတိထားမောင်းစေချင်တယ်။အတက်အဆင်းလည်း ကြမ်းတယ်။ ကားကြံ့ခိုင်မှုမရှိတာဖြစ်ဖြစ် ဘရိတ်မကောင်းတာဖြစ်ဖြစ်မသွားစေချင်ပါဘူး။လမ်းသေချာ မသိရင်လည်း ဖြေးဖြေးမောင်းကြပါ။”ဟု ၎င်းက ပြောသည်။
ယာဉ်တိမ်းမှောက်မှုတွင် ပွဲချင်းပြီး သေဆုံးသွားသည့် ၆ ဦးကို ယနေ့ (ဖေဖော်ဝါရီ ၁၉ ရက်) တောင်ကြီးမြို့တွင် သင်္ဂြိုလ်မည်ဖြစ်ကြောင်းသိရသည်။
ထိုအပြင် ၂ ဦးဒဏ်ရာ အပြင်အထန် ရရှိခဲ့ပြီး ကျန် ၆ ဦးသည် ဒဏ်ရာ အနည်းငယ်ရရှိခဲ့ကြကြောင်း ၎င်းကပြောသည်။
Leave a Comments