သျှမ်းပြည်တောင်ပိုင်း၊ ပင်လောင်းမြို့နယ် ပေါင်းလောင်းမြို့သစ် သပြေကုန်းအုပ်စု ဧဒင်ကျေးရွာတွင် တောင်ကျရေကြောင့် လူနှစ်ဦး သေဆုံးပြီး၊ နှစ်ဦးအပြင်းထန် ဒဏ်ရာရှိသွားကြောင်း သတင်းရရှိသည်။

ဖြစ်စဉ်မှာ ယမန်နေ့ ( ဩဂုလတ် ၂၇) ရက် နံနက် ၂ နာရီ လူအိပ်ချိန်တွင် ရုတ်တရက် တောင်ပြိုပြီး တောင်ကျရေနှင့်အတူ ကျောက်တုံး၊ သစ်တုံးနှင့် နွံများ နေအိမ် ၊ လမ်းများအတွင်းသို့ ဝင်ရောက်လာ၍ အသက် ၂၀ ကျော် အမျိုးသားတစ်ဦးနှင့် အသက် ၆၀ ကျော် အမျိုးသမီး တစ်ဦး သေဆုံးသွားခဲ့ကြောင်း သိရသည်။

ထို့အပြင် ပြင်းထန် ဒဏ်ရာရရှိထားသည့် အမျိုးသမီးနှစ်ဦး ပင်လောင်းဆေးရုံသို့ ပို့ဆောင်ထား သည်။

လက်ရှိ တောင်ကျရေကြောင့် ဧဒင်ကျေးရွာတွင် နေအိမ် ၁၃ လုံးပျက်စီးသွားကြောင်း ဆာယာဂရုဏာဖောင်ဒေးရှင်း မှ ကိုသိန်းသန်းအောင်က သျှမ်းသံတော်ဆင့်ကိုပြောသည်။

“ည လူအိပ်ချိန်မှာ ရေက ရုတ်တရက်ဝင်ပြီး တိုက်စားသွားတာ။ လူတွေလည်း သေတယ်။ ဒဏ်ရာ ရတဲ့ နှစ်ယောက်ကိုတော့ ဆေးရုံပို့ထားရတယ်။ အိမ်တွေလည်းပျက်တယ်။ ရေချောင်းဆို အကျယ်ကြီးဖြစ်သွားတယ်။ လာကူညီတဲ့သူတွေလည်း မလာသေးဘူး။ ရွာခံတွေပဲ ဝိုင်းဝန်းပြီး ကူညီနေရတာ။”ဟု ၎င်းကပြောသည်။

ဆက်လက်ပြီး ရေဘေးသင့်ပြည်သူဦးရေ (၃၀) ကျော်ရှိပြီး ၎င်းတို့ကို ရွာထဲရှိ ခရစ်ယာန်ဘုရားကျောင်းတွင် တိမ်းရှောင်နေထိုင်နေပြီး အဝတ်အထည်၊ စားနပ်ရိက္ခာ နှင့် ဆေးဝါးများ အကူညီလိုအပ်နေကြာင်း ၎င်းအမျိုးသားက ထပ်လောင်းပြောသည်။

အဆိုပါ တောင်ပေါ်ဒေသရှိ ဧဒင်ကျေးရွာက ဒေသခံများသည် မျှစ်ချိုးသည့်အလုပ်ကို သာလုပ်ကိုင်ကြပြီး ပြန်လည်ထူထောင်ရေးလုပ်ဆောင်ရန်တွင် ၎င်းဒေသခံများအတွက် ငွေကြေးအခြေအနေများ အခက်အခဲဖြစ်နိုင်နေကြောင်း သိရသည်။
ထို့ကြောင့် မိုးရာသီတွင် တိကျသည့် သတင်းအချက်လက်များ ပြည်သူများကို အချိန်နှင့်တပြေးညီ မျှဝေရန်လိုအပ်နေပြီး ပြည်သူများမှလည်း ရရှိသည့် သတင်းများကို လေးစားလိုက်နာရန် လိုအပ်ကြောင်း ဒေသခံ အသက် ၃၀ ဝန်းကျင် အမျိုးသားတစ်ဦးက ပြောသည်။

“အဓိကတော့ ပြည်သူတွေက သတင်းအမှန်ကို အချိန်ကိုက် သိဖို့လိုတယ်။ ဒီနေ့ မိုးများမယ် မုန်တိုင်းဝင်မယ် စသဖြင့်ပေါ့။ နောက်ပြီး အသိပညာတွေလည်း ပေးဖို့ လိုအပ်တယ်။ မိုးရေချိန် ဘယ်လောက်များရင် တောင်ပြိုနိုင်တာတို့၊ ရေစီးကြောင်းမှာ ရေအရောင်ပြောင်းနေရင် နေရပ်ရွှေ့ဖို့ စတဲ့ အသိပညာတွေ ပေးဖို့ လိုအပ်တယ်။ ပြည်သူတွေလည်း လိုက်နာဖို့ လိုတယ်။”ဟု အဆိုပါ အမျိုးသားက ပြောသည်။

ယခုကဲ့သို့ တောင်ပြိုမှု ရေကြီးမှုဖြစ်စဉ်များသည် တောင်ပေါ်ဒေသနေရာအများစုတွင် ဖြစ်ပေါ်လာသည်မှာ သစ်တောများ ပြုန်းတီးခြင်း၊ သစ်ပင်များ ပြန်မစိုက်ကြခြင်းကြောင့် ရာသီဥတု ဆိုးရွားလာခြင်းနှင့်အတူ တောင်ပြိုမှုတွေ ဆက်တိုက် ဖြစ်လာနေရသည်ဟု ဆက်ပြောသည်။

မိုးရာသီ တောင်ပေါ်ဒေသတွင် မိုးများအဆက်မပြတ်ရွာသွန်းလျှင် တောင်ပြို၍ လမ်းပိတ်ခြင်းများမကြာ ခဏကြုံတွေ့ရသော်လည်း ယခုကဲ့သို့ နေအိမ်များ ပျက်စီးပြီး လူသေဆုံးမှုဖြစ်စဉ်သည် ဧဒင်ကျေးရွာတွင် ပထမဦးဆုံးအကြိမ်ဖြစ်သည်။

အလားတူ ပင်းတယမြို့နယ် သိမ်ကုန်းကျေးရွာအုပ်စု ကုန်းစောင်းကျေးရွာတွင်လည်း ပြီးခဲ့သည့် ဇူလိုင်လ ၂၇ ရက်နေ့တွင် တောင်ကျရေကြောင့် နေအိမ် ၁၂လုံး ပျက်စီးသွားပြီး သေဆုံးသူ ၈ဦးရှိခဲ့သည်။

ပြီးခဲ့သည့် ၂၀၂၄ ခုနှစ် ဩဂုတ်လ တွင် သျှမ်းတောင်နှင့် နေပြည်တော်ကြားရှိ တပ်ကုန်းအရှေ့ဘက်ကျေးရွာ များတွင် တောင်ကျရေကြောင့် ရေကြီးခြင်းများဖြစ်ပေါ်ခဲ့ပြီး လူဦးရေ ၆၀ နီးပါး အသက်ဆုံးရှုံးခဲ့ရကြောင်း သိရသည်။