သျှမ်းပြည်တောင်ပိုင်း အောင်ပန်းမြို့တွင် ကားအရောင်းအဝယ်ပြုလုပ်ရန် ချိန်းဆိုထားရာမှ ဓားဖြင့် တိုက်ခိုက်ခံရမှုပြီး အမျိုးသားတစ်ဦးသေဆုံးကာ၊ တစ်ဉီးက ဒဏ်ရာ ပြင်းထန်ဒဏ်ရာရရှိခဲ့ကြောင်း သတင်းရရှိသည်။​

လက်ရှိတွင် ပြစ်မှုကျူးလွန်သူအား အာဏာပိုင်များက ဖမ်းဆီးရမိပြီ ဖြစ်ကြောင်း သိရသည်။

ဖြစ်စဉ်မှာ ဖေဖော်ဝါရီလ (၁၄) ရက် နံနက်ပိုင်းတွင် အသက် (၂၁) နှစ်အရွယ်ရှိ ကိုသက်မော်ထူးနှင့် ၎င်း၏ အစ်ကိုဖြစ်သူတို့သည် ကားဝယ်ယူလိုကြောင်း ဆက်သွယ်လာသည့် အမျိုးသားတစ်ဦးနှင့် ချိန်းဆိုထားသည့်နေရာသို့ သွားရောက်ခဲ့သည်။

ထိုသို့ ကားကို ပြသပြီးနောက် သဘောတူခဲ့ကြောင်းဆိုကာ ငွေပေးချေရန် ညီအကိုနှစ်ဦးကို ဟဲဟိုးဘက်သို့ လိုက်ခဲ့ရန် ခေါ်ဆောင်သွားခဲ့သည်။

ထို့နောက် လမ်းခရီးတစ်ဝက်တွင် တရားခံက နောက်ထပ် အခြားသူတစ်ဦးကို ဝင်ခေါ်မည်ဟုဆိုကာ မောင်းနှင်သွားခဲ့သော်လည်း ထိုသူထံ မရောက်မီ လမ်းတဝက်တွင် ကားဝယ်မည်ဟုဆိုသူက ဓားထုတ်၍ စတင်တိုက်ခိုက်လာခဲ့ကြောင်း ဖြစ်စဉ်ကိုသိရှိသူ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ကားဝယ်မယ်ဆိုပြီး ညာခေါ်တဲ့သဘာပဲ။ အသက် ၂၁ အရွယ်ရှိတဲ့ ညီဖြစ်သူက ဓားနှစ်ချက် ထိုးခံရတယ်။ ဆေးရုံရောက်လို့ ဆရာမကိုမေးကြည့်တဲ့အခါမှာတော့ ညီဖြစ်သူက အသက်မပါတော့ဘူး။ အကိုဖြစ်သူကတော့ ခေါင်းမှာ ငါးချက် ချုပ်လိုက်ရတယ်။ အသက်အန္တရာယ်မရှိဘူး” ဟု ၎င်းက ပြောသည်။

ညီဖြစ်သူ ကိုသက်မော်ထူးမှာ ရရှိသော ဒဏ်ရာများကြောင့် အခင်းဖြစ်နေရာ၌ပင် သေဆုံးခဲ့ပြီး အစ်ကိုဖြစ်သူလည်း ပြင်းထန်သော ဒဏ်ရာများ ရရှိခဲ့သည့်အတွက် ဆေးရုံတွင် ဆေးကုသမှုခံယူနေရကြောင်း သိရသည်။

ဖြစ်စဉ်ဖြစ်ပွားပြီးနောက် သက်ဆိုင်ရာ လုံခြုံရေးတပ်ဖွဲ့ဝင်များနှင့် ရဲတပ်ဖွဲ့က အမြန်ဆုံး လိုက်လံစုံစမ်းခဲ့ရာ ပြစ်မှုကျူးလွန်သူကို သက်သေခံပစ္စည်းများနှင့်အတူ ဖေဖော်ဝါရီလ ၁၄ ရက်နေ့တွင် ဖမ်းဆီးရမိခဲ့ကြောင်း သိရသည်။

သို့သော် တရားခံအား မည်သည့် ပုဒ်မဖြင့် တရားစွဲဆိုထားသည်ကို မသိရှိရသေးဘဲ သျှမ်းသံတော်ဆင့်မှ ဆက်လက်စုံစမ်းနေဆဲ ဖြစ်သည်။

ယခုကဲ့သို့သော လူယုံသွင်း တိုက်ခိုက်မှုများသည် အွန်လိုင်းမှတစ်ဆင့် ပစ္စည်းအရောင်းအဝယ် ပြုလုပ်ရာတွင် ဖြစ်ပွားလေ့ရှိသည့် အန္တရာယ်တစ်ခု ဖြစ်လာနေကြောင်း အထက်ပါအမျိုးသားတစ်ဦးက ထပ်လောင်းပြောသည်။

၎င်းက “အခုခေတ်က ဘာပဲလုပ်လုပ် သတိထားရတော့မယ့် ခေတ်ပါ။ အထူးသဖြင့် အရောင်းအဝယ်လုပ်တဲ့အခါ ကိုယ်ကရောင်းမယ့်သူဖြစ်လို့ ဝယ်မယ့်သူကိုပဲ အိမ်အထိ လာကြည့်ခိုင်းတာ အကောင်းဆုံးပါပဲ။ ကိုယ်က လိုက်ပြနေရရင်တော့ လုံခြုံရေးအရ ဘယ်လိုမှ အဆင်မပြေနိုင်ဘူး။ ဝယ်ချင်တဲ့သူက အိမ်အထိ လာဝယ်တာကမှ စိတ်အချရဆုံးပဲ” ဟု တိုက်တွန်းထားသည်။

ပြီးခဲ့သည့် ဇန်နဝါရီလ ၂၃ ရက်က တောင်ကြီးမြို့ ကန်ကြီးရပ်ကွက်တွင် အသက် ၇ နှစ်အရွယ်သာရှိသေးသော ဒုတိယတန်းကျောင်းသားငယ်တစ်ဦးကို နေအိမ်ရှေ့မှာပင် ဟွန်ဒါဖစ်ကားဖြင့် အတင်းအဓမ္မ ဖမ်းဆီးခေါ်ဆောင်သွားခဲ့သည့် ဖြစ်စဉ်တစ်ခုလည်း ဖြစ်ပွားခဲ့သည်။